XARPÊT – Nûçegihanê dîhaber’ê Mehmet Guleş ê ku ji ber nûçeyên çêkiribû cezayê 9 sal û 4 meh ê girtîgehê lê hat birîn, ji ber êşa diranê xwe cara ewil sewqî nexweşxaneyê hat kirin. Ji ber bijîşk muayeneya kelepçekirî li ser Guleş ferz kir, Guleş nehat dermankirin.
Nûçegihanê dîhaber’ê Mehmet Guleş di 6’ê kanûna 2016’an de li Xarpêtê hatibû binçavkirin û rojek şûn ve hatibû girtin. Guleş ji ber nûçeyên çêkiribû hat girtin. Di 3’ê gulana 2017’an de doza ewil a Guleş li Dadgeha Cezayê Giran a 3’yemîn a Xarpêtê hat dîtin û 9 sal û 4 meh û 15 roj cezayê girtîgehê lê hat birîn. Biryara berdewamiya girtina wî hatibû dayîn. Guleş di nameya şand de ragihand ku ji ber êşa diran ew sewqî nexweşxaneyê kirin û bi hinceta kelepçekirinê spartine wî nehatiye dermankirin û paşve birine girtîgehê
ÎTÎRAZ KIR LÊ…
Guleş da zanîn ku ji ber êşa diranên xwe 2 caran wî sewqî nexweşxaneyê kirine û got: “Her du caran jî ez bi muameleya spartina kelepçekirinê re rû bi rû mam. Revîra girtîgehê min sewqî Nexweşxaneya Tenduristiya Diran û Dev kir. Li nexweşxaneyê bêyî ku bijîşk kelepçeya min derbixe xwest muayene bike. Min jî xwest kelepçeyên min derbixin. Lê bijîşk israr kir ku ew ê min dest kelepçekirî muayene bike. Li gel min got ku divê hûn min bê kelepçe muayene bikin jî nekirin. Min der barê bijîşk de serlêdana sûc kir. Pişt3i 3 mehan bersiv dan daxwaznameya min. Di bersivdayînê de hat gotin ku pêdivî bi lêpirsînê tune ye. Hincet jî wek ‘êşek giran nîne” dan nîşandan. Biryar bi vî awayî dan.”
CARA DUYEM NEHAT DERMANKIRIN
Guleş destnîşan kir ku cara duyemîn li gel di 10’ê tebaxê de sewqa wî ya nexweşxaneyê derket û di 26’ê cotmehê de wî birine nexweşxaneyê û wiha got: “Ez bi heman rewşê re rû bi rû mam. Bêyî ku ez muayene bibim min paş ve anîn. Vê carê jî min serlêdana sûc kir. Lê…”
DI ROJA AZADIYA ÇAPEMENIYA CÎHANÊ DE CEZA DABÛNÊ
Li Guleş di Roja Azadiya Çapameniyê ya Cîhanê ku wek roja 3’ê gulanê hatiye qebûlkirin ceza lê hat birîn. Guleş bi hinceta nûçe çêkirine, di tora civakî de nûçe parve kirine û têlefona wî hatiye guhdarkirin hatibû girtin. Bi îdiaya “Endamtiya rêxistinê” 6 sal û 3 meh û bi îdiaya “Propaganda rêxistinê” jî 3 sal û mehek û 15 roj bi tevahî 9 sal, 4 meh û 15 roj ceza lê hatibû birîn. Parêzerê Guleş ji bo temyîzê serî li Dadgeha Îstînafê ya Herêma Dîlokê dabû. Lê heta niha hêj der barê temyîzê de biryar nehatiye dayîn.