MÛŞ - Hîndekar Turkan Toktaş ku bi KHK’ê hat îxrackirin, tevî hevjînê xwe û hevalên wî yên hatin îxrackirin dikana qeliyê vekirin. Toktaş, got ku li Mûşê di nav perwerdekarên jin de tenê ew hatiye îrackirin û wiha got: “Nexwe min ew nerihet kirine. Heta wek miyekê bijîm, ez nerihetkirina wan tercih dikim.”
Li Mûşê hîndekar Turkan Toktaş ku bi KHK’ê hat îxrackirin, tevî hevjînê xwe Kemal Toktaş û hevalê wî Kemal Sagniç ku hatin îxrackirin dikana qeliyê vekir. Mamosteyê Dîrokê Toktaş, anî ziman ku wî 21 salan mamostetî kiriye û ev sal û nîveke jî hatiye îxrackirin. Toktaş anî ziman ku hîn jî ew nizane ji bo çi hatiye îxrackirin.
Toktaş got ku tenê ne ew, hevjîna wî û birayê wî jî hatine îxrackirin û wiha domand: “Ji heman malbatê em 6 kes hatin îxrackirin. Bi van îxracan dixwazin muxalifan bi birçîbûnê terbiye bikin. Lê li gel vê yekê jî, em tim li ser piyan sekinîn, me serî netewand û dikana qeliyê vekir. Me ev dikan tevî Kemal Sagniç ku ew jî wek me hat îxrackirin vekir. Jixwe beriya îxrackirinê jî min dixwest em dikana qeliyê vebikin.”
'HEMÛ MUXALIF HATIN TASFIYEKIRIN’
Toktaş, anî ziman ku bi îlankirina OHAL’ê re pêvajoyeke cuda dest pê kiriye. Toktaş, dest nîşan kir ku bi vê pêvajoyê re hemû kesên muxalif kirin hedef û yeko yeko wan tasfiye dikin. Toktaş, got ku neyta hikûmetê ne ew e ku kesên tevlî darbeyê bûne ceza bike, bereksê wê darbeyê ji xwe re wek ‘lutfekê’ dît û berê xwe da hemû kesên muxalifê wê ne. Toktaş, diyar kir ku heke Komîsyona OHAL’ê bi qasî serê derziyê jî lêkolîneke huqûqî bike, wê bi hezaran kes vegerin ser karê xwe. Toktaş dest nîşan kir ku heke ji bo avêtina kar sûcek hebe, di heman demê de divê ew sûc bibe sedema darizandina wî/ê mirovî/ê. Toktaş, got ku lê belê heta niha tu kes nehatine darizandin.
LI MÛŞÊ TEKANE MAMOSTEYA JIN A HATIYE ÎXRACKIRIN
Hevjîna Toktaş, Turkan Toktaş ku tekane mamosteya jin e ku li Mûşê hatiye îxrackirin jî dema firsendê dibîne li dikanê alîkariya hevjînê xwe dike. Toktaş wiha axivî: “Heta niha me serî netewand, em ê ji niha û pê ve jî netewînin. Ez tim vî tiştî dibêjim. Mirov dikare her tim pereyan qezenc bike, lê dema mirov ji temenê xwe tawîzê bide, ji xurûra xwe tawîzê bide… rûmet û xurûr careke din nayên û bi dest nakevin.”
Her wiha Toktaş sedema îxrackirina xwe jî wiha vegot: “Wisa dixuyê min ew nerihet kirine. Heta wek miyekê bijîm, ez nerihetkirina wan tercih dikim.”
Toktaş diyar kir ku Hikûmeta AKP’ê ji bo “pergala serokatiyê” ev pêvajo daye destpêkirin û hemû kesên muxalifî xwe tune dike. Toktaş wiha got: “Pêşî bi FETO’yê dan destpêkirin, paşê berê xwe dan kurdan û niha jî berê xwe didin CHP’ê. Lê wisa bawer dikim, dê piştî CHP’ê dor bê MHP’ê. Em hîn jî nizanin em bi çi tên tawanbarkirin.”