Harûn Bayhan ê asîstanê serşêwirmendê serokwezîr Muhsîn Kizilkaye ye, ji ber welatî Recep Akar li Colemêrgê avahiya xwe bi kirê daye DBP'ê, gef li welatî Akar xwarin. Bayhan xwe dispêre meqama lê ye û di hevdîtina xwe ya bi telefonê ya bi Akar re, tim behsa hêza dewletê dike. Akar, ji bo giliyê serî li dozgeriyê da û doza alîkariyê ji DBP'ê kir. Akar, qeydên hevdîtinên telefonê yên bi Bayhan re kirin parve kir. 

 

Beriya vê di navbera malbata Akar û Kizilkaya de ev tişt diqewimin: Salek berê, hevjîna Akar Şukran Kizilkaya Akar dema li defterdariyê wek pispora hesabgêriyê dixebitî, pêşî bi tawanbariya "FETO" û paşê jî bi hinceta "PKK"ê hat îxrackirin. Li ser vê malbatê û hevjîna wî Recep Akar tawanbar kirin. Piştî demekê Mehmet Kizilkaya, apê Şukran Akarê, wek alîgirê qeyûm tayînî Şaredariya Colemêrgê bû jî mudaxilî bûyerê dibe û bi vê re zextên li ser Akar zêde dibin. Bi van nîqaşan re Recep Akar ji hevjîna xwe vediqete. Akar diyar kir ku, ji ber daîreya xwe bi kirê da DBP'ê wek "terorîst" hatiye îlankirin û malbata Kizilkaya tim gefan lê dixwe. Di vê pêvajoyê de di navbera Akar û malbata Kizilkaya û Harûn Bayhan de gelek hevdîtinên telefonan çê dibin. Akar ev hevdîtin tomar kirin û radestî dozgeriyê kir. Beşek ji hevdîtinên telefonan wiha ne: 

 

Harûn Bayhan: Biner biner tu niha li meqama Serokwezîrtiyê digerî, hûn meqamê Sermuşawiriya Serokwezîrtiyê tim tehdît dikin... Tu ji bo rêxistina terorî PKK'ê dixebitî.

 

Recep Akar: Na, na...

 

(Dengekî din)

 

Recep Akar: (…) Niha ez li qereqolê îfadeyê didim...

 

Harûn Bayhan: Biner Recep aqilê xwe bide serê xwe, xwe poşman neke, hişê xwe bide serê xwe, were em dizanin tu çi dikî.

 

Recep Akar: (…) Tu hîn nizanî ka Recep Akar kî ye, çi qasî girêdayî dewleta xwe ye...

 

Harûn Bayhan: Recep heke tu girêdayî dewleta xwe bûna, te avahî nedida HDP'ê...

 

Recep Akar: Tu gefan li min dixwî, tu min wek terorîst tawanbar dikî...

 

Harûn Bayhan: Nexwe tu bêje, kî ew avahî da rêxistina terorî HDP'ê. Ma tu ne xwediyê wê avahiyê yî? 

 

Recep Akar: Her kes dikare bi kirê têkeve xaniyê min. 

 

Harûn Bayhan: Xwediyê wê avahiyê ne tu wî? 

 

Piştî ku Akar li dozgeriyê giliyê wan dike, vê carê Kemal Bayhan, bavê asîstanê Muhsîn Kizilkaya Harûn Bayhan, dikeve dewrê. Hevdîtina navbera Akar û Bayhan jî wisa ye: 

 

Recep Akar: Ji aliyê diozgeriyê ve ewraqeke taybet ji bo min hat dayîn. Ez çûm KOM'ê, li wir ez û polîsekî ketin qirika hev. Nizanim, qey Harûn talîmat daye...

 

Bayhan:  Na na, ma wê tiştek wisa çawa çê bibe...

 

Akar: Apo nexwe wê çaxê rewşeke ku Harûn eleqedar bike tune ye. Li Muhsîn bigere, bila li Walî beg bigere, xeletiyeke çê bûye. Zavê min hatiye girtin, rewş ev e. Ez niha li qereqolê me. 

 

Bayhan: Tu jî îfadeya xwe bi paş ve bikişîne...

 

Recep Akar: Apo min ê niha îfade bidane, lê nexwe ev bi xêrtir bûye...

 

Bayhan: Na na, Muhsîn jî bi Harûn xeyîdiye û gotiye ji bo çi te ev tişt gotine. Niha Muhsîn li min geriya, ji bo xatirê min li Recep bigere... Wê girteka ku te da dozgeriyê bi paş ve bikişîne...

 

AKAR SERÎ LI HDP'Ê DA 

 

Akar, derpêş kir ku malbata Kizilkaya pişta xwe dide dewletê û serî li HDP'ê da, da dengê wî ragihînin. Cîgirê Hevserokatiya Giştî ya HDP'ê Nadîr Yildirim bi Akar re hevdîtin çê kir û ev tişt gotin: "Akar, li Colemêrgê wek esnafekî tê nasîn. Ji ber avahiya xwe bi kirê daye DBP'ê gef lê hatine xwarin. Dibêjin heke tu cih bidî DBP'ê em ê te û malbata te tevde perîşan bikin. Çavkaniya bûyerê xwe dispêre Muhsîn Kizilkaya. Ev malbat niha bi hêza dewletê gef li mal û milkên welatiyan dixwin. Serî li partiya me jî dan. Kizilkayayî li Colemêrgê qeyûm, li Walîtiyê patron, li Enqereyê kesên pêzan in. Em bang dikin, destê xwe ji mirovên me bikişînin."