Li ser axên weke Şoreşa Rojava dest pê kir û niha weke Bakur û Rojhilatê Suriyeyê mezin dibe, mîna  her qadê, di qada çand û hunerê de jî xebat tên kirin.

 

Li Rojava ya ku weke şoreşa destpêkan tê zanîn, jinên ku rol û ristek girînge dane ser milên xwe, hemû qadên jiyanê kêlî bi kêlî dihûnin. Di qada şanoyê ya hunerê de ku civak xwe de îfade dike, di sala 2018’an de yekemîn koma şanoya jinan hat avakirin. Navê koma ku dibin banê Kevana Zêrîn de xebatên xwe bi rêve dibe, “Teatra Sarya Baran”e. 5 endamên komê hene û heya  niha şanoyên “Jina Bi Tenê”, “Biziya Baxçe” û gelek listikên jinan pêş kêş kirine. 

 

TEATRA SARYA BARAN

 

Yek ji endamên koma şanoyê Barae Hesen, derbarê xebatên xwe ji Ajansa Mezopotamya (MA) re axivî. Hesen, diyar kir ku armanca wan ew ku li Rojava şanoya jinan pêş bixin û wiha got: “Jin hewl didin di her qadê de xwe bi rêxistin bikin. Weke qadên leşkerî, siyasî, dîplamatîk û bîrdozî, qada çand û hunerê jî xwe birêxistin kiriye. Avakirina koma şanoyê ya binavê Teatra Sarya Baran gava yekemîne.” 

 

ŞANOYEK ÇAWAN

 

Hesen, da zanîn ku şano neynika civakê ye û wiha bi lêv kir: “Pirsgirêkên ku civak dijî, em bi awayekê azad dikarin li ser dikê pêşkêşî gel bikin. Rêbaza me ya ku em pirsgirêkên tên jiyîn îfade dikin heye. Bi awayekê em rexneyên xwe tînin ziman. Li ser dikên xwe em li dijî desthilatdariya li ser jinê tê jiyîn derdikevin. Em jiyana zilam û jiyana civakî ya li dijî jinan pêşkêş dikin. Em niha dinava şoreşê dene. Em şoreşên dîrokî jî vedibêjin û rola jinê ya dinava şoreşande dinirxînin.”  

 

 SENARYOYÊN AÎDÊ JINAN 

 

Hesen, dest nîşan kir ku ji bo wan tişta sereke senaryoyên aîdê jinane û wiha domand: “Lîstikên ku ji aliyê jinan ve  hatine nivîsandin, dîsa ji aliyê wan ve hatine pêşandan ji bo me girîngin. Di vê çarçoveyê de, emê xebatên weke atolye birêve bibin. Dema ku em li gelek şanoyên cîhanê mêze dikin, hemû senaryo aîdê zilamene. Lê lîstikvanên wan jî jinin. Bi taybetî di vî warî de me şanoyên aîdê jinane lêkolîn dikin. Bi vî awayî em jî xwe pêş dixin. Di demên pêş de emê gavên mezintir bavêjin.”

 

Hesen, da zanîn ku şano tenê ji bo salonan nehatene çêkirin û wiha got: “Di roja me ya îro de şano hepsî salonan hatine kirin. Divê gel û şano bên gel hev. Ji bo ku ev pêk were, divê  em xwe ji salonan xelas bikin. Cihê şanoyê dinava jiyanê deye. Ger em bikevin kolanan, emê karibin nêzî gel bibin. Ne gel divê em herin gel, gel. Me xwe bigihînin kolan, cad û gundan, fikir û ramanên xwe bi gel re parve bikin. Ji ber vê emê şanoyê weke şoreşê, li kolan û koçeyan bigirînin.” 

 

‘GELEK ÇÎROVÊN ME HENE’ 

 

Hesen, di dawiya axaftina xwe de wiha got: “Li Rojava, di şerê hat jiyîn de gelek mînakên berxwedanê hene. Dîsan gelek çîrokên ku em bikin senaryo û dûre bilîzin hene. Ji ber vê xebata me ya atolye dewam dike. Em hê nû ne. Di serê rê dene. Ev şoreş aîdê me ye. Li ser vê axê dijî. Ji ber vê emê li ser vê axê senaryoyên xwe amade bikin û pêşkêş bikin. Em dixwazin xwe bigihînin gel cihan. Divê huner bê belavkirin. Ji ber vê lazime ku sînorê li derdora me hatine avakirin bên rakirin.”

 

 

MA / Nazim Daştan