ÎZMÎR - Şaxa ÎHD’ê ya Îzmîrê, bi armanca balê bikişîne ser rewşa girtiyên nexweş, di çalakiya li dar xist de, bal kişand ser rewşa girtiyê nexweşiya şîzofrenî pê re heyî Yilmaz Çerçel û xwest demildest bê berdan. 

 

Şaxa Komeleya Mafê Mirovan (ÎHD) ya Îzmîrê, bi armanca balê bikişîne ser rewşa girtiyên nexweş her heftê bi daxwaza “Bila girtiyên nexweş bên berdan” çalakiyê li ber Sumerbanka kevin a navçeya Konakê li dar dixe. Şaxa ÎHD’ê di çalakiya vê heftê de pankarta “Girtiyên nexweşîna giran jiyana xwe ji dest didin” vekir û bal kişand ser rewşa girtiyê nexweşiya şîzofrenî pêre heyî Yilmaz Çerçel ê di sala 1993’yan de bi îdîaay “Endamtiya rêxistinê” hat girtin.  

 

Rêvebera Şaxa ÎHD’ê Cemîle Karakaya di çalakiyê de axivî û wiha got: “Yilmaz Çerçel li Girtîgeha Tîpa M a Alaşehîr a Manîsa tê girtin. Rewşa wî pir girane û ne mimkûne ku di girtîgehê de jiyana xwe berdewam bike. Divê Demildest bê berdan û li derve bê derman kirin.”