Şaxa Komeleya Mafên Mirova (ÎHD) a Amedê û xizmên windayan di hefteya 559’emîn de çalakiya “Bila winda bên dîtin û kujer bên darizandin” li ber avahiya komeleyê li dar xist. Parlamentera HDP’ê ya Sêrtê Meral Daniş Beştaş, Serokê Rêxistina CHP’a Amedê Mehmet Sayin, Serokê Şaxa ÎHD’a Amedê Abdullah Zeytûn, rêveberên ÎHD’ê û xizmên windayan beşdar bûn û wêneyên windayan hildan. 

 

‘KOMKUJIYA HIQÛQÊ PÊK TÎNIN’ 

 

Serokê Şaxa ÎHD’ê Abdullah Zeytûn di çalakiyê de axivî û girtina hevşaredaran û tayînkirina qeyûman bi bîr xist û girtina hevşaredaran wek desteserkirina vîna gel pênase kir. Zeytûn girtina hevşaredaran wek “komkujiya hiqûqê” nirxand û got: “Hevşaredar bi sedemên razber tên girtin. Delîl li derveyî hiqûqê hatine berhevkirin. Divê hevşaredar demildest bên berdan û vegerin ser wezîfeyên xwe. Ev rêzgirtina li hember mafên mirova, demokratîk û azadiyê ye. Hiqûqê li gorî siyasetê birêve dibin. Ev yek nayê qebûlkirin.” 

 

‘HEKE BIXWAZIN DIKARIN KUJERAN BIBÎNIN’ 

 

Parlamenter Meral Daniş Beştaş jî da zanîn ku çalakiya xizmên windayan yek ji çalakiyên bêîtîtiya sivîl a dinyayê ya herî dirêj e û wiha got: “Wê îktîdarên çûn û hatin nikarin li pêşiya têkoşîna dayikan bibin asteng. Heke dewlet nexwaze dê kiryarên ne diyar pêk neyên. Heke dewlet bixwaze dê tu qatil bê darizandin nemînin. Ji ber tiştek ne tişt di nava 24 saetan de însanan dikarin bigirin û bi darizînin. Lê bi salane windayan nabînin û kujeran nadarizînin. Heke bixwazin dikarin kujeran bibînin. Lê ev îradeya wan nîne.” 

 

‘ÇIMA ÎTÎRAFKAR HAT BERDAN?’ 

 

Beştaş anî ziman ku hefteyek berê Hevşaredarê Amedê Selçûk Mizrakli yê hat girtin li çalakiyê bûye lê niha li Girtîgeha Tîpa D a Amedê tê ragirtin û got: “Selçûk Mizrakli û hevalên me din ne ji ber sûcdar bûn hatin girtin. Tayînkirina qeyûman ne rewa ye. Qeyûm navê windakirin, bêtehamulî û neqebûlkirina îradeya kurdan e. Îtîrafkara ku li ser Selçûk Mizrakli û Kezîban Yilmaz îfade dabû hat berdan. Ev sê sal bû girtî bû. Bersûcek îtîrafkar ku sê sal in bi cezayê girankirî dihat darizandin çima hat berdan? Di beramberî kîjan sozî de wan îfadeyan da.” 

 

Piştî axaftinan Rêveberê Şaxa ÎHD’ê parêzer Hasan Yalçin çîroka windakirina Abdurrahîm Demîr ê di 17’ê tebaxa 1995’an de li ser rêya Qoser û Wêranşarê hat binçavkirin û windakirin xwend. 

 

Piştî axaftinan 5 deqîqe çalakiya rûniştinê li dar xistin. 

 

ÊLIH 

 

Li Êlihê jî Şaxa ÎHD’ê û xizmên windayan di hefteya 465’emîn de li avahiya ÎHD’ê çalakiya heftane ya bi dirûşma “Bila winda bên dîtin û kujer darizandin” li dar xist in. Rêveberên HDP’ê, xizmên windayan û parêzer beşdarî çalakiyê bûn û wêneyên windayan hildan. Endamê MYK’a ÎHD’ê Mehmet Zekî Tanguner daxuyanî da û çîroka windakirina Halît Bora ê di 19’ê cotemha 1995’an de ji gundê Hereg a bi ser navçeya Licê ya Amedê ku li Stenbolê hat binçavkirin û ji wê rojê ve agahî jê nehat girtin xwend. 

  

Piştî axaftina Tanguner çalakiya rûniştinê li dar xistin.