WAN - Hakan Tûnç ku cezayê muebetê lê hatiye birîn, ji ber îdareya girtîgehê hejmara serdêran û dema hevdîtinê sînordar kiribû, serî li dadgehê da. Dadgeha Bilind, diyar kir ku ev pêkanîna îdareya girtîgehê li dijî hiqûqê ye. Lê îdareya girtîgehê hîn jî wek xwe tev digere.
Li Girtîgeha Tîpa F a Wanê, Hakan Tûnç ê cezayê muebeta giran lê hatiye birîn, ji bo îdareya girtîgehê pêkanîna sînrodarkirina hejmara serdêran û dema hevdîtinê betal bike, di sala 2017'an de serî li Dadgeriya Înfazê ya Wanê dabû. Tûnç, di serlêdana xwe de diyar kiribû ku di hevdîtinên bi malbatê re ne bi awayekî giştî yeko yeko bi ferdên malbatê re hevdîtinê çêdike û dema vê jî 10 deqe ye. Dadgeriyê, serlêdana Tûnç qebûl kir û destnîşan kir ku divê hevdîtin neyên sînordarkirin. Lê belê Wezareta Dadê serî li Dadgeha Cezayê Giran a 5'an a Wanê da û îtiraz kir. Dadgeha Cezayê Giran a 5'an a Wanê biryara dadgeriyê di cî de dît. Lê belê vê carê jî doz çû Dadgeha Îstinafê ya Erziorimê û dadgeha îstinafê jî biryara dadgeha Wanê pesend kir. Li ser vê dadgeriyê serî li Serdozgeriya Komarê ya Dadgeha Bilind da. Daîreya Ceza ya 1'ê ya Dadgeha Bilnd, di biryara xwe de diyar kir ku tişta girtîgeh dike ne lig or usûlê ye û got ev pêkanîn li dijî hiqûqê ye. Piştî vê biryara dadgehê hikumxwaran serî li îdareyên Girtîgeha Tîpa F a Wanê û Girtîgeha Wanê dan da biryara Dadgeha Bilind pêk bînin. Lê belê îdareya girtîgehê guh neda biryra Dadgeha Bilind û wek xwe tev digere.
Parêzer Ekîn Yeter, destnîşan kir ku ev biryar ji bo girtiyên cezayê muebeta giran li wana hatiye birîn biryareke di wesfê emsalê de ye. Yeter, got: "Niha girtî yeko yeko bi ferdên malbatê re hevdîtinê çêdikin. Mesela girtî 10 deqeyan dayika xwe, 10 deqeyan bavê xwe û 10 deqeyan jî xwişk û birayên xwe dibîne." Yeter, destnîşan kir ku pêkanîna îdareya girtîgehê li dijî hiqûqê ye û divê demildest li gor birayara Dadgeriya Înfazê ya Wanê û Dadgeha Bilind tev bigere.
MA / Mujdat Can