ENQERE/ÊLIH – Meclîsa Dayikên Aştiyê yên Enqereyê çalakiya greva birçîbûnê ya ji bo Azadiya Rêberê PKK'ê Abdullah Ocalan dabûn destpêkirin dewrî Meclîsa Jinan a HDP’ê ya Enqere kirin. Li Êlihê jî çalakiya greva birçîbûnê ya rêveberên HDP û DBP'ê di roja duyemîn de berdewam dike. Çalakgeran diyar kirin ku heta Ocalan azad nebe gelê kurd û tirk azad nabe.
Çalakiya greva birçîbûnê ya bêdem û dorveger a ku Meclîsa Dayikên Aştiyê yên Enqere li dijî tecrîda ser Rêberê PKK’ê Abdullah Ocalan da destpêkirin Meclîsa Jinan a HDP’ê ya Enqere dewr girt. Çalakiya li avahiya HDP’a Enqerê didome Meclîsa Jinan dê 3 roj çalakî pêk bînin. Jinan li ber pankarta “Tecrîd wê winda bike û azadî bi ser bikeve” daliqandiye daxuyanî dan.
Endama Meclîsa Jinan Ayfer Balikçi axivî û diyar kir ku tecrîda li dijî Ocalan gelê kurd, jinan, ciwanan û hemû kesên alîgirên demokrasiye xistiye nav xetereyê û got: “Me ji îro pê ve çalakî dewr girt. Em destekê ji gelê xwe, jinan û ciwanan dixwazin.”
‘EM CÎHANEK TARÎ NAXWAZIN’
Endama Meclîsa Dayika Aştiyê Hanim Varli ku nobeta xwe dewr kirin jî wiha got: “Îro tecrîd tenê li Serok Abdullah Ocalan nayê meşandin. Îro li ser 80 milyon tecrîd didome. Em cîhanek tarî naxwazin. Dê ev têkoşîna me tu carî bi dawî nebe. Çawa ku herikîna Dîcle û Firat xelas nabe dê têkoşîna me jî xelas nebe.”
Di çalakî dewrkirinê de sloganên “Bijî Serok Apo”, “Bê Serok jiyan nabe” û “Jin jiyan azadî” berz kirin.
'BERXWEDANA JINAN BI OCALAN DEST PÊ KIRIYE'
Çalakiya gireva birçîbûnê ya li Êlihê ji aliyê rêveberên HDP û DBP'ê de dest pê kiriye di roja duyemîn de berdewam dike. Di çalakiya grevê de Rêveberên Rêxistina HDP'ê ya Qubînê hatin serdana çalakgeran. Çalakger Sabiha Ekinci, axaftinek kir û diyar kir ku Azadiya Ocalan tê wateya azadiya jinan û wiha got: "Jinên di bin zext û zordariyê de bûn, bi felsefeya Ocalan azad bûn. Divê em li Ocalan xwedî derkevin. Niha feraseta mêr di nava civakê de dixwaze dîsa vina jinan dîl bigire. Berxwedana ku bi têkoşîna Ocalan dest pê kir divê em wê mezin bikin.
Parlamenterê DEP'ê ya hat girtin Nizamettin Toguç jî diyar kir ku hikûmeta AKP'ê demek dirêj e li ser Ocalan tecrîdê dimeşîne û wiha got: "Ocalan nikare bi parêzer û malbata xwe re hevdîtin bike. Ev li dijî hiqûqê ye. Heta ku Ocalan azad nebe gelê kurd û gelê Tirkiye azad nabe."
Endamê KCD'ê Adil Erîn jî diyar kir ku heta ew agahî ji Ocalan bigirin û Ocalan azad bibe dê çalakiya xwe berdewam bikin. Çalakger Halime Çetinkaya jî anî ziman ku ew dê çalakiya xwe berdeam bikin û bang li hemû rêxistinên demokratîk ên Tirkiye û cîhanê kirin û xwest her kes li dijî tecrîda li ser Ocalan dengê xwe bilind bikin.
Berdevka Tevgera Jinen Azad (TJA) ya Êlihê Songul Korkmaz jî wiha got: "Rêberê Gelê Kurd Abdullah Ocalan li Îmraliyê di bin tecrîda giran de ye. 2 salin bi malbata xwe re nikare hevditin bike. Em dixwazin agahî ji Ocalan bistînin û azad bibe."