Parlamenterê berê û Serokê Rûmetê yê Komeleya Mafê Mirovan ( ÎHD) Akin Bîrdal çalakiya greva birçîbûn û rojiya mirinê ku li ser daxwaza Rêberê PKK'ê Abdullah Ocalan bi dawî bû nirxand û diyar kir ku mîsyoneke dirokî li Leyla Guven hatiye barkirin. 

 

'LEYLA GUVEN BAL KIŞAND SER NEÇARESERBÛNA PIRSGIRÊKA KURD'

 

Birdal destnîşan kir ku bidawîbûna çalakiya greva birçîbûn û rojiya mirinê ya li ser daxwaza Ocalan dilxweşker e û wiha got: "Serkeftina mafê jiyan û lêgerîna têkoşîna maf e. Biryardarbûna Leyla Guven, dayikên Laçik Spî û girtiyên li zîndanan berxwedanê anî vê astê. Weke Guven jî di serî de diyar kir divê tecrîd bi dawî bibe. Ocalan jî weke girtiyên din mafê xwe bi kar bîne û bi parêzerên xwe rehevdîtin pêk bîne. Leyla Guven bi berxwedana xwe ya 200 rojî peyamên girîng da. Bal kişand ser neçareserbûna pirsgirêka kurd, şert û mercên giran ên girtîgehan û nebûna mafê mirovan, dûrbûna kontrolkirina navneteweyî. Her wiha îşaret bi pirsgirêka aştiyê kir û diyar kir ku divê heta heta aştî bidome"

 

'DIVÊ PEYAMA HÊZÊN AŞTIYÊ BIGIHÎJE ARMANCA XWE'

 

Bîrdal da zanîn ku divê hêzên aştî û demokrasiyê peyamên hatin dayîn bigihînin armanca wan û wiha pê de çû: "Lewra pirsgirêka kurd pirsgirêkeke îro nîne. Heke neyê çareserkirin pirsgirêka herî giran a duh û dê ya sibê be. Daxwaza aştî û demokrasiyê hevpar bibe ev pirsgirêk dikare çareser bibe. Êdî divê van êşan bi dawî bibin, tiştên hatine jiyîn dubare nebin. Divê heviya herkesî ji paşerojê hebe. Divê peyamên dayikan li qadan da baş bê xwendin. Divê li dijî zext û pêkutiyên li hemberî dayikan lêpirsîn bê vekirin. Pêvajoya çalakiya greva birçîbûnê pêvajoyeke gelek giran bû. Hewldanên me bê bersiv man. Lê dawiyê de Leyla Guven û berxwedêran qezenc kir. Ez vê berxwedana wan silav dikim."

 

'DIVÊ ENQERE PEYAMAN BAŞ BXWÎNE'

 

Bîrdal bi bîr xist ku nîqaşkirina lihevkirina civakî, muzakereyên demokratîk û aştiya bi rûmet mijarên herî bingehîn ên Tirkiyeyê ne û axaftina xwe wiha bi dawî kir: "Divê Enqere vê yekê baş bixwîne. Aştiya civakê ^dî nikare paşde bê xistin. Divê pêkanîna civaka aştiyane û demokratîk berpirsyariya herkesî be. Meclis di vê mijarê de dikare bê aktîfkirin û rûpelek nû bê vekirin. Berovajiyê vê yekê neçareserbûna vê pirsgirêk ji bo herkesî dibe sedema cihêkariyê û xîzaniyê." 

 

MA / Nimet Ölmez