ŞIRNEX – Li Şirnex, Nisêbîn, Cizîr û Geverê piştî qedexeyan li taxan bi hezaran mal hatin xerakirin û li şûna avahiyên welatiyan xaniyên TOKÎ’yê ava dikin. Li cihê xaniyên TOKÎ'ê di salê de 26 cenaze hatin dîtin. Tê texmînkirin ku hêj cenaze di nava kavilan de hene.
Di navbera salên 2015 û 2016’an de li Şirnex, Nisêbîn, Cizîr û Geverê “qedexeyên derketina kolanan” hatibûn îlankirin. Piştî qedexeyê li van 4 navendan li taxan bi hezaran mal hatibûn hilweşandin û li şûna van avahiyan çêkirina xaniyên TOKÎ’yê didome. Li taxên van navendan li gel çêkirina konutan cenazeyên tê diyarkirin ku aîdî endamên YPS’ê ne jî di bin kavilan de derdikevin. Tê texmînkirin ku hêj di bin van kavilan de cenaze hene.
Li cihê konut tên çêkirin heta niha 26 cenaze hatin dîtin. Hin cenazeyan şandin saziyên tibên edlî yên bajarên cuda û hin cenaze jî li goristanên bêkesan ên van bajaran hatin definkirin.
CENAZEYÊN NEHATINE DERXISTIN HENE
Li van cihên konut lê tên çêkirin bêhnek giran bilind belav dibe û îhtîmala hêj cenaze hene bi hêz dike. Her wiha li Cizîrê di dema qedexeyê de 9 kesên ku li benda ambulansê bûn û ku hatibûn kuştin hêj cenazeyên wan nehatine dîtin. Parêzeran ji bo dîtina van cenazeyan serî li cihên pêwendîdar dabûn lê heta niha bersiva serlêdana parêzeran nehatiye dayîn.
Di dema kolandina ji bo konutan de dîrok û cihê 26 cenaze lê hatin dîtin wiha ye:
* Di 8’ê cotmeha 2016’an de li taxa Dîcle ya Nisêbîna Mêrdînê di baxçeyê malekî de 3 cenazeyê veşartî hatin derxistin.
* Di 20’ê cotmeha 2016’an de li taxa Firatê ya navçeya Nisêbînê 2 cenaze hatin derxistin.
* Di 17’ê kanûna 2016’an de li taxa Yenîşehîrê ya Nisêbînê cenazeyek hat dîtin.
* Di 16’ê çileya 2017’an de li taxa Firatê ya Nisêbînê di dema xebata hafriyatê de cenazeyek hat dîtin.
* Di 3’ê gulana 2017’an de Miduriyeta Polîsan a Mêrdînê daxuyandibû ku li Nisêbînê 2 cenazeyên li betaniyeyê pêçayî hatine dîtin.
* Di 1’ê hezîrana 2017’an de li qada TOKÎ ya Nisêbînê cenazeyek hat dîtin.
* Di 7’ê hezîrana 2017’an de li herêma jêrzemînên bi dehan mirov hatin kuştin a navçeya Cizîrê ya Şirnexê cenazeyek hat dîtin.
* Di 10’ê hezîrana 2017’an de 2 cenazeyên ji taxa Yafes a Cizîrê hatin derxistin li Goristana Bêkesan a taxê hatin definkirin.
* Di 24’ê tîrmeha 2017”an de li TOKÎ’yên taxa Firata Nisêbînê cenazeyek hat dîtin.
* Di 21’ê îlona 2017’an de li qada înşata TOKÎ yên li Nisêbînê cenazeyek hat dîtin. Dîsa di meha îlonê de 2 cenazeyê nasnameya wan ne diyar hatin derxistin.
* Di 2’ê cotmeha 2017’an de li taxa Firata Nisêbînê cenazeyek di nav kavilan de ku veşartî bû hat dîtin.
* Di 16’ê cotmeha 2017’an li qada TOKÎ ya li taxa Cumhuriyeta Şirnexê tên çêkirin cenazeyek hat dîtin.
* Di 14’ê mijdara 2017’an de li qada TOKÎ yên Şirnexê ku tên çêkirin 2 cenazeyên li betaniyeyê pêçayî hatin dîtin.
* Li navçeya Gevera Colemêrgê jî di nav salek dawî de li taxên hilweşandin pêk hatin heta niha 5 cenaze hatin derxistin.