NAVENDA NÛÇEYAN - Sekreterê Giştî yê Partiya Demokrata Pêşverû ya Kurd li Sûriyê (PDPKS) Abdulhemîd Hacî Derwîş koça dawî kir.

 

Komîteya Navendî ya Partiya Demokrata Pêşverû ya Kurd li Sûriyê (PDPKS) ragihand ku Serkreterê Giştî yê Partiya wan Abdulhemîd Hacî Derwîş (89) saet di 02:00'yê berbanga sibeha îro(pêncşemê) 24.10.2019’an de jiyana xwe ji dest daye. Komîteya partiyê têkildarî merasîma cenazeyê Derwîş jî diyar kir ku dê Derwîş di 25'ê Cotmehê saet 10:00’an de li gundê xwe Qurmaniyê yê girêdayî bajarê Dirbêsiyê bê veşartin û ev agahî parvekirin: "Dê karwana oxirkirinê ji pêş Stada 12’ê Adarê ya bajarê Qamişloyê bi rê bikeve. Merasîma sersaxiyê îro li bajarê Qamişlo dest pê bike û heta 3 rojan berdewam bike."

 

Abdulhemîd Hacî Derwîş, di sala 1936'an de li gundê Qurmanî yê navçeya Dirbêsiyê ya kantona Hesekê ya Herêma Cizîrê ji dayik bûbû. Yek ji damezrînerê tevgera siyasî ya kurd a li Sûriyeyê bû. Gelek erkên girîng di partî û rêxistinên siyasî de hilgirtin. Li dawiyê ji bo Sekreterê Giştî yê Partiya Demokratî ya Pêşvero ya Kurd li Sûriyê hatibû hilbijartin. Partiya wî di 25'ê Mijdara 2015'an de ji ENKS'ê vekişiyabû.