NAVENDA NÛÇEYAN - Çalakiya grevê birçîbûnê ya 14 çalakgeran a li Strasboûrgê, di roja 70'yemîn de berdewam dike. Berxwedêrên li dijî tecrida Rêberê PKK'ê Abdullah Ocalan di grevê de ne gotin:  "Ji ber ku em pê bawer in, em bi rengekî serbilind li ber faşîzmê radibin. Li her derê divê em bi hev re rabin ser piyan."

 

Çalakiya 14 berxwedêrên li Strasbourgê 70 rojin di grevê de ne çalakiya xwe berdewam dikin. Li ser navê çalakgeran Ramazan Îmîr daxuyani da û diyar kir ku mîna roja destpêkê ew bi biryar in û wiha got: "Em di roja 70'î de ne. Tevî ku em 14 hevalên li Strasboûrgê 70 roj tijî kiribin jî, hevala me Leyla Guven heye ku berî me dest bi çalakiyê kir û zêdeyî 100 roj li pey xwe hişt. Li zindanan hevrêyên me 71 roj in di nava şert û mercên nebaş de li ber xwe didin. Li tevahiya Ewropayê 24 hevalên me li ber xwe didin. Berxwedan li her devera dinyayê belav bûye. Ji bilî berxwedanê rêyek li ber gelê me nîne. Dema ku ya li hemberî mirovan faşîzm be, polîtîkaya tinekirina hebûnê be, ji bilî berxwedanê alternatîfeke mirovan namîne. Em niha bi vî rengî li ber xwe didin. Berxwedana grevên birçîbûnê ku hevala Leyla pêşengiyê jê re dike, hîn dewam dike. Biryardariya me ya roja destpêkê çawa be, ya niha jî bi heman rengî ye; bi moral, îdîa, dilsozî û biryardarî em li ber xwe didin."

 

'QEBÛLKIRINA BÊDENGIYÊ, QEBÛLKIRINA TESLÎMIYETÊ YE'

 

Ramazan Îmîr diyar kir, qebûlkirina sîstema êşkence û tecrîdê, bêdengiya li pêşberî vê yekê tê wateya qebûlkirina teslîmiyetê û got, ti hêz nikare vê yekê li wan ferz bike. Îmîr wiha dewam kir: "Nepêkan e ku em vê qebûl bikin. Eger me qebûl bikira, hingî berxwedana grevên birçîbûnê ewqasî belav nedibû. Ev yek ferzkirina teslîmiyetê ye li ser me; gelê Kurd ne ew gel e ku êdî teslîmiyetê qebûl bike." Îmîr bi bîr xist, gelê Kurd, Tevgera Azadiyê ya Kurdistanê di destpêka sala 2019'an de biryara 'berxwedanê' da û anî ziman, wê vê berxwedanê heta dawiya sala 2019'an bidomînin.

 

'EM BI RUHÊ BERXWEDANA ŞOREŞGERÎ TEVLÎ PÊVAJOYÊ BIBIN'

 

Îmîr ragihand, gelê Kurd ti carî serê xwe li ber neheqiyê netewandiye û bang li Kurdên li çar aliyên Kurdistanê û dîasporayê kir ku bi ruhê berxwedanê tevlî pêvajoyê bibin. Îmîr bal kişand ser girîngiya hêza gel û wiha dewam kir: "Niha li Kurdistanê atmosfera hilbijartinê heye. Pêwîste her kes bi ruhê berxwedana şoreşgerî tevlî atmosfera hilbijartinên xwecihî bibin. Dema ku helwest bi vî rengî be wê faşîzm hilweşe. Pêvajo ne pêvajoyeke ji rêzê ya hilbijartinê ye. Ji ber ku hilbijartin bi xwe jî derbeke ku dikare li faşîzmê bê xistin. Eger bi ruhekî berxwedana şoreşgerî li dijî faşîzma neteweperest a AKP-MHP'ê têkoşîn bê dayin, derbeke mezin dikare li faşîzmê were xistin. Di vê çarçoveyê de gelê me yê li Bakurê Kurdistanê dikare hîn bi xurtî tevlî pêvajoya berxwedanê bibe."

 

Îmîr diyar kir, ji bo Ewropayê jî heman tişt derbas dibe û got, "Her mirovekî me yê li Ewropayê dikare karekî bi vî rengî deyne ber xwe: 'Ez ê îro berxwedanê bixim rojeva 15 malbatan. Ez ê rê li ber nîqaşa ji bo xwedîderketina li berxwedanê vekim'. Eger niha li Ewropayê 10 hezar kes di nava karê azadiyê de hene, bi biryardarî û îradeya têkoşînê dikarin xwe bigihînin sed hezar kesî." Îmîr diyar kir, serketina gelê Kurd a li dijî tecrîdê bi têkoşîna hevgirtî dibe û anî ziman, bêdengiya li pêşberî pêvajoyê wê rê li ber ti encamê veneke.

 

'EM BI HEV RE RABIN SER PIYAN Û HELWESTÊ NÎŞAN BIDIN'

 

Berxwedêr Ramazan Îmîr helwesta gel a xwedîderketina li berxwedêrên greva birçîbûnê silav kir û ragihand, asta heyî ya xwedîderketinê têrker nîne. Îmîr destnîşan kir, eger gelê Kurd li her devera lê ye bi heman rengî û di heman demê de rabin ser piyan û helwestê nîşan bidin, ev yek wê rê li ber serketinê veke. Di dawiya axaftina xwe de Îmîr bang li gelê Kurd kir: "Tempo û motîvasyona heyî gelekî cidî ye. Asta xwedîderketinê gelekî girîng e. Lê belê ne di asta têrker de ye. Mesela, em dibînin ku li herêmekê di asteke girîng de xwedîderketin heye, gel dadikeve qadan, lê li bajar an jî herêmeke din bêdengî heye. Divê em wê yekîtiyê pêk bînin. Divê em karibin di heman demê de li her cihî heman nerazîbûnê nîşan bidin. Ji bo vê divê em bixebitin; em yekser biçin malan, qala têkoşîna xwe bikin. Em qala şert û mercên Rêber Apo bikin. Her wiha divê em rastî û ruhê berxwedanê yê hevalên di greva birçîbûnê de bidin fêhmkirin, ku em karibin vê rêxistinbûnê berbelav bikin. Pêwîstiya me bi motîvasyon û karekî di vê çarçoveyê de ye. Em bi vê jî piştrast in."