Ji Cejna Remezanê re tenê çend roj man. Lê belê wek berê êdî li kuçe û kolanên Wanê liv û tevger tune ye. Berê wexta çend roj ji cejnê re bimana kuçe û kolan ji mirovan xalî nedibûn. Lê îsal xwişkî kes tune ye. Esnafên Wanê, bilêv kirin ku ji ber krîza aborî kes di cejnê de jî tiştekî nakire û gotin xwezî bi cejnên berê. 

 

KES ŞEKIR JÎ NAKIRE 

 

Xwediyê marketê Selamî Yeşîlbaş, diyar kir ku ji cejnê re hefteyek maye lê rewşa piyaseyê ne tu rewş e û kes ji bo cejnê tiştekî nakire. Yeşîlbaş, got: "Êdî kes şekir jî nakire. Wexta dikirin jî serê kîloyê em lîreyekê jî qezenc nakin. Îsal rewşa piyaseyê pir xirab e. Welatî diçin ji esnafên mezin bi karta krediyê alvêrê dikin. Lê wexta tên cem me jî bi deyn dikirin. Derdorên xizan tên cem me, lê bi wan re jî pere tune ye. Yanî tu heyecan û meyecana cejnê tune ye. Berê hefteyek ji cejnê re bimana me nêviyê malê xwe difirot, lê îsal me hindik kirî dîsa jî naçe. Piraniya mirovan bi meaşê kêmtirîn dixebitin û deynê bankeyan li wan e. Mirov hay jê tune ne lê rewş ber bi xelayeke mezin ve diçe. Eger li Wanê fabrîka hebûna wê mirov bixebitiyana, lê rê li ber vê jî digirin." 

 

Xwediyê mexazeya kincan Îbrahîm Îsaoglû jî, got: "Berê ji ber kar pir bû me firsend nedidît xwarinê jî bixwin. Me nikaribû ji dikanê derkeve. Lê niha kar tune ye, em berî kêça didin. Ji ber krîza aborî kinc ji 40-50 ji sedî biha bûn. Berê me taximek ji tomerîfiroşan bi 150 lîreyî dikirî niha em bi 230 lîreyî dikirin. Ji ber vê kes nikare bikire. Em bi eranî bidin dixisirin, em nefiroşin em dîsa dixisirin. Êdî em jî nizanin em ê çi bikin." 

 

'HETA AKP HEBE WÊ KRÎZ JÎ HEBE' 

 

Omer Aslan ku zebze û fêkiyan difiroşe, diyar kir ku mirov tenê li fiyetan dipirsin, alvêrê nakin. Aslan, destnîşan kir ku heta AKP hebe wê krîz jî hebe û her diçe kûrtir dibe.