NAVENDA NÛÇEYAN - Rêxistina HDP'ê li Agirî, Wan, Colemêrg, Riha, Êlih, Amed û Çewlikê bi armanca balê bikişînin ser tecridkirina Rêberê PKK'ê Abdullah Ocalan û piştgiriyê bidin çalakiya greva birçîbûnê ya li dijî tecrîdê bi girseyî daxuyanî dan û xwestin tecrîdê rakin. Parlamenter û rêveberên HDP'ê diyar kirin ku tecrîd her roj mirin e û xwestin bi lez tecrîd bi dawî bibe.
Rêxistina HDP'ê ya Agirî, Wan, Colemêrg, Êlih, Çewlik, Riha û Amedê bi armanca tecrîd bi dawî bibe û êdî mirov jiyana xwe ji dest nedin li avahiyên HDP'ê û buroyên hilbijartinê daxuyaniyên girseyî dan.
WAN
Rêxistina HDP'ê ya Wanê bi armanca balê bikişînin ser armanc û daxwazên çalakgerên li girtigehan daxuyanî dan. Rêveberên HDP'ê daxuyani li ber avahiya HDP'ê ya Bajar dan. Parlamentera HDP'ê ya Wanê Muazzez Orhan, Hevserok û rêveberên HDP'ê yên Wanê, Nûnerên KCD û TJA jî tev li daxuyaniyê bûn. Li ser navê girse Parlamentera HDP'ê ya Wanê Muazzez Orhan daxuyanî da û wiha got: "Girtiyên siyasî Zulkuf Gezen Ugur Şakar û Ayten Beçet li dijî tecridê çalakî pêk anîn û jiyana xwe ji dest dan. Bi armanca polîtikayên tecrîdê şermezar bikin dawî li jiyana xwe anîn. Lê yên ji cenazeyên me ditirsin destûr nedan cenazeyên Zulkuf Gezen û Ayten Beçet bi merasimên olî defin bikin. Mafê malbatê yên definkirin û şînê xezp kirin. Her çend mafê definkirinê ji destê malbatan bigirin jî em er dem wan di dilê xwe de defin dikin." Komê di daxuyaniyê de bê navber dirûşmeyên ‘Bijî Berxwedena Zîndanan’ berz kirin.
COLEMÊRG
Rêxistina HDP'ê ya Colemêrgê jî bi heman armancê daxuyanî dan Endam û rêveberên HDP'ê tev li daxuyaniyê bûn. Hevserokê HDP'ê yê Colemêrgê Sipan Turan, diyar kir ku Zulkuf Gezen û Ayten Beçet rûmeta wan e û dê şop û tekoşîna wan berdewam bikin.
AMED
Rêxistina HDP'ê ya Amedê jî li buroya hilbijartinê ya HDP'ê ya Yenişehirê daxuyanî da. Girsê xwest li pêş buroyê daxuyaniyê bide. Lê polîsan destûr nedan kom li derve daxuyaniyê bide. Rêveberên HDP’ê li hundur buroyê daxuyanî da û polîtîkayên hikûmetê şermezar kir. Parlamentera HDP'ê ya Amedê Remziye Tosun, namzetên hevşaredaran û xizmên girtiyan amade bûn. Li ser navê girsê Parlamentera HDP’ê Remziye Tosun daxuyani da û diyar kir ku Zulkuf Gezen, Ugur Şakar, Zehra Saglam û Ayten Beçet ên li dijî tecridê çalakî pêk anîn û jiyana xwe ji dest dan rûmeta wan in. Tosun, anî ziman ku polîtîkayên tecrîdê yên AKP-MHP'ê li girtîgehan dibin sedema mirinê û û wiha got: "Dewlet destûr nadin malbat cenazeyên zarokên xwe bi merasimên olî defin bikin. Wekî cenazeyê Zulkuf Gezen cenazeyê Ayten Beçet destûr nedan malbat bi marasima olî cenaze defin bikin. Mafê definkirin û şînê xezp kirin. Bi zorê nafên malbatan ên definkirin û şînê ji destê wan girt. Em vê yekê tu car ji bîr nakin. Tecrîd li her derê belav dibe. Divê em bi hevre li dijî vê tecrîdê dengê xwe bilind bikin û têbikoşin."
ÊLIH
Rêxistina HDP'ê ya Êlihê jî li buroya hilbijartinê ya HDP'ê daxuyanî da. Parlamentera HDP'ê Feleknaz Uca û Necdet Îpekyuz, xizmen girtiyan, endam û rêveberên HDP'ê tev li daxuyaniyê bûn. Di çalakiyê de wêneyê Ugur Şakar, Zulkuf Gezen û Ayten Becet bilind kirin û pankartên "Tecrîd mirin e, Em dawî li mirinê bînin" vekirin. Komê bê navber dirûşmeya "Bijî berxwadane zindana" û "Şehit namirin" berz kirin.
Rêveberê HDP'ê yê Êlihê Îkram Îrgî bang li her kesî kir ku li dijî tecridê tev li têkşînê bibin û wiha got: Her ku tecrîd didome mirin jî zêde dibe. Tecrîd tenê me meseleya gelê kurd e. Tecrîd li diji aştiya civakî ye. Tecrîd li ser hemû welat belav dibe. Ger ku tecrîd bi dawî bibe zilm û zordarî jî wê bi dawî bibe.b
ÇEWLÎK
Rêxistına HDP'ê ya Çewlikê jî li avahiya HDP'ê ya Çewlikê daxuyanî da. Namzetên HDP'ê yên hevşaredariya Çewlikê Senem Çakas û Hişyar Ozsoy, Parlamentera HDP'ê Ebru Gunay û bi dehan kesên din tev li daxuyaniyê bûn. Namzetê Hevşaredariya Çewlikê Hişyar Ozsoy, anî ziman ku hikûmetê aqilê xwe xistiye rev û xwest demek nêzîk îtîfaqa MHP-AKP aqilê xwe ji ref derxe u dawî li vê tecrîdê bînin.
Ozsoy, anî ziman ku hikûmet 20 salin hiqûq û zagonên xwe îhlal dike û li Îmraliyê tecrîdê dimeşîne û wiha got: “Birêz Ocalan hem li dijî hiqûqa neteweyî û hem jî li dijî hiqûqa navneteweyî di bin tecrîda giran de tê girtin. Hevseroka KCD'ê Leyla Guven, 137 rojin li dijî vê bê hiqûqiyê di greva birçîbûnê de ye. Daxwazên wê pir şênber û zelal in. Dixwaze hikûmet hiqûq û zagonên xwe pêk bîne û tecrîdê bi dawî bike. Zulkuf Gezen, Ugur Çakar û Ayten Beçet li dijî tecrîd û bê hiqûqiyê çalakî pêk anîn. Cenazeyên wan bêyî destûra malbatê revandin û defin kirin. Em dixwazin tecrîd bi dawî bibe. Wekî HDP'ê em jî dixwazin tecrid bi dawî bibe. Daxwazên girtiyan û Leyla Guven daxaza me ye jî. Divê tecrîd rabe û ev mirin bi dawî bibin. Cenazeyên ku ji girtîgehan derdikevin Eyba Tirkiye ye. Niha Leyla Guven, Selma Irmak, Sebahat Tuncel û parlamenterên HDP'ê li avahiya HDP'ê ya Amedê çalakiyên xwe berdewam dikin. Li Ewropa, Hewler û li girtîgehan bi hezaran girtî ji bo yek armanc û daxwazê di grevê de ne. Dixwazin tecrîda li Îmraliyê bi dawî bibe. Dixwazin parêzer û malbat biçin Îmraliyê û bi Birêz Ocalan re hevdîtin bikin.
Parlamentera HDP'ê ya Mêrdînê Ebru Gunay, jî anî ziman ku AKP tecrîd kiriye rêbaza rêveberiyê û wiha got: "Êdî dema cenazeyan defin dikin jî tecrîdê pêk tînin. Em vê rêveberiyê qebûl nakin. Hevala me Leyla jî li dijî vê feraset û rêveberiyê di çalakiyê de ye. Li cîhanê tenê li Girtîgeha Îmraliyê tecrîd heye. Ev tu fêdeyê nade Tirkiyeyê. Her ku tecrîd bidome dê mirin zêde bibin. Her ku tecrîd bidome, Tirkiye dê bêtir zerarê bibîne. Em bang li rayedaran dikin ku tecridê rakin û malbat û parêzer bi rêk û pêk hevditinê pêk bînin."
RIHA
Rêxistina HDP'ê ya Rihayê jî bi heman armancê li avhiya HDP'ê ya Rihayê daxuyanî da. Rêveberên HDP'ê tev li daxuyaniyê bûn. Hevseroka HDP'ê ya Rihayê Adile Oncel daxuyanî da û polîtîkayên AKP-MHP'ê şermezar kir û xwest bi lez dawî li polîtîkayên tecrîdê bîne. Oncel, destnîşan kir ku têkoşîna gelê kurd a aştî, demokrasî û azadiye dê teqez serkeftin û serfiraziyê bi xwe re bîne.
AGIRÎ
Rêxistina HDP'ê ya Agiriyê jî bi heman armancê li avahiya HDP'ê civîna çapemeniyê pêk anî. Hevserokê KCD'ê Berdan Ozturk, Parlamenterên HDP'ê Dilan Dirayet Taşdemir û Abdullah Koç, endam û rêveberên HDP'ê yên Agiriyê jî tev li daxuyaniyê bûn. Hevserokê KCD'ê Berdan Ozturk daxuyanî da û wiha got: "20 salin li Îmraliyê li ser Rêberê PKK'ê Abdullah Ocalan tecrîd heye. Ji bo tecrîd û bê hiqûqî bi dawî bibe bi hezaran gritî û bi sedan siyasetmedar li derve di greva birçîbûnê de ne. Zulkuf Gezen, Ayten Beçet tecrîd şermezar kirin û dawî li jiyana xwe anîn. Lê destûr nedan ku malbat cenazeyên wan defin bikin. Mafê şînê jî ji destê malbatan girtin. Em vê yekê ji bîr nakin. Divê dawi li vê bê hiqûqiyê bê. Bi sedan kes di sînorê mirinê de li dijî be hiqûqiyê li ber xwe didin. Daxwaza tevan yek e. Em jî bang li rayedardan dikin û dibêjin her roj tecrîd bidome mirin û kaos ji zêde dibe. Her tecrîd zêde bibe çareserî jî pêk nayê. Berxwedêrên grevê bi têkoşîna birçîbûnê têkoşîna herî aştiyane didin. Îro tecrîd li ser her kesî didome. Em bang li saziyên civakî, rêxistinên demokratîk, rewşenbir û hunermendan dikin ku li hemberî vê tecrîdê bêdeng nemînin. Em bi hevre li dijî terîdê derkevin û tecrîdê bişkînin."
TECRÎR HER ROJ MIRIN E
Berdan Ozturk, heri dawî anî ziman ku tecrîd her roj mirin e û dê tu carî kesên li dijî terîdê jiyana xwe ji dest dane ji bîr nekin. Ozturk, bang li hikûmetê jî kir û xwest bi lez dawî li tecrîdê bînin da ku mirin bi dawî bibe.