MÊRDÎN - Jina Êzidî Mîskîn Pîso Azzam a piştî êrîşa DAIŞ’ê ya li ser Şengalê hat Tirkiyeyê û nêzî 3 salan bi malbata xwe re 3 wargeh guhertin, derbarê tiştên jiyan de wiha got: “Wê rojê ferman bû. Hemû kesan hewl dida malbata xwe xelas bike. Kesekê hay ji kesê tune bû.”
DAIŞ’iyên di Hezîrana 2014’an de bajarê Mûsilê yê Iraqê dagir kirin, di 3’yê Tabaxê de êrîşê bajarê Êzidiyan Şengalê kirin. Jina Êzidî Mîskîn Piso Azzam (62) a ji komkujiya DAIŞ’ê reviya, roja komkujiyê û hatina xwe ya Tirkiyeyê vegot.
‘BI EŞYAYÊN ME GIRTIN BA XWE RE EM KETIN RÊ’
Azzam, diyar kir ku piştî DAIŞ’ê Mûsilê dagir, ji wan re hat gotin ku wê êrîşê Şengalê nekin û wiha axivî: “Lê di şeva 3’yê Tebaxê de me bihîst ku DAIŞ’ê dest bi ketina Şengalê kiriye. Dema me bihîst em li herêma Sîlûnî ya Şengalê bûn. Bi eşyayên me girtin ba xwe re em ketin rê. Em qet rastî DAIŞ’yan nehatin. Me dinava koma dest pêkê ya ji Şengalê derketin de cih digirt. Em nêzî 25 rojan di rê de man. Piştî ku DAIŞ’ê êrîş kir, hemû kes ketin di nava hewldana malbatên xwe xelas bikin de. Êdî kesekê hay ji kesê tune bû. Ya hat serê me ferman bû. Li wê derê gelek mirovên me hatin qetilkirin. Gelek ji wan jî dîl ketin destên DAIŞ’iyan.”
DINAVA 3 SALAN DE 3 WARGER GUHERTIN
Azzam, da zanîn ku piştî êrîşa DAIŞ’ê li wargeheke li Kurdistana Başûr hatibû vekirin bi cih bûn û wiha got: “Dûre em derbasî Tirkiyeyê bûn. Em nêzî 3 salan di wargehan de man. Destpêkê em li wargeha AFAD’ê ya li Nisêbînê hatibû avakirin man, ji wir jî em çûn wargeha ji aliyê şaredariya Amedê ve hatibû avakirin û piştre jî em şandin wargeha li Mîdyadê hatibû avakirin. Em ji fermanê reviyan. Lê ji roja em hatine vir û şûnde jî me rojek xweşî nediye. Karê me tune. Jiyana me di rewşek rezîl de derbas dibe.”
‘MALBATEKE ME HÎNA JÎ DI DESTÊN DAIŞ’Ê DE NE’
Azzam, dest nîşan kir ku 3 xizmên wê di dema êrîşa li ser Şengalê de hatin qetilkirin û wiha bilêv kir: “Hîna jî em agahî ji xizmeke xwe û malbatê wê nagirin. Zarokên me çûn Ewropayê. Em li vê derê man. Me gelekê bêriya ax, mal û cîranên xwe kirin.”
Azzam, bal kişand ser keçên Êzidî yên ji aliyê DAIŞ’iyan ve hatin revandin û wiha dawî li axaftina xwe anî: “DAIŞ’iyan jin û qîzên Êzidiyan revandin û di bazaran de firotin. Em nizanin kê ev ferman ji bo me rewa dît, lê tiştên di wan rojan de qewimîn pir zor û xofdar bûn.”
MA / Bêrîvan Altan