ENQERE - Li Enqereyê, di serdegirtina malan de jinên endamên HDP û KESK'ê jî di nav de 5 jin hatin binçavkirin. Di çarçoveya heman lêpirsînê de li Mersînê jî jinekî hat binçavkirin.
Polisan , li Enqere û Mersînê di saetên serê sibehê de bi awayekî hemvaxt bi ser malan de girt û 6 jin binçav kirin. Hat diyarkirin ku operasyona hem waxt li dijî Kongereya Jinên Azad (KJA) ku bi KHK'ê hatibû girtin, pêk hatiye. Di çarçoveya operasyonê de li Enqereyê, rêvebera berê ya HDP'a Enqereyê Derya Bakir, rêvebera HDP'a Çankayayê Hanim Bînîcî, endama HDP'ê Meryem Kîraz, endama Komeleya Elewiyên Demokratîk (DAD) Sevgî Sazan Kîşîn ku bi KHK'ê hatibû îxrackirin û xebatkara Konfederasyona Sendîkayên Kedkarên Cemaweriyê (KESK) Newroz Kirkaya hatin binçavkirin.
Polisan jinên ku binçavkirin birin Şaxa TEM'ê ya Miduriyeta Polisan a Enqereyê.
Di çarçoveya heman operasyonê de li Mersînê jî endama Meclisa Jinan a HDP'ê Ayşe Merve Aytemûr hat binçavkirin. Hat hînbûn ku dê Aytemûr jî bînin Enqereyê.
Hat hînbûn ku dibe hejmara kesên ku bên binçavkirin zêdetir bibe.