MÊRDÎN - Li Qoserê, cezayê 10 hezar û 100 TL ê li bersûc polîs Î.K. ê berî 7 salan di dema şerê di navbera 2 malbatan rû da de, Îbrahîm Kiliç ji patikê ve kuşt, hat birin. Dadgehê cezayê pere yê bersûc Î.K. kir 24 taqsît û di biryara pêwîst de, kuştina Kiliç “li gorî hiqûqê” dît.
Li navçeya Qoser a Mêrdînê, di 20’ê Sibata 2012’an de, ji ber dayîn û standinê, dinava du malbatan de şer derket. Îfadeya Abdulkardîr Karaaslan ê tevlî şer bibû hat girtin û ji bo bê berdan birin Mîdûriyeta Polîsan a Navçeyê. Ji ber vê komek ji malbatên dijber li ber Midûriyeta Polîsan a Navçeyê kom bûn. Polîsan ji bo ku komê belav bike, bombeyên gazê avêtin û gule bera esmanan dan. Di vê navberê de guleya ji çeka polîs Î.K. hat teqandin, li patika mamosteyê bîrkariyê Îbrahîm Kiliç ê 30 salî ket û jiyana xwe ji dest da.
PARASTINA ‘HINEKAN LI DESTÊ MIN XIST Û ÇEK TEQIYA’
Di sala 2015’an de derbarê Î.K. ê polîs de bi sûçdariya “Bi zanebûn kuştinê” doz hat vekirin. Di doza heya sala 2016’an de li 2’yemîn Dadgeha Cezayê Giran a Mêrdînê hat dîtin de, ji bo bersûc polîs Î.K. biryara beraetê hat dayîn. Lê Daîreya Cezayê 1’emîn ê Dadgeha Bilind biryara dadgeha herêmî betal kir.
Di doza ji nûde hat despêkirin de bersûc polîs Î.K., bi van gotinan parastina xwe kir: “Ji bo ku qerebalixtiyê belav bikim min xwest gule berdim. Lê di wê kîliyê de hinekan li destê min xist û çeka min teqiya.” Dozger jî, di mütalaa da de wiha got: “Cih ji cezakirina sûcê avêtine ser bersûc re tuneye.”
CEZA VEGUHERAND PERE
Dadgehê jî, ji ber “Bi zanebûn kuştinê” 2 sal û 6 meh cezayê girtîgehê li bersûc polîs Î.K. birî. Dûre dadgehê, cezayê ku da bû Î.K. daxist salek û 8 mehan. Dadgehê pişt re bal kişand ser paşeroj û bandorên li ser pêşeroja bersûc bike û cezayê wî daxist salek û 4 mehan. Dadgeha ku daxistinên kirin têr nedît, vê carê jî cezayê bersûc Î.K. veguherand cezayê pere yê 10 hezar û 100 TL. Di heman demê de dadgehê, cezayê pere yê 10 hezar û 100 TL ê Î.K. kir 24 taksît.
‘BI REFORMÊ RE DIVÊ MAFÊ JIYANÊ BÊ ESAS GIRTIN’
Parêzerê malbat Kiliç Erdal Kûzû, diyar kir ku bûyerên ku hêzên ewlekeriyê pêk anîne, bi bêcezatiyê encam dibin û ev yek dem dike. Kûzû, da zanîn ku li Tirkiyeyê daraz her tim jiyana sivîlan di rêza duyemîn de digire û wiha got: “Heya ku daraz biryarên wiha bide, li vî welatî dê hîn zêdetir bi vî wayî bên kuştin. Bi van biryaran, polîs bêdudilî dê guleyan bireşînin. Reforma darazê ya di rojên dawî de ket rojevê, divê mafê jiyana mirovan weke esasî bigire dest.”
MA / Ahmet Kanbal