ÊLIH - Hevserokê Giştî yê HDP'ê Sezaî Temellî bi boneya pîrozbahiya cejnê çû Êlihê û got: "Aştî, bi lihevkirineke civakiyî, bi aştiyeke birûmet, bi muzakereyên demokratîk pêkan e. Guh bidin Birêz Ocalan. 4 salan we guh nedayê, rewşa welat li holê ye."
Hevserokê Giştî yê HDP'ê Sezaî Temellî, bi boneya pîrozbahiya Cejna Remezanê li avahiya HDP'a ÊLIHê cejna gel pîroz kir. Piştî pîrozkirina cejnê Temellî ber bi Şaredariya Êlihê ve meşiya û axivî.
‘ME TECRÎD ŞIKAND, EM Ê FAŞÎZMÊ JÎ BIRÛXÎNIN'
Temellî, bal kişand ser çalakiyên greva birçîbûnê û rojiya mirinê û got: "Leyla Guven di greva birçîbûnê de 200 rojî li ber xwe da. Dengê xwe ragihand tevahiya cîhanê. Bi hezaran girtî li girtîgehan li ber xwe da. Li çar hawirdorên cîhanê çalkgeran li ber xwe da. Û tecrîda mutleq şikandin. Me gotibû 'Em ê tecrîdê bişikînin' û me bi hev re şikand. Niha jî em dibêjin 'em ê faşîzmê birûxînin.' Bawer bikin em bi hev re dikarin faşîzmê jî birûxînin. Bila deynê stuyê me be; em ê vî welatî ji vê ferasta tekparêz xelas bikin. Li vî welatî krîzeke mezin heye. Her diçe welat ber bi felaketeke mezin ve diçe. Xelasiya ji vê rewşê, mezinkirin ûz eximkirina têkoşînê ye. Divê her kes bê cem hevdu, mil bi mil îtifaqa demokrasiyê xurt bike."
‘GUH BIDIN OCALAN'
Temellî, polîtîkayên hikûmetê rexne kirin û got: "Dijminatiya li kurdan tê ferzkirin li Sûriyeyê bi her awayî li holê ye. Halbûkî em doza aştiyê dikin. Hem ji bo Sûriyeyê hem ji bo Tirkiyeyê em aştiyê dixwazin. Aştî ancax bi lihevkirineke civakiyî, bi aştiyeke birûmet û bi pêvajoya muzakereyeke demokratîk pêkan e. Guh bidin Birêz Ocalan. 4 salan we guh nedayê, rewşa welat li holê ye.Heta pirsgirêka kurd neyê çareserkirin, çareserkirina prisgirêkên Tirkiyeyê ne mimkun e. Muxatabê çareserkirinê jî Birêz Ocalan e." Temellî, destnîşan kir ku rûxandina dîwarê di navbera gelan de bi têkoşînê pêkan e û bidawîkirina polîtîkayên şer wê polîtîkayên zilmê jî bi dawî bibin û wê rê li ber gelan bê vekirin.
Temellî, piştî serdana şaredariyê li otelekê bi nûnerên rêxistinên civaka sivîl re rûnişt.