WAN - Serokwekîlê Meclîsa Şaredariyê Cahît Bozbay, “Riya Hawirdorê ya Wanê” ku AKP di hilbijartina 2011’an de sozê çêkirina wê dabû û hatibû gotin ku ji aliyê şaredariya DBP’î ve tê astengkirin bi bîr xist û wiha got: “Ev saleke şaredariya DBP’î di dest qeyûm de ye, çima hûn niha çê nakin?”
AKP di hilbijartinên giştî yên 2011’an de weadkiribû ku ew ê “Riya Hawirdorê ya Wanê” çê bike û derpêş kiribû ku ji aliyê şaredariya DBP’î ve tê astengkirin. 6 sal in bi qasî serê derziyê jî pêş neketiye. Serokwekîlê Meclîsa Şaredariya Bajarê Mezin a Wanê Cahît Bozbay, bi bîr xist ku ev saleke şaredarî di dest qeyûm de ye û ev pirs kir: “Ji bo çi nayê çêkirin?” Bozbay wiha got: “Berê digotin şaredariyên DBP’î riya hawirdorê asteng dikin. Saleke qeyûm tayînî şaredariyê hatiye kirin, çima rê nayê çêkirin? Kî we asteng dike?”
Bozbay wiha axivî: “Me tim xwestiye ku li Wanê ev rê bê çêkirin. Lê me xwest dema ev rê bê çêkirin, ji bo çêkirina wê li Tirkiyeyê kîjan rêbaz hatibe bikaranîn em jî dixwazin heman rêbazê bi kar bînin. Di projeyê de riya hawirdorê di nav erdê gel re derbas dibe. Me xwest em pereyê erd bidin xwediyê wê. Lê wan xwest bê pere bê çêkirin. Me jî ev yek qebûl nekir. Me xwest bêyî ku gel bê mexdûrkirin bila ev rê bê çêkirin. Me xwest ew rêbaza îstimlaqê ya ku li Behra Reş û Behra Spî tê sepandin bila li Wanê jî bê sepandin. Tenê îtiraza me ev e.”
Bozbay gotinên AKP’ê yên “Şaredariyên DBP’î vê yekê asteng dikin” bi bîr xist û wiha got: “Propagandayeke reş kirin. Ev saleke şaredarî di dest qeyûm de ye. Heke bixwastanan wê çê bikiranan, lê çê nekirin. Ev jî nîşan dide ku şaredariyên DBP’î ne asteng in. Neyta AKP’ê kifş bû. Beriya hemû hilbijartinan ev neyt tê dîtin. Beriya hilbijartinê vana wek malzemeya hilbijartinê bi kar tînin. Lê êdî rastî bi awayekî aşkere li holê ye û gel hûrguliyên wê dîtin. Li hemberî Wanê polîtîkayeke wan a taybet heye. Ev rewş têkildarî nasnameya siyasî ya Wanê ye.”