Heta niha 3 jê şaredariyên bajarê mezin bi giştî qeyûm tayînî 15 şaredariyên HDP'ê hatine kirin. Nûnerê partiyên siyasî û Rêxistinên Civaka Sivîl (RCS), nerazîbûnên xwe yên ji bo tayînkirina qeyûman anîn ziman.

 

Hevseroka Giştî ya SYKP'ê Canan Yuce, got: "Bloga AKP-MHP'ê, bi tayînkirina qeyûman rejîma xwe ya faşîst ava dike û dilezîne." Yuce, anî ziman ku divê hêzên demokrasiyê vê yekê baş bibînin û got: "Faşîzma li rojavayê welêt û dagiriya li rojhilatê welêt du ruyên cuda yên madalyoyê ne. A dikeve ser milê me; em vê talûkeya faşîzan berterf bikin û êrîşkariya dagiriyî rawestînin. Ji bo vê jî hewce ye hêzên demokrasiyê hin taktîk û pratîkan pêş ve bixin." 

 

‘XESPKIRINA VÎN Û MAFAN' 

 

Hevseroka Giştî ya Malên Gel Dilşat Aktaş jî bibîr xist ku bi qeyûman vîna gel hatiye binpêkirin û got, îktîdar bi qeyûman dixwaze du tiştan pêk bîne: yek jê perçekirina bloka muxalefetê û ya din jî avakirina pergala talankirinê ye. Aktaş, anî ziman ku gava muxalefet dibe yek dikare îktîdarê bi paş ve bibe û got: "A dikeve ser milê me bê şert û merc, bê nîşandan ku tayînkirina qeyûman xespkirina vînê û mafa ye û wê ev yek tenê bi şaredariyên HDP'î sînrodar nemîne. Liv û tevgera li gor vê pir girîng e. Çimkî ji bo berdewamiya pergala talankirinê ya vê îktîdarê şaredarî amûrine muhîm in. Loma bi vî awayî dixwaze şaredariyên winda kirine dîsa bi dest bixe. Ji bo vê gelan bera hev du dide, dike dijminê hev du û pêkanînên faşîst dixe dewrê. Helbet em bawer dikin ku wê vîna gel ji derheqê van êrîşan derkeve." 

 

Seroka Giştî ya EMEP'ê Selma Gurkan jî anî ziman ku îktîdar bi tayînkirina qeyûman hem dixwaze ser polîtîkaya xwe ya ji bo Sûriyeyê bigire û hem jî dixwaze bi van polîtîkayan rêveberiya xwe ya yek zilamî ava bike. Gurkan, got: "Îktîdara AKP'ê tiştên ku nikaribû bi hilbijartinê bi dest bixe, bi darê zorê bi dest dixe. Helbet ev zext û zorî tenê ne ji bo HDP'ê, ji bo muxalefetî tevahî di dewrê de ye." Gurkan, diyar kir ku li hemberî vê rejîma siyasî ya AKP'ê û Erdogan, pêdivî bi têkoşîneke demokratîk û rêxistinbûyînê heye. 

 

‘QEYÛM DARBE YE' 

 

Berdevkê Stenbolê yê Hewldana 78'an Yûsûf Bîrcan jî anî ziman ku li Tirkiyeyê qeyûm veguherîne awayekî rêvebirinê û got: "Tayînkirina qeyûman, rasterast mudaxilekirina mafê bijartin û hilbijartinê yê gelê kurd e. Ev bi awayekî aşkere 'em kesên hûn hildibijêrin nas nakin' bi xwe ye. Heger li cihekî gelek hebe û hebûna wî hatibe qebûlkirin, nexwe mafên wî gelî jî hene. Qeyûm, darbeya li hemberî mafên gelan e." Bîrcan, destnîşan kir ku li hemberî vê pêdivî bi berxwedaneke rew ya hêzên demokrasiyê heye. 

 

‘KIRIYE AWAYÊ RÊVEBIRINÊ' 

 

Parlementerê HDP'ê yê Êlihê yê berê Mehmet Alî aslan jî destnîşan kir ku îktîdar tiştên ku bi hilbijartinê bi dest nexistiye dixwaze bi darê zorê bi dest bixe. Aslan, diyar kir ku zilam li ser gelê kurd, li Meclîsê ji aliyê partiyên muxalefetê yên din jî rewa tê dîtin. Aslan, anî ziman ku îktîdar hêzê ji vê yekê digire û tayînkirina qeyûman veguherandiye awayê rêvebirinê. Aslan, bilêv kir ku heger niha dîsa hilbijartinê çê bibe wê HDP şaredariyên qeyûm tayînî wan hatine kirin dîsa bi dest bixe. Aslan, got: "Baş dizanin gava hilbijartin çê bibe wê HDP bi ser bikeve. Loma naxwazin hilbijartin çê bibe. Lê ev polîtîka dewam nake. Gel, ji qeyûman nerazî ye." 

 

MA / Erdogan Alayûmat