Tê gotin ku Îran jî hevparê operasyonên Tirkiyeyê yên ku li Herêma Federe ya Kurdistanê dimeşîneye. Tê angaştkirin ku plana operasyonan a Tirkiyeyê ku ji hêla Hikûmeta Navendî ya Iraqê û Rêveberiya Herêma Federe ya Kurdistanê ve hatiye qebûlkirin, biserkeve dê Îran jî bi ser hêzên Partiya Jiyana Azad a Kurdistanê (PJAK) ve biçe. Li gorî agahiyên ku ji herêmê hatin wergirtin, Tirkiye û Îran dê pêşî xetên stratejîk ên derbasbûnê yên di bin kontrola PKK'ê de bigirin û bi serketina planê re dê Îran li dijî PJAK'ê operasyoneke berfireh bide destpêkirin. 

 

QADÊN KU TÊN XWESTIN BÊN KONTROLKIRIN

 

Di çarçoveya plana dijberiya kurdan de tê armanckirin ku qadên Kelaşîn-Xakûrk-Bradost û Qendîlê ji hev bên veqetandin. Di vê çarçoveyê de;

 

* Xeta Metîna û Amediyê ji hev bê veqetandin û kontrolkirin

 

* Xeta Amediyê, Bradost û Barzan ji hev bê veqetandin û kontrolkirin

 

*Xeta Bradost û Mergesorê ji Qendîlê bê veqetandin û kontrolkirin

 

* Bicihirina Yekîneyên Topbaranê ya li Çiyayê Şerîn ku dikeve hemberî Çemço ya Herêma Barzanê temambûna kontrolkirina qadê. 

 

BAŞÛRÊ DERIYÊ SÎNOR Ê HECÎ UMRANÊ DÊ BÊ GIRTIN 

 

Li gorî plana ku tê xwestin ji bilî êrîşên leşkerî di hêla aboriyê de jî herêm ji hev bê veqetandin, tê fikirîn ku bi qasî 10 kîlometreyî başûrê Deriyê Sînor ê Hecî Umran ku Herêma Federa ya Kurdistanê û bajarê Pîranşar ê Rojhilatê Kurdistanê bi hev ve girê dide û xeteke derbasbûnê ya bazirganiyê ya girîng e, bê girtin. Li gorî agahiyên li ber dest, ji bo nirxandina vê mijarê heyeteke leşkerî ya Partiya Demokrata Kurdistanê (PDK) û Yekitiya Niştîmaniya Kurdistanê (YNK) di Deriyê Sînor ê Hecî Umran de derbasî Îranê bûne. 

 

ÎRAN LI HEMBERÎ PJAK'Ê AMADEKARIYAN DIKE

 

Di asta dawîn a planê de jî dê Îran bi operasyoneke berfireh bi ser PJAK'ê de biçe. Tirkiye jî ku dê operasyona Îranê bişopîne, bi operasyonê re di hela leşkerî de bicihbûnê xwe ya ji navçeya Ranya ya Silêmaniyê bigire heta qada Pişderê biceribîne. 

 

MA / Erdogan Altan