HATAY - Engîn Çomar ê li Girtîgeha Tîpa T a Înkencerûnê tê girtin, diyar kir ku mafê wan ê tenduristiyê tê astengkirin û got: “Gardiyan ji me re dibêjin ‘daxwaznameya em endamê rixistinê bûn, ez poşmanim bidin. Em ê jî we bibin revîrê.’’ Rayedarên girtîgehê bi van helwestên xwe poşmaniyê ferzî me dikin.”
Girtî Engîn Çorman ê 27 salî yê li Girtîgeha Dersimê ji ber ku ferzkirina hejmara nîzamî ya leşkerî qebûl nekir sirgûnê Girtîgeha Tîpa T a Înkenderûn a Hatayê hat kirin, diyar kir ku li vê derê jî binpêkirinên mafên mirovan dewam dikin. Çorman bi rêya parêzerê xwe, binpêkirinên mafên mirovan ji raya giştî parve kir. Çorman ji bo bi dawî kirina zilma li girtîgehê, bang li parazvanên mafên mirovan kir.
GIRTIYÊN NEXWEŞ DERMAN NAKIN
Çorman, da zanîn ku di dema hejmarê de gardiyan dikevin nava hewldanên provokasyonî û wiha got: “Heqaretan li me dikin û hejmara li ser piyan ferzî me dikin. Gardiyan nava rojê ji me re dibêjin; ‘hûn çima lambê pênaxin? Zû rabe zû.” Mudaxileyî fîzîkî dikin. Berî 2 hefteyan, min bertek nîşanî vê yekê da. Ez derxistim korîdorê û ez derp kirim. Çavê min xwînî kirin û dûre enfeksiyonê girt. Ji ber vê derketim revîrê. Bijîjk ez sewqî nexweşxanê kirim. Gardiyan ji hevalên me yên nexweş re dibijin, ‘daxwaznameya em endamê rixistinê bûn, ez poşmanim bidin. Em ê jî we bibin revîrê.’ Çavê min ê rastê hindik ma ye kor bibe. Mafê me yê tenduristiyê ji me digirin. Em di çarçoveya mafên xwe yên bingehîn de serlêdan dikin. Ev mafê me yê xwezayî ye. Em bang li hemû parazvanên mafên mirovan dikin ku li dijî van binpêkirinên mafan ên em dijîn bi hestiyar tevbigerin.”
GIRTIYEKÊ JIYANA XWE JI DEST DA
Di rojên derbas bûyî de, li Girtîgeha Tîpa T a Îskenderûnê ku tim bi binpêkirinên mafên mirovan dikeve rojevê, girtiyê nexweşîna pençeşêrê Mûhsîn Kizilkan di encama îhmalkarî û derengmaniyê de, li nexweşxanê jiyana xwe ji dest da bû. Malbata Kizilkan, diyar kiribû ku Kizilkan ji ber ku hejmara li ser piyan qebûl nekiriye, ji aliyê gardiyenan ve bi awayekê hovane hatibû derpkirin.
MA/Hamdûllah Kesen