AGIRÎ - Şeyhmûs Can ê 55 rojin li dijî tecrîda li ser Rêberê PKK’ê Abdullah Ocalan di greva birçîbûnê deye, bi navbeynkariya malbata xwe ev peyam şand: “Hezar canê me jî hebe, em amadene feda bikin. Em vê ne weke fedekartiyê, weke deynê stûyê xwe dibînin.”
Çalakiya greva birçîbûnê ya Sîraç Keskîn, Abdullah Kaya, Agît Yilmaz, Engîn Okûtûcû, Zînar Dogan û Şeyhmus Can ên li Girtîteha Tîpa T a Hejmara 1 a Bandirmayê ji bo rakirina tecrîda li ser Rêberê PKK’ê Abdullah Ocalan destpê kirin, di roja 55’an de berdewam dike. Şeyhmûs Can ê di greva birçîbûnê deye, bi navbeynkariya malbata xwe peyam şand û bal kişand ser pergala tecrîda li Îmraliyê ya li tevahiya civakê belav dibe.
‘ÇALAKIYA ME JI BO NIRXÊN MIROVAHIYÊ Û PÊŞROJA GELAN E’
Can, diyar kir ku çalakiya wan a greva birçîbûnê ne ji bo daxwazên şexsîne û wiha domand: “Daxwazên me mafdar û meşrû ne. Abdullah Ocalan ji bo me dozeke. Ji ber vê dê berxwedana me bi ser bikeve. Çalakiya me ji bo hemû nirxên mirovahiyê û gelê me ye. Emê di vê çalakiya xwe bi ser bikevin. Daxwazên me daxwazên wene. Em di daxwazên xwe de bi israr û bi biryarin. Hezar canê me jî hebe, em amadene feda bikin. Em vê ne weke fedekartiyê, weke deynê stûyê xwe dibînin. Em bang li gelê xwe dikin ku bêdeng nemînin. Werin em hemû bi hevre vê çalakiyê bi serkeftinê taçîdar bikin. Em ji bo Ocalan çi jî bikin, dê dîsan kêm bimîne.”
‘LEYLA GUVEN RÊYEK NÎŞANÎ ME DA’
Can, di dawiya peyama xwe de hemû hevalên xwe yên di greva birçîbûnê dene pîroz kir û wiha got: “Ez hemû hevalên di greva birçîbûnê dene pîroz dikim. Em çiqasî ne li gel we jî bin, em we ji bîr nakin. Leyla Guven bû pêşenga çalakiyê û rêyek nîşanî me da. Em Nasir Yagiz û dostên me yên li Ewropayê yên di greva birçîbûnê dene pîroz dikin û silavên xwe ji wan re dişînin. Hevalên me yên li vê derê di greva birçîbûnê dene, her ku diçe kîlo didin. Lê morale wan bilinde. Em biserbikevin, em ê tecrîdê bişkînin û em ê faşîzmê hilweşînin.”