ŞIRNEX – Halît Înan, hevjînê Taybet Înan a li Silopiyayê 7 rojan cenazeye wê li kuçeyê hat hiştin Muduriyeta Polîsan a Silopiyayê derewand û wiha got: “Şeva bûyerê û sibeha wê em gelek caran li 155’an geriyan û me ew agahdar kirin. Hayê hemû cîhanê jê çê bûye, lê çawa dibe yê polisan jê çê nebe."
Muduriyeta Polîsan a Silopiyayê der barê mirina dayika 11 zarokan Taybet Înan (87) ku di dema qedexeya derketina derve ya di 14’ê Kanûna 2015’an de li Silopiyayê hatibû îlankirin de tevî tiyê xwe Yûsûf Înan (53) hatibû kuştin û cenazeye wê 7 rojan li kuçeyê hat haştin, pirsa dozgeriyê bersivand û diyar kir ku 6 roj şûnde hay ji mirina Taybet Înan çê bûne. Hevjînê Taybet Înan û kekê Yûsûf Înan Halît Înan Muduriyeta Polîsan a Silopiyayê derewand û wiha got: “Şeva bûyerê û sibeha wê em gelek caran li 155’an geriyan û me ew agahdar kirin.”
Halît Înan, diyar kir ku dema Taybet Înan xwestiye kuçeyê derbas bike gule li lingê wê ketiye û dema birîndar bûye ew pê re axiviye. Înan ev tişt gotin: “Dema birîndar bû ez pê re axivîm. Nikaribû xwe tev bide. Min xwest wê hilgirim; lê belê dibûm hedefa sekvanan. Ji bo wê ji kolanê bikişînim, min kindir avêt cem wê. Min jê xwest benik bi destê xwe ve girêbide. Heke quweta wê hebûna wê benik bi destê xwe ve girêbidana û min ê ew bikişandana. Lê belê dema nêzî wê dibûm gule bera min didan. Ji ber wan guleyan ji dest û piyên xwe ve birîndar bûm. Paşê dema birayê min Yûsûf Înan ji bo alîkariyê hat bera wî jî dan. Ji ber zêde gule direşandin, me nikaribû bîne. Yûsûf bi birîndarî heta sibehê ma.”
‘ME ALA SPÎ BILIND KIR GULE BERA ME DAN’
Înan got ku piştî bûyerê demildest ew li 155’an geriyaye û wiha domand: “Min ji rayedaran re got hevjîna min û birayê min birîndar in. Me ambulans xwest. Lê neşandin. Me got em dixwazin bi ambulansê biçin cihê bûyerê. Lê dîsa nehatin. Muduriyeta polîsan derpêş dikir ku ew endamên rêxistinê ne. Lê me bi israr got ew sivîl in. Herî dawî rayedarên muduriyeta polîsan gotin ala spî hilgirin û wê derê terk bikin. Me ji şevê dest pê kir em gelek caran geriyan, lê tim bersiveke neyînî didan. Em serê sibehê dîsa geriyan. Me got du cenazeyên me li erdê ne. Lê belê wan digot tevî ala spî derkevin. Dema em tevî ala spî derketin, gule reşandin ser me. Bi zorê em xelas bûn. Em mecbûr man miriyên xwe bihêlin. Çimkî bi awayekî zêde gule direşandin cihê ku em lê bûn.”
‘HAYÊ HEMÛ CÎHANÊ JÊ ÇÊ BÛYE, LÊ YÊ EMNIYETÊ JÊ ÇÊNEBÛYE’
Înan, dest nîşan kir ku piştî bûyerê hin xizmên wan li rayedarên AKP’î geriyane û wiha got: “Hayê hemû cîhanê jê çê bûye, lê belê tenê yê emniyetê jê çênebûye. Ji Meclîsê bigire heta gelek kesan, me ji wan alîkarî xwest. Lê belê, cenazeyê me 7 şev û 7 rojan li erdê ma.” Înan wiha domand: “Min li cihê bûyerê qewanên wek ên doçkayê dîtin. Gelek bûn. Heke emniyet bihatana wê berhev bikiranan. Lê kes nehat cihê bûyerê.”