RIHA - Jinên li Rihayê hatin binçavkirin û rastî îşkenceyê hatin îşkenceya li dijî xwe vegotin. Rûken Denîz a di bin çavan de rastî îşkenceyê hat wiha got: "Polîsan got 'Tesîrê lê nake, em 200 voltî bidinê.' Saetekê ceryan dan min." Rabîa Alakûş jî got: "Bijîşkan nexwest qîrîna me bibihîsin, rapor nedan me."
Li Taxa Dêrto ya Xelfetî ya Rihayê, di 18'ê Gulanê de pevçûnek çêbû. Piştî pevçûnê 51 kes hatibûn binçavkirin. Ji kesên hatin binçavkirin 3 jê zarok 22 kes hatin berdan û 29 kes hîn jî di bin çavan de ne. Kesên hatin berdan behsa îşkenceya li wan hatiye kirin kirin. Ji kesên hatin berdan Rûken Denîz, tiştên li qereqola cendirmeyan û Midûriyeta Emniyetê ya Rihayê hatin serê wan yeko yeko ji Ajansa Mezopotamyayê (MA) re vegot.
BOMBEYA GAZÊ AVÊTIN
Denîz, anî ziman ku saet di 05:00'an de avêtine ser mala wê û hemû ferdên malbata wan hatine binçavkirin. Denîz, diyar kir ku destê wê ji paş ve hatiye kelemçekirin û got: "Li malê odeyek hebû. Li odeyê qaseyek me hebû. Di wê qaseyê de zînetê me hebûn. Ji min re gotin 'mifetê bîne, we di vira de çek veşartine.' Min jî got, tiştekî wisa tune. Li wir yekî ji wan li min da. Min ji wan re got bisekin, bi vî awayî bis er min de neyên, min got ez derî vekim. Derî vebû û bombeya gazî avêtin hundur. Gaz tesîr li min jî kir. Xaniyê me rûxandin."
ÎŞKENCE, ZILM...
Denîz, bilêv kir ku pêşî wan birine mala apê wê Saît û paşê birine qereqolê û got: "Nehiştin birayê min gomlekê xwe jî li xwe bike. Lê dan, debr kirin. Min, diya min û du birayên min berdan. Îşkence û zilm li me kirin. Tu tişt neman ji me re negotin. Îşkencexane bû, em pir îşkence kirin. Min serdevkî dirêj kirin, pêl min kirin. Paşê yekî ji wan bi qayîşê li lingên min da. Destên min ji paş ve girêdayîbûn, bi vî awayî ez hilawistim. Ji me re gotin 'We terorîst anîne mala xwe.' Min jî got, tiştekî wisa çênebûye Ke snehatiye mala me."
ÎŞKENCEYA BI CERYANÊ
Denîz, got: "Destên min girêdan û kîsekî reş xistins erê min. Çavê min girêdan. Lingên min girêdan û min tawan ve daliqandin. Paşê min birin cihekî din. Li wir ceryan dan canê min. Ji bo min digotin 'Em ceryanê didinê lê qet tesîr lê nake. Bûye wek berazan.' Ceryan didan milên min. Pêşî ceryaneke kêm dan. Paşê gotin 'Tesîrê lê nake, em 200 voltî bidinê.' Nêzî saetekê ceryan dan canê min. Ji malbata me 7 kes binçav kirin. Apê miN Saît, zarokên wî KAdîr, Abdûllah, Mehmet, Mûstafa û Guley Çîftçî û ez. Niha apê min û kurê wî Abdûllah û Kadîr di bin çavan de ne. Ji me 5 heb jê jin bûn. Jineke din jî hebû, ji gundê jêrê bû. Îşkence lê jî kirin. Ceryan dan her derê wê jinikê."
Rabîa Alakûş ku ji gundê Taxa Dêrto ye û hat binçavkirin, diyar kir ku saet di 02:30'yî de avêtine ser mala wan û got: "Dengê çekan dihat. Me jî nizanibû çi diqewime. Paşê ji me re gotin ' Dakevin jêrê, an jê em ê bera we bidin.' Ji tirsa em jî daketin jêrê. Em serdevkî dirêjîe rdê kirin. Li hewşê em hemû dirêjî erdê kirin. Li hewşê pir li bavê min û kekê min dan. Li qereqolê jî dayika min derb kirin. Îşkence li Şaxa TEM'ê ya Rihayê jî dewam kir. Wexta em birin heqaret li me kirin. dayika min îşkence kiribûn, diya min nikaribû li ser piştê xwe dirêj bike. Min li pişta diya xwe nerî, şûna qayîşan lê hebû. Diya min, jinbira min û hin jinên din hebûn. Çavê wan digirtin û dibirin cihê lêpirsînê. Ji wan dipirsîn 'Kî hatiye mala we.'"
BIJÎŞKAN QÎRÎNA ME NEBIHÎST
Alakûş, anî ziman ku ji malbata wan Zekî Alakûş,, diya wê Xezal Alakûş, kekê wê Mehmet Alakûş û jinbira wê Guley Alakûş û mêvanê wan Celal Ercan hatine binçavkirin û got: "Ji malbatê tenê min berdan, ên din hîn jî di bin çavan de ne. Qîrîn ji birayê min diçû, di navbera me de perde hebû. Pir îşkence li kekê min kirin. Dixwestin biçin lavaboyê, lê nedihiştin. Bijîşkan hemûyan şûna derban dîtin, lê tiştek nekirin. Nedihiştin em li nav çavên hev binerin. Li nexweşxaneyê qîrîn ji birê min diçû, dengê wî dihat min. Lê bijîşk mudaxile nedikir. Bijîşkan rapor neda me. Wexta em birin cem bijîşk ji paş ve destê me kelemçekirî bûn."
MA / Erdogan Alayumat - Bariş Polat