Serdozgeriya Komarê ya Dadgeha Bilind, der barê girtina Partiya Komunîst a Kurdistanê (KKP), Partiya Demokrat a Kurdistanê-Tirkiye (PDK-T), Partiya Azadiya Kurdistanê (PAK) û Partiya Sosyalîst a Kurdistanê (PSK) de doz vekir. Serokê Giştî yê PAK'ê Mûstafa Ozçelîk bertek nîşanî vê biryarê da. 

 

Ozçelîk, bilêv kir ku beriya dozê Serdozgeriya Komarê ya Dadgeha Bilind, di 12'ê Sibata 2015'an de hişyarameyek şandiye û di hişyarnameyê de xwestiye navê partiyê, bername û rêiknameya partiyê bê guherandin. Ozçelîk got: "Me di bersiva xwe de got, navê partiya me navekî rewa ye û wê bername û rêziknameya wê bi tu awayî neyê guherandin. A rast ew e ku Qanûna Bingehîn bê guherandin." 

 

‘SIYASETA ANTÎ KURD' 

 

Ozçelîk, bilêv kir ku ev nêzîkatiyeke siyaseta antî kurd e û got: "Di dema hilbijartinê de ev doz xistin rojevê. Dewleta Tirkiyeyê, di 4-5 salên dawî de paradîgmaya xwe li ser siyaseteke antî kurd ava kiriye. Tenê ne li Kurdistana Bakur, li Kurdistana Rojava û Kurdistana Başûr jî heman siyasetê bi rê ve dibe. A rast dibêje 'Divê li tu devera cîhanê kurd nebin xwedî maf û statuyekê.' Stratejiya nû ya dewleta Tirkiyeyê ev e. Û her tişt li gor vê yekê tê organîzekirin." 

 

Ozçelîk, da zanîn ku piştî vê dozê navê PAK'ê ji lîsteya partiyên qanûnî hatiye derxistinç Ozçelîk, destnîşan kir ku ev pêkanîneke bêhiqûqî û kêfî ye. 

 

‘EM NI NÎJADPERESTIYÊ HATIN TAWANBARKIRIN' 

 

Ozçelîk, diyar kir ku di îdianameya ji wan re atiye şandin wiha hatiye gotin: "Li Tirkiyeyê, hûn ji bilî neteweya tirk neteweyeke kêmbar diafirînin û hûn ji bilî tirkî behsa zimanekî din dikin. Ji xeynî tirkî, behsa perwerdehiya bi zimanekî din nîjadperestî ye." Ozçelîk, destnîşan kir ku ji ber ew behsa zimanê kurdî û neteweya kurd dikin, bi nîjadperestiyê tên tawanbarkirin û got: "Me bersiv da. Kesên 96 sal in kurdan anhesibînin û tune dikin, nîjadperest in. Pirsgirêk tenê ne navê Kurdistanê ye. Di rêziknameya partiya me de, behsa mafê tayînkirina çarenûsa xwe ya kurdan tê kirin. Ji ber em dibêjin, divê ji bo vîna gelê kurd rêzgirî hebe, doza girtinê vekirin. Ji ber me behsa kurdan kiriye, ev yek ji bo girtinê bûye hincet. Em bi rewşeke ev qas wehîm re rû bi rû ne." 

 

Ozçelîk, destnîşan kir ku ew di dozê de hem parastineke hiqûqî hem jî ya siyasî bikin û wê PAK, navê partiya xwe, rêzikname û bernameya xwe neguherîne. Ozçelîk, bilêv kir ku girtina partiyên di navê wan de 'Kurdistan' heye, pêkanîneke bêhiqûqî ye û li dijî mafên mirovan, azadiya fikr û ramanê ye. Ozçelîk, diyar kir ku divê hebûna gelê kurd, zimanê kurdî bê qebûlkirin û got: "Em bang li Dewleta Tirkiyeyê dikin ku divê dev ji vê feraseta paşverû berde û ji bo pirsgirêk di çarçoveyeke demokratîk de bên çareserkirin divê gavina bavêje." 

 

MA / Lezgîn Akdenîz