NAVENDA NÛÇEYAN - Ermeniyên ku 104 sal berê rastî komkujiya Ermeniyan hatin û ji cihê xwe koçî Serêkaniyê kiribûn, piştî êrîşa Tirkiyeyê ya di 9'ê Cotmehê de cara duyemîn koç kirin.
Ermeniyên ku di sala 1915'an de ji ber komkujiyê ermeniyan ji cih û warên xwe koç kirin û hatin li Serêkaniyê ya binxetê bi cih bûn, 104 sal şûnde vê carê ji ber êrîşa Tirkiyeyê ya di 9'ê Cotmeha 2019'an a li ser Bakur û Rojhilatê Sûriyeyê pêk hat dîsa koç kirin. Nêzî 30 malbatên ermenî yên 104 sal barê koç kiribûn û hatibûn li Serêkaniyê bi cih bûn, piştî êrîşa Tirkiyeyê dîsa ketin rêya koçê.
Ermenên Serêkaniyê yên ji ber êrîşên Tirkiyeyê koç kirin ji Ajansa Nûçeyan a Firatê (ANF) re axivîn û bertekên xwe anîn ziman. Ermeniyan diyar kirin ku hêzên navnetewî ji ber ku li dijî komkujiyên Tirkan bêdeng in û hesab napirsin ev dewleta Tirk wêrek dike û gogin, ''Bi rêbaza şermezarkirinê rê li pêş komkujiyê û dagirkeriyê nayê girtin.''
Welatiyê Ermenî Waîl Oseb, anî ziman ku wan ji ber êrîşên Tirkiye koç kir û wiha got: "Me ji ber êrîşên Tirkiye û komên girêdayî wê ji Serêkaniyê koç kir. Pêşiyên me ji ber qirkirina 1915'an koçî Kobanê kirin û piştre li Serêkaniyê bi cih bûbûn. 'Em ji Osmaniyan xilas nebûn. Milyonek û nîv Ermen qir kirin. Li gel ku ew qas sal derbas bûne jî ti kesî li dijî vê dengê xwe dernexist. Kesî hesab nepirsî heke hesabê komkujiyan ji Osmaniyan bihata xwestin îro dewleta Tirk wê nikarîbûna vê bike.''
'EM DIXWAZIN DAGIRKERÎ BI DAWÎ BIBE'
Oseb, da zanîn ku ji ber êrîşên dewleta Tirk bi sed hezaran mirov koçber bûne û wiha axivî: "Tirkan û çeteyên wan li mal û talana gel dan. Em Ermen, Kurd, Ereb û Sûryan dixwazin li malên xwe vegerin û dagirkerî bidawî bibe. Li hemberî tiştên ku Erdogan dike her kes bêdeng e. Emerîka, Rûsya, Neteweyên Yekbûyî û Ewropa dibêjin ew vê rewşê qebûl nakin û şermezar dikin. Şermezarkirin hêsan e, ez jî dikarim şermezar bikim, lê ti gavê navêjin. Dewleta Tirk her çekê davêje. Bêyî ku bibêje ev zarok e, jin e çekên qedexekirî fosforê jî davêje. Kesî li dijî vê dengê xwe nekir.''
'TRÛMP DESTÛRA ÊRÎŞAN DA'
Oseb, anî ziman ku Trûmp destûr nedabûya Erdogan wê nikarîbûna êrîşê bîne û wiha axivî: "Wî destûr daye û Erdogan êrîş aniye ser Serêkaniyê. 'Em vê qebûl nakin. Bi rexnekirina Erdogan bi şermezarkirinê nabe. Ji ber ku di genetîka wan de komkujî heye."
Birayê Waîl û Cezayir Oseb Xelîl Cemîl jî anîn ziman ku roja sêyan a êrîşên Tirkiyeyê ji bêgavî ji bajêr derketine û got: ''Em Ermen, Kurd û Ereb bi hev re dijiyan. Bi balafir û topan êrîş anîn ser me. Em tirsiyan û me mala xwe berda. Kurekî min li nav YPG'ê û kurekî din li nav Sutoro berevaniyê li xakên xwe dikin. 'Em dixwazin vegerin ser xaka xwe. Lê heta ku dewleta Tirk û çete li wir bin em nikarin vê bikin.''