AMED - Orkestraya MA Muzîkê bi çar zaravayên kurdî konserek bêhempa li dar xist. Orkestrayê, konser diyarî mîrê bilûrê Egîdê Cîmo yê jiyana xwe ji dest da kirin û çalakiya Hevseroka KCD'ê Leyla Guven silav kirin.
MA Muzîkê bi wesîleya duyemîn salvegera avakirina xwe, 2'yemîn Rojên Muzîkê bi dayîna konsera Orkestraya MA Muzîkê bi dawî kir. Konser li salonek dawetê ya li navçeya Rezana Amedê pêk hat. Bi hezaran kes beşdarî konserê bûn û atmosferek kêfxweş li salonê hebû. Piştî berpirsê MA Muzîkê Şêrko Kanîwar axaftina vekirina konserê kir û got ew konsera xwe diyarî mîrê bilûrê Egîdê Cîmo dikin. Ewil Orkestraya Jin MA derket ser dikê û stranên xwe vegotin. Sarya Yigît a ku şefîtiya orkestrayê dike stranên ji hev xweştir gotin.
ORKESTRAYA 'NETEWÎ' DERKET SER DIKÊ
Piştî Orkestraya jinan, Orkestraya Giştî ya MA Muzîkê ku şefîtiya wê hunermend Ramî yê ji Mahabadê dike derket ser dikê. Orkestraya ji her bajarên kurdan pêk tê adeta mirov dikare bêje ku orkestrayek "netewî" derxistiye holê. Dema qala vê orkestraya giştî hat kirin welatiyan bi deqîqeyan li çepikan da. Orkestrayê bi zaravayên kurmancî, kirmanckî, hewramî û soranî yên zimanê kurdî stran gotin. Her wiha hunermendê ji Mahabadê Şoreş jî derket ser dike û klama "Lawikê Metînî" got û diyarî Egîdê Cîmo kir.
PROVAYA NEWROZÊ
Mamoste Şêrko Kanîwar çalakiya Hevseroka KCD'ê Leyla Guven jî silav kir û got: "Birçîbûn berxwedana gelê kurd e." Kanîwar got konserta wan provaya 21'ê Adarê Newrozê ye. Kanîwar da zanîn ku orkestraya wan ji par parçeyan pêk tê û bi orkestra xwe ruhek netewî ava kirin e.
Namzetên HDP'ê yên Hevşaredariya Bajarê Mezin a Amedê Hulya Alokmen Uyanik û Selçuk Mizrakli jî ku beşdarî konserê bûn derketin ser dikê û orkestrayê pîrzo kirin. Bi berzkirina slogana "Bijî berxwedana zîndanan" konser bi dawî bû.