NAVENDA NÛÇEYAN - QSD’ê di operasyonên di demên cuda pêk anîn de, bi hezaran Êzidî, ji destên DAÎŞ’ê rizgar kirin û hîna jî aqûbeta 2 hezar û 966 Êzidiyan nayê zanîn. 

 

Hêzên Suriyeya Demokratîk (QSD) di operasyonên di demên cuda pêk anîn de, bi hezaran Êzidî, ji destên DAÎŞ’ê rizgar kirin û hîna jî aqûbeta 2 hezar û 966 Êzidiyan nayê zanîn.

 

Nifûsa Şengalê berî êrîşa DAIŞ’ê derdora 420 hezaran bû. DAIŞ’ê, di 2’yê Tebaxa 2014’an de êrîşî Şengalê kir. Di êrîşê de bi hezaran Şengalî hatin qetilkirin û 6 hezar Êzidî ji aliyê DAIŞ’yan ve hatin revandin. Di êrîşên dewam kirin de, jiyana nêzî 300 hezar Êzidiyan dibin rîsk û gefek mezin debû.   

 

360 HEZAR ÊZIDIYAN KOÇ KIRIN

 

Bi zêdebûna êrîşan re, hêzên YPG û YPJ’ê bi hewara Êziyan ve çûn û korîdorek dinavbera Çiyayê Şengal û Rojava de vekirin. Li gorî agahiyên rayedaran, nêzî 360 hezar Êzidî di vê korîdorê re gehiştin cihên bi ewle. Di heman demê de, Rêveberiya Xweser a Demokratîk ku dibin êrîşên DAIŞ’ê de bû, mîna Kampa Newrozê li gelek cihan kamp vekirin û nêzî 125 hezar Êzidî liv an kampan bi cih kirin. Dîsan bi hezaran Êzidî koçî gund û navendên Tirbespiyê, Amûdê, Serêkaniyê û Hesekê kirin û gel malbatên xwe yên li van bajaran diyan bi cih bûn. 

 

HEZAR Û 293 ÊZIDÎ HATIN QETILKIRIN 

 

Di roja ewil a êrîşa DAIŞ’ê ya li ser Şengalê de, hezar û 293 Êzidî hatin qetilirin û di gorên komî de hatin definkirin. Hêzên HPG û YBŞ’ê piştî axa Şengalê ji çeteyên DAIŞ’ê rizgar kirin, ev gorên komî yek bi yek dîtin. Li gorî agahiyên rêveberiya Şengalê dayîn, li herêmê 80 gorên komî hatin dîtin. Dîsan 3 hezar û 548 jin, 2 hezar û 869 zilam bi giştî 6 hezar û 417 Êzidî ji aliyê DAIŞ’iyan ve hatin revandin.

 

 

Di dema êrîşa DAIŞ’ê ya li dijî herêmê de 2 hezar û 561 zarokan dayik û bavên xwe winda kirin. Li gorî agahiyên rayedaran hezar û 759 zarok bavên xwe, 407 zarokan dayikên û 395 zarokan jî dayik û bavên xwe winda kirin. 

 

3 HEZAR Û 451 ÊZIDÎ HATIN RIZGARKIRIN 

 

Di operasyonên hêzên YPG-YPJ û QSD’ê de hezar û 178 jin, 337 zilam, hezar zarok 10 jê wan keç û 926 zarokên lawik bi giştî 3 hezar û 451 Êzîdî ji destên DAIŞ’ê hatin rizgarkirin. Lê hîna jî jî aqûbeta 2 hezar û 966 Êzidiyan nayê zanîn.

 

Mala Ezidiyan a Herêma Cizîrê, heya niha 491 Êzîdiyên ji destên DAIŞ’ê hatin rizgarkirin, bi awayekê fermî, teslîmî Meclîsa Rêveberiya Xweser a Şengalê kirin. 

 

Dîsan Êzidiyên ji aliyên hêzên YPG-YPJ û QSD’ê vê di demên cuda de hatin azadkirin, teslîmî rêveberiya Şengalê kirine.