HEWLER - Çalakgerê greva birçîbûnê Nasir Yagiz ku li ser daxwaza Rêberê PKK'ê Abdullah Ocalan di roja 187'a de dawî li çalakiyê anî têkildarî encama çalakiyê û peyama Rêberê PKK'ê Abdullah Ocalan nirxandinên girîng kirin. Yagiz, destnîşan kir ku vê çalakiya wan û peyama Ocalan, hevî, bawerî û biryara gelê Kurd bêtir xurt kir û wiha got: "Vê calakiyê carek din sekna gelê kurd û wateya peyama Ocalan nîşan da. Bawerî û hêviya gelê Kurd bêtir xurt kir. Vê çalakiyê nîşan da ku berxwedan serkeftginê bi xwe re tîne. Ji ber vê yekê xebatê min wê hêj nû dest pê bikin. Ji niha û şûnde ezê ji bo yekîtiya gelê Kurd têbikoşim." 

 

Endamê HDP'ê Nasir Yagiz ku li avahiya HDP'ê ya Hewlerê li diji tecridkirina Rêberê PKK'ê Abdullah Ocalan ketibû greva birçîbûnê û di roja 187'an de li ser banga Rêberê PKK'ê Abdullah Ocalan dawî li çalakiya xwe anî li ser encama çalakiyên greva birçîbûnê û peyama Rêberê PKK'ê Abdullah Ocalan ji Ajansa Mezopotamya (MA) re axivî. Yagiz, anî ziman ku ev serkeftin serkeftina gelê Kurd e û wiha got: "Di roja yekem de Heval Leyla biryara herî xurt da û serkeftina 200 rojan di roja ewil de diyar kir. Bi hestên serkeftinê ev 200 roj peşwazî kir. Vê çalakiyê hêvî û baweriyek pir xurt da gel. Ji ber ku di serî de gelek kesan digot 'Gelê Kurd êdî hişyar nabe. Ev tişta hûn dikin întîhar e. Hûn ê tenê bi birçîbûna xwe bimînin. Lê me di serî de armanca xwe pir zeral got. Me got em vê rêveçûnê êdî qebûl nakin. Parêzeran nikarîbû bi Rêber Ocalan re hevdîtin bike. Me ji xwe re digot 'Bêyî Rêber Ocalan Kurdistanek Azad dibe?' Bersîva wê na bû. Li gel ku parêzeran her hefte serlêdan dikirin jî destûr nedidan. Ji ber vê yekê me digot emê bi çalakiyê vê yekê bişkînin."  

 

'BERXWEDANÊ HER DEM SERKEFTIN ANÎYE' 

 

Yagiz, anî ziman ku çi çara gelê kurd li dijî zilm û zordariyê li ber xwe daye bi ser ketiye û berxwedanê her dem rêya serkeftinê vekiriye û wiha axivî: "Me bi vê berxwedanê berî her tiştî hesta xemzarî, tamsarî û behêvî şikand. Be nîşan da ku berxwedan rê li pêş serekftinê vedike. Bi taybetî piştî hilbijartina 2015'an li ser gelê Kurd qetlîamên mezin derbas bûn. Li ser gelê Kurd êrîşên pir taybet pêş ketin. Ji ber vê yekê gelê Kurd her dem di nava lêgerînekê de bûn. Her kesî ji xwe re digot 'Divê em çi bikin' Ev çalakî bû sedemek. Dayikên me daketin kolanan û li ber xwe dan. Lê ev ne tam serkeftinek ku me tecrid şikandiye. Me terê guvek avêt û me derî vekir. Hêj tam tecrîd nehatiye şikandin. Ev ne encam e jî. Me li ser daxwaza Rêber Apo çalakiyê rawestîn. Ji ber ku me gotiye em fedaiyê Rêber Apo ne. Em fedaiyên vî gelî ne." 

 

'PEYAMA OCALAN JI BO GELÊ KURD Û DOSTÊ KURD TEVAN E' 

 

Nazir Yagiz, bal kişand ser peyama Rêberê PKK'ê Abdullah Ocalan û wiha berdewam kir: "Ev peyama Ocalan a ji 7 xalan pêk tê, ne tenê ji bo şexsekî û çalakgerên di grevê de ye. Di serî de ji bo gelê Kurd, dostên Kurd e. Ji bo mirovên dibêjin ez aştîxwaz, demokrasîxwaz im û ji bo hemû parazvanên mafên mirovan e. Dema ez ji bo xwe jî bigirim dest divê ji bo mirovekî azad ava bikim girîng e. Cîhan tev dizane, bêyî Kurd li Rojhilata Navîn pergalek nikare bê avakirin. Îro hemû dewletên deshilatdar dizanin bêyî siyasedek demokratîk û azadiya 4 perçeyên Kurdistanê çareserî pêş nakeve. Bêyî azadiya Ocalan li Rojhilata Navîn pergalek demokratîk ava nabe. Ev tecrid li ser fikr û bîrdoziya Ocalan tê meşandin. Yê ku vê tecrîdê û vê feraseta dagirkeriyê bişkîne dîsa çalakiyên demokratîk in. Îro hêzên kapîtalîst û serdest dixwazin di nava hêza gel de demokrasiyê winda bikin. Dixwazin di nava civakê de bê ehleqiyê ava bikin. Rêber Apo jî got 'Rêxistina xwe xurt bikin. Armanc û felsefeya xwe xurt bikin. Mafê xwe yê demokratîk biparêzin. Bi vî avayî hûn dikarin dengê xwe bilind bikin." 

 

'BERXWEDANA ZINDANAN DERIYÊ ÎMRALIYÊ VEKIR' 

 

Yagiz, destnîşan kir ku ew vê yekê wekî encam nagirin dest û wiha lê zêde kir: "Daxwaza Rêber Apo ji bo me jiyanê disekinîne. Ne hedê me ye ku em bêjin em çalakiyê bi dawî nakin. Ji bo me ferman e. Vê berxwedana zindanan û derve deriyê Îmraliyê û deriyê çareseriyê vekir. Deriyê demorasiyê, deriyê aştiya nava Rojhilata Navîn vekir. Mînaka Gandî da. Got me rê vekir dest bi meşê bikin. Got rêxistina xwe xurt bikin. Ranewestin. Ne tenê ji bo gelê Kurd, ji bo hemû gelên bindest ev peyam da. Ji bo gelê Tirkiye, gelê Ereb, gelê Laz, gelê Çerkez û hemû gelên din ev peyam da. Nêzî 3 hezar hevalên me bi ruhekî fedaî di çalakiyê de bûn. Li gel tenduristiya wan di xeteriyê de bû jî heta banga Rêber Ocalan çalakiya xwe berdewam kirin. Roja ewil jî me got 'Tu hêz nikare me bide rawestandin. Heta em bi ser nekevin û em encam nestinin tu hêz me nasekinîne. Me got yê vê çalakiyê bide sekinandin Rêber Apo ye. Em sekna Rêber Apo ya aştiyane û çareseriyê ji roja PKK Hatiye avakirin heta niha dizanin. Ji agirbestên yek alî heta niha nas dikin. 

 

'PERGALA KAPÎTALÎZMÊ NASEKINE HÛN JÎ NESEKININ' 

 

Yagiz, da zanin ku Ocalan di hevdîtinên xwe yên 2013'an de ev roj ditibû û hêj wê rojê got nesekinin, amadekariyên xwe bikin û wiha dirêjî da axaftina xwe: "Hêj wê demê got "Nesekinin. Xwe bi rêxistin bikin. Pêş bixin. Pegala Kapîtalîzmê nasekine. Hûn jî nesekinin. Ji gel re got rêxistinên xwe betir xurt bikin. Vê çalakiyê hevî û baweriyek pir mezin da gel. Dema Birêz Ocalan ev peyam şand me ev hevî di gel de dît. Hêvî û baweriyek herî mezin di me de ava kir. Dema hevdîtin dihatin kirin wê demê ne esker û ne jî gerîla jiyana xwe ji dest dida. Ji ber vê yekê ropa Ocalan pir mezin e. Ji ber vê yekê dema dîsa hevdîtin bi Ocalan re çêbû heviyek gelek mezin dîsa ava bû. 

 

PIŞTÎ VÊ PÊVAJOYÊ EM RÛNIŞTINÊ QEBÛL BIKIN JÎ GELÊ ME ÊDÎ QEBÛL NAKE

 

Nasir Yagiz, bal kişand ser bandora hevdîtina bi Ocalan re jî û wiha lê zede kir: "Ji vê saetê û şûnde em êdî rûniştinê qebûl bikin ji gelê me rûniştinê qebûl nake. Ji ber ku dayikên me dît, di rewşa herî qerab de zarokên wan helwesta xwe û biryardayîna xwe nîşan da. Ji ber ve yekê dayikan jî piştgirî dan wan. Dayikên kurd jî bi vê berxwedana xwe nîşan dan ku êdî destûr nadin ku zarokên wan carek din têkevin çalakiye wisa û ew ê li şûna zarokên xwe têkevin nava çalakiyan. Gelê kurd dît ku berxwedan hebe serkeftin ji heye û baweriya wî zêdetir kir. 

 

'GER KU GELÊ KURD BI YEKDESTÎ TEV BIGERE NE DEWLETA TIRK, DEWLETÊ CÎHANÊ JÎ NIKER KURDAN TÊK BIBE'

 

Nasir Yagiz, herî dawî bal kişand ser biryar, rêxistin û yekîtiya gelê kurd û wiha bi dawî kir: "Ev jî nîşan dide ku tu hêz nikare li pêş rêxistinbûna kurd raweste. Dewlet bi tang û topên xwe nikare hêza gelê kurd bişkîne. Emê bi vê berxwedanê rêya xwe jî û rêya gelê tirk jî vekin. Em niha gavek din bi pêşve çûne. Çi dibe bila bibe emê dawî li îktîdara Erdogan bînin. Emê hemû hêzên ku aştî, demokrasî û wekheviye dixwazin li Tirkiye hêj xurttir bikin. Bêtir bi rêxistin bikin. Daxwaza Rêber Ocalan a herî mezin Tirkiyeyek demokratîk û Kurdistanek Azad e. Şoreşgeren Tirkiye jî dibêjin Tirkiyeyek Serbixwe û Kurdistanek Azad. Emê têkoşîna xwe û xebatên xwe xurttir bikin. 

 

Ez di seri de ji ber Heval Leyla ji ber ku ji me re bû çirûsk û ronahî spasiyên xwe yên herî xurt pêşkêşî Heval Leyla û hemû hevalên zindanan dikim. Bejna xwe li ber Heval Leyla û şoreşa wê ditewînim. Bi taybetî 8 hevalên me yên li zindanan xwe veda kirin wan yek bi yek bibîr tînim. Bila gelê me baş zanibe emê bibin şopdarên wan û xeyalên wan zindî bikin. Ez slavên xwe li hevalên Strasbourg, Başûr, Bakur û hemû hevalên berxwedêr dikim. Heta Reber Ocalan azad nebe Tirkiye demokratîk nabe. Xebatên me hêj nû dest pê dikin. Ji niha û şûnde ezê ji bo yekitiya gelê Kurd têbikoşim." 

 

MA / Mehmet Alî Ertaş