RIHA - Jinên li Gundê Dêrto ya Xalfetiyê di 18'ê Gulanê de hatin binçavkirin û 12 rojan rastî îşkenceyê hatin, îşkenceya li wan hatiye kirin Jina rastî îşkenceyê hat F.A, diyar kir ku polîsan ceryan daye canê wan û bi "tecawizkirinê" gef li wan xwarine.
Li Gundê Dêrto ya Xalfetiyê, di 18'ê Gulanê de pevçûnek rû dabû û piştî pevçûnê gelek kes hatibûn îşkencekirin û ji kesên hatin binçavkirin hin jê jî hatibûn girtin. Jinên bi îdiaya "endamtiya rêxistinê" hatin girtin, 12 rojên îşkenceya li wan hatiye kirin vegotin. Jinan, destnîşan kir ku bi awayekî sîstematîk hatine îşkencekirin û polîsan bi tecawizkirinê gef li wan xwarine. Ji jinên hatin îşkencekirin û hatin girtin G.A. (xwest navê wê neyê aşkerekirin), bilêv kir ku roja bûyerê ne li gund bûye, li Rihayê li mala xizmên xwe bûye lê belê li wir hatiye binçavkirin û kesên li malê hemû li erdê hatine dirêjkirin û hatine derbkirin.
ÇEK SPARTIN SERÊ ZAROKAN
G.A., diyar kir ku di dema avêtina ser malê de ewilî polîsan serê hevjînê wê li dîwar xistine, çek spartine serê keça wê û gef li wan xwarne û gotine "em ê bavê we bikujin" û kurên wê yê mezin û biçûk kelemçekirine û ew derb kirine. G.A., got: "Gorima min K.K. got di hundurê wesayîtê jî li wê û hevjîna wê dane. Paşê me birin TEM'ê. Piştî me anîn TEM'ê min, F.A. û S.A.'yç li wesayîtekê; hevjînê min, K.K. û hevjînê wê jî li wesayîtekê; kurê min M. jî li wesayîteke din siwar kirin û birin nexweşxaneyê. Piştî nexweşxaneyê careke din em anîn TEM'ê. Me daxistin qata binî nezaretxaneyê. Wexta min anîn nezaretxaneyê min xwişka xwe F. dît. Di nav tozê de mabû. Her wiha biraziyê min B.A. jî li wir bû, serçavê wî di nav xwînê de bû. Em û xwişka xwe li nezaretxaneyekê bûn. Ji min re got, hatiye îşkencekirin, ceryan dane cane wê û xeber jê re gotine."
‘MIN Ê TE PERÇE BIKIRANA'
G.A., bilêv kir ku di roja 10'an a binçavkirinê de wê birina qata dudoyan a TEM'ê û got: "Min li qatên jorê di cihekî re birin. Cihekî wek korîdorê bû, tarî bû. Polîsa bi min re porreş, çavê wê rengîn bû. Şaş neyê bîra min navê wê Gulay bû. Çimkî bi vî navî bang li wê dikirin. Em di korîdorê de hinekî çûm. Paşê polîseke jin jê re got bisekine û sekinî. Lê ez çûm. Pir tarî bû. Ditirsiyam. Paşê li odeyê yekî got li paş xwe venegere. Wê kêliyê bi pora min girt û em li mil rastê vegeriyan. Ji ber tarî bû min baş nedît, lê ne şaş bim min xistin odeya ewil. Li odeyê maseyek û sandalyeyek hebû. Li kêlekê jî qoltixeke biçûk û li ser qoltixê jî kirlentek hebû. Li hundur du polîsên zilam û polîseke jin hebû. Ji polîsên zilam yek jê kesê min biribû. Ê li hundur xurt bû, qama wî ne rijê ne kin bû, riya wî tune bû, pora wî normal bû. Eger her du polîsên zilam bibînim ez ê wan nas bikim. Polîsê rûniştî xeber ji min re gotin û bi tecawizkirinê gef li min xwarin. Paşê çeka xwe derxist û got 'rastiyê ji min re bêje.' Min jî got 'ez bi tiştekî nizanim.' Ji paş ve bi pora min girt û min bir û anî. Got 'ez ê ser çavê te li derî bidim perçe perçe bikim. Dua bike qanûn hene an jê min ê li vira te bi kêran perçe perçe bikira.' Paşê polîsê din ê zilam ku esmer bû û çavên wî rengîn bû, ji polîsa jin re got 'wê bibe an jê ez ê wê bikujim.'"
Ji girtiyan F.A. jî (nexwest navê wê bê aşkerekirin), diyar kir ku piştî pevçûnê çen saet şûnde hatiye binçavkirin. F.A., anî ziman ku bi dengê çekan hişyar bûne û piştî pevçûnê du saet şûnde polîsan avêtiye ser mala wan û çawa polîs ketine hundur ji wan re gotine "teslîm bibin" û bêyî ew zanibin ka çi qewimiye ji wan re gotine destê xwe bilind bikin û ew derxistine derve. F.A., destnîşan kir ku çaw aderketine derve polîsekî biq undaxa çekê li pişta hevjînê wê daye û got: "Paşê me hemûyan dirêjî erdê kirin. Em ji saet 2'yan heta 7'an li erdê man. Paşê li hevjînê min û kurê min dan. Wexta min kir qêrîn û got wisa nekin li min jî dan. Tim bi pehîna li serê min didan. Pehînek li guhê min dan û xwîn ji guhê min hat."
F.A., bilêv kir ku paşê wan birine Nexweşxaneya Dewletê ya Bêrecûkê û li cem bijîşkan jî ew derb kirine. F.A., got: "Dema pansûmanê li kurê min didan. Paşê me birin TEM'a Rihayê. Me daxistin qata jêrê. Li qata jêrê her yekî ji me birin quncikekî û berê me dan dîwar. Ji me re gotin xwe nezîvirînin. Bi vîa wayî em saetekî li ser piya berê me li dîwar man. Polîseke jin hat ez birim qata jorê. Li ber odeyekê sekinîm. Yek ji paş ve kîsikek xist serê min û ji paş ve destê min kelemçe kirin."
'GEF XWARINE
F.A., destnîşan kir ku li qata jor wê birine odeyekê û got: "Çawa ketim hundur min li erdê dirêj kirin û bi pehînan li min dan û paşê kincên min ji min kirin. Yekî ji wan ceryan da organa min a cinsî. Ji ber şideta ceryanê hindik mabû ji ser hişê xwe biçim. Paşê ceryan dan serê pêsîrên min. Her wiha ceryan dan mil û lingên min jî. Kesên ceryan didan canê min bi tecawizkirinê gef li min dixwarin. Min jî got min alîkariya kesî nekiriye. Lê îşkence dewam kir. Nizanim çi qasî dewam kir. Paşê min ji odeyê derxistin. Min birin odeyeke wekî ya arşîvê û li wir çavê min vekirin. Polîseke din careke din min daxist jêrê û bir nezaretxaneyê. Li nezaretê G.A., R.K., K.K. û jineke min ew nas nedikir hebû. Di dema binçavan de 2-3 rojan carekê min dibirin heman cihî û ez îşkence dikirim. Tiştên li min kirin li F.A. û G.A. jî kirine."
MA / Erdogan Alayumat