Piştî 8 mehan şûnde îdianameya der barê xebatkarê Kovara Ozgur Toplûmê Fahrettîn Kiliç, xwendekarê zanîngehê Enver Guler ên di 31’ê Adarê de li Edeneyê hatin girtin û xwendekara zanîngehê Nesrîn Çeçen a di 17 Tîrmehê de hat girtin û Cûma Poyrazê ku bi awayekî negirtî tê darizandin de hat amadekirin. Îdianame ji aliyê Serdozgeriya Komarê ya Edeneyê ve bi tawanbariya “endamtiya rêxistinê hat amadekirin. Piştî îdianame hat qebûlkirin Çeçen û Guler di 2’yê Mijdarê de hatin tehliyekirin, lê belê Kiliç ji ber wesfa sûc û rewşa delîlan nehat tehliyekirin. Wê danişîna ewil a dozê di 26’ê Sibata 2018’an de li Dadgeha Cezayê Giran a 11’emîn a Edeneyê pêk bê. 

 

Di îdianameyê de tê diyarkirin ku her 4 bersûc jî di nav YDG-H û DEM-GENÇ’ê de cih girtine û ji ber tim bi awayekî teknîkî hatine şopandin, hevdîtinên ku pêk anîne der barê rêxistinê de ne. Di îdianameyê de hatiye diyarkirin ku der barê çalakiyeke ku li Taxa Dadaloglûyê hat lidarxistin agahî ji bo DÎHA’yê (ku bi KHK’ê hat girtin) hatine ragihandin û ev yek wek “çalkiyeke rêxistinî” hatiye nirxandin. 

 

Di îdianameyê de wêneyên endamên YPG/YPJ’ê ku Çeçen di hesabê xwe yê medyaya civakî de parve kirine wek “propagandaya rêxistinê” hatine nirxandin. Her wiha dozger şahiya ciwanan ku di 11’ê Gulana 2015’an de li Zanîngeha Çûkûrovayê hat lidraxistin wek “çalakiya rêxistinî” nirxand û wêne û muzîkên kurdî yên di telefona Kiliç de jî wiha nirxand: “Pesnê çalakiyên rêxistinê tê dayîn, teşwîqa ji bo wan tê kirin.” 

 

Di îdianameyê de tê diyarkirin ku dema Kiliç hatiye binçavkirin 280 heb Kovara Ozgur Toplûmê jî li ser hatine dîtin û ji bo vê yekê jî wiha hatiye gotin: “Dema di nav rêxistina terorî de peywira ku ji bo wî hatiye dayîn dikir hat girtin.” Di îdianameyê de ji bo kovaran nehatiye diyarkirin ka qedexe ne an jî der barê wan de biryara girtinê heye yan na. Her wiha cilûbergên gelêrî ku Kiliç di şahiya ciwanan a Zanîngeha Çûkûrovayê de li xwe kiribûn jî wek delîla sûc hatine hesibandin.