Berdevka Meclîsa Jinan a HDP'ê Dîlan Dîrayet Taşdemîr têkîldarî geşedanên di nava hefteyê de li avahiya KCD'ê ya Amedê civîna çapemeniyê li dar xist. Taşdemîr, di civînê de bi kurdî axivî. Taşdemîr, destnîşan kir ku li dijî zimanê kurdî hêj polîtîkayên pişaftinê didomin û wiha got: "Kurdistanî li gelek bajaran rastî êrîşê tên û doz jî nayên vekirin. Ji ber ku li ser mezelê Hevşaredarê Lîsê yê BDP'yî "Em te ji bîr nakin" nivîsandibûn, eskeran bi fermana dozger hilweşandin. Ev sucên dijminantiyê ne li dijî Kurdan. Em ê li dijî van polîtîkayan li her derê kurdî biaxivin."

 

'AGIRBEST ENCAM NEGIRT GELEK SIVÎL HATIN QETILKIRIN'

 

Taşdemîr, diyar kir ku ji 9'ê Cotmehê û vir ve êrîşek li ser Bakûr û Rojhilatê Suriyê heye û wiha axivî: "Agirbestê encam negirt. Gelek sivîl hatin qetilkirin û bi hezaran hatin koçberkirin. Li Girê Spî û Serêkaniyê pergala di pêşengiya jinan de hatiye avakirin hilweşandin. Dixwazin bi hişmendiya DAÎŞ'ê jiyanekê bidin avakirin. Ji ber ku Kobanê êşek xist dilê wan dixwazin êrîşî Kobanî bikin. Berxwedana mezin hişmendiya DAÎŞ'ê ji Kobanî derxist. Îro em dibînin ku dixwazin tola vê hildin." Taşdemîr destnîşan kir ku 1 û 2'yê Mijdarê rojên taybetin û wiha domand: "Piştî tarîtiya DAÎŞ'ê di pêşengtiya jinan de gel ketin nava rohahiyê û jiyanek hat ava kirin. Ji ber vê yekê kurd û dostên wan niha van rojan pîroz dikin. Li her derê meş tên li dar xistin. Divê em li van destkeftiyan xwedî derkevin."

 

'SIYASETEKE LI DIJÎ KURDAN BI RÊVE DIBIN'

 

Taşdemîr, da zanîn ku hikumeta AKP û MHP'ê siyaseteke li dijî Kurdan bi rêve dibin û wiha got: "Naxwazin bi Kurdên azad û pergaleke demokratîk re bijîn Li dijî vê her tiştî dikin. Ji DAÎŞ'ên ku 5 kîlometre nêzî sînor in ne acizin. Lê dibên bila Kurd 30 kîlometreyan dûrî me bin. Em bang li wan dikin ku êdî pirsgirêka Kurd pirsgirêka Navneteweyî ye. Bila Tirkiye û hikumeta AKP'ê vê baş bizane ku ji xeynî çareseriyê tu rê nînin. Bila eskerên xwe paşve bikşînin û nebin astengên çareserkirina pirsgirêka Suriyê. Çareserî ji bo hemû gelan riya herî baş e."

 

'DÊ SIYASETA MÊTINGERIYÊ WINDA BIKE'

 

Taşdemîr, bal kişand ser tayînkirina qeyûm û girtina siyasetmedaran û wiha axivî: "Polîtîkayên AKP'ê hem li derve û hem li hundir li dijî Kurdan e. Bi komplo û lîstikan dest danîn ser şaredariyên me. Hiqûq li gorî berjewendiyên AKP'ê tev digere. Duh Hevşaredara me ya Seravê binçav kirin û îro jî qeyûm tayîn kirin. Dixwazin vîna Kurdan bişkînin. Piştî qeyûm îlan kirin bi trilyonan pere winda ne. Bi kuve çûn? Divê bersivê bidin me."

 

'ÊRÎŞ LI ZINDANAN JÎ ZÊDE DIBIN'

 

Taşdemîr, bibîr xist ku di 2016'an bi derbeyekê hevserok û siyasetmedarên wan hatin binçav kirin û girtin û wiha got: "Çawa êrîş li derve hene li zindanan jî zêde ne. Li zindana Kandirayê, zextên li ser Parlamentera me Selma Irmak û Çagla Demîrelê zêde dibin. Dixwazin bi riya qemereyan hevalên me bişopînin û jiyana wan bixin bin kontrolê. Heke hûn dixwazin bişopînin yên şopandinê li Enqerê ne. Di navenda Enqereyê de emirê Telaferê yê DAÎŞ'ê ku keçikeke êzidî ya çardeh salî revand û li wir ji xwe re harem ava kirî bişopînin." 

 

'JI BO HIQÛQA TIRKIYE RÛREŞIYEKE MEZIN E'

 

Taşdemîr, bal kişand ser paketa darazê ya nû û wiha dirêjî da axaftina xwe: "Parlementerê me yê Colemergê Abdullah Zeydan jî serlêdan kir. Dadgehê biryara berdanê da. Lê dozger îtîraz kir û hevalê me nehat berdan. Ev rewşa hiqûqê nîşan dide. Em biryarê şermezar dikin. Rûreşiyeke mezin e ji bo hiqûqa Tirkiyê."

 

'BI RÊBAZÊN DAÎŞ'Ê JINAN QETIL DIKIN'

 

Taşdemîr, diyar kir ku wê jin di 25'ê Mijdarê Roja Têkoşîna Navneteweyî ya li Dijî Tundiya li Ser Jinan de li qadan bin û wiha got: "Em wek meclîsa jinan a HDP'ê li dijî tundiya zilam û ya dewletê serî hildidin. Em ê vê mehê berxwedana jinan xurt bikin. Li her derê qirqirina jinan bi rêbazên DAÎŞ'ê derdikeve pêş. Li Erganiyê Gulu Yilmaz ji aliyê hevserê xwe ve hat şewitandin. Hevserê Emîne Bûlût li ber çavan qetil kir. Êdî em hatine rewşeke wisa ku  jin nikarin bêjin 'Em azad bibin û bixebitin'. Dibêjin 'tenê em dixwazin bijîn'. Ji ber ku tundiya li ser jinan hatiye astek pir zêde. Hikumeta AKP û MHP'ê çawa dijminatiya gelan dike bi zimanekî zilamî ava dike û li hemberî jinan ketine hewildaneke mezin."

 

'NAVÊ QANÛNÊ EFÛKIRINA TECAWIZKARAN E'

 

Taşdemîr, destnîşan kir ku dê di demek nêzîk de qanûna efûya kesên tacawizî zarokên biçûk kirine bê meclîsê û wiha got: "Bi rastî navê vê qanûnê efûkirina tecawizkarên zaroka ne. Em dibînin li her derê ev sûc zêde dibin ew jî bi vê siyaseta wan ve girêdaye. Em jî wek Meclîsa Jinên HDP'ê û Tevgera Jinên Azad (TJA) li hemberî van polîtîkayan çalakiyên xwe xurt bikin."

 

'TÊKOŞÎNA JINAN CIVAKÊ PÊŞ DIXE'

 

Taşdemîr, herî dawî bal kişand ser binçavkirina jinan a li Wanê û got: "Di navde endamên TJA'yê jî heyî 15 jin hatin binçavkirin. Niha di bin çavan de ne. Em dixwazin hevalên me berdin. Ji têkoşîna jinan êdî ne tirsin. Têkoşîna jinan hem civakê bi xwe re diguherîne hem jî demokrasî û azadiyê pêş dixe. Em meha mijdarê wek meha berxwedan û têkoşînê bi nav dikin. Em dê hem şoreşa jinan biparêzin hem jî bi çalakiyên xwe van polîtîkayan pûç bikin."