Polîsên Midûriyeta Emniyetê ya Edeneyê, ji ber nikaribûye bi pereyan ciwanên kurd bikin sîxur, vê carê bi derbkirin û gefxwarinê sîxurtiyê li ciwanan ferz dikin. Yek ji van ciwana jî Ahmer Can B. yê 17 salî ye. Can B., diyar kir ku polîs tim wî dişopînin. 

 

LI EMNIYETÊ HATIYE DERBKIRIN 

 

Can B., diyar kir ku di 17'ê Hezîranê de hatiye binçavkirin û li ser beyanên şahidên nepen sewqî Dadgeriya Cezayê Sulhê hatiye kirin û dadgeriyê bi şertê hepsa malê ew berdaye. Can B., got: "Li edliyeyê ji ber me kelemçeya ters qebûl neki em li erdê dirêj kirin û bi copan li me dan. Li şaxa zarokan tehde li me kirin. Ev zext û zorî 8 rojan dewam kirin. Kincên me nedidan me û nedihiştin em biçin lawabaoyê jî. Wexta me xwarin dixwar, bi qesda li ber me rûdiniştin û cixare dikişandin. Êvarî klîma nedihatin vekirin û lempeyên zer pêdixistin. Lawabo nedihat paqijkirin." 

 

‘NAVAN BÊJE PERÊ XWE HILGIRE' 

 

Ahmet Can B., ku di nav salekê de 3 caran hatiye binçavkirin got: "Polîs tim bi wesayîtên sivîl li taxa me digerin û hin ciwanan li wesayîtan siwar dikin. Dema min birin gotin 'Em îstixbarat in. Em ê bavê te bikujin. Eger tu alîkariya me bikî, tu yê karibû dibistana xwe jî bixwînin. Em ê xercaneya te jî bidin. Tu kengî bixwazî em ê xercaneya te bidin. Lê eger tu alîkariya me nekî em ê dev ji te bernedin. Tu yê hew karibî malbata xwe bibînî. Tu yê biçî girtîgehê.' Bi vî awayî gef li min xwarin. Gelek ciwan bi van pêkanînan re rû bi rû dimînin. Di meha Gulanê de ji ber şewitandina dîregê MOBESE'yê min û hevalekî min girtin. Li qereqolê emd erb kirin. TEM'ê jî bi zorê nîşaneya 'Ulkuvana' bi min da çêkirin û wêneyê min kişand. Li vir sîxurtî li min ferz kirin. Piştî min qebûl nekir nîvê şevê min li taxeke nebaş danîn." 

 

Can B., diyar kir ku di dema hepsa malê de polîs lê geriyane, lê ji ber bersiv nedaye polîs hatine mala wan û got: "Ewlehiya min tune ye. Çima ez behsa van tiştan dikim. Ez naxwazim bêdeng bimînim. Bila êdî tiştên wilo neqewimin." 

 

MA / Hamdullah Kesen