AMED – KCD’ê bi wesîleya 21’ê Sibatê Roja Zimanê Dayikê yê Cîhanê daxuyanî da û got: "Li dijî girtin û dagirkirina saziyên ziman divê her kes cihê ku lê dijî veguherîne saziyek ziman û xwedî li zimanê xwe derkeve."
Kongreya Civaka Demokratîk (KCD) bi minasebeta 21’ê Sibatê Roja Zimanê Dayikê yê Cîhanê bi daxuyaniyek nivîskî bal kişand ser girîngiya rojê û vê rojê li hemû netewan pîroz kir.
Daxuyaniya KCD’ê wiha ye:
“Pergala kapîtalîst bi sedan salan e li ser hişmendiya neteweya serdest gelan di qirkirina çandî û fîzîkî de derbas dike. Ji ber ev hişmendiya qirker gelek gel tevî zimanê wan an hatin tunekirin an jî anîne ber tunebûnê. Ji van gelan a ku herî zêde bi qirkirinan re rû bi rû man û hê jî zimanê wan ji hêla dewletê ve tune tê hesibandin yek jê gelê kurd e.
Dewleta tirk a li ser yek ziman, yek çand û yek netewe hatiye avakirin li ser gelên din qirkirinên herî hovane pêk anîn û hê jî pêk tînin. Ev sed sal in bi tu awayî hebûna gelê kurd qebûl nake û êrîşî hemû nirxan dikin. Bi taybetî jî di serdema faşîzma AKP'ê de ev êrîş berfirehtir bûye û bi tu awayî tehemulî hebûna kurdan nake. Ji aliyekî li ser gelê kurd qirkirinê dimeşîne û ji aliyê din jî saziyên kurdan digire.
Herî dawî gelek saziyên gelê kurd ên bi dehan sal in li ser ziman lêkolînê dike û bingeha perwerdehiya kurdî ne bi qanûnên faşîzan ên li ser navê OHAL'ê derxistine, girtin.
BI PÊKANÎNÊN DAWÎ RE DIJMINAHIYA ZIMAN NÎŞAN DAN
Bi ev qanûnên faşîzan di serî de rojnameya tekane ya kurdî Azadiya Welat, Enstîtuya Kurdî, Kurdî-Der, dibistanên kurdî û saziyên din ên kurdan girtin. Ne tenê deriyên van saziyan girtin, nahêlin saziyên li ser zimanê kurdî bên vekirin. Bi vê pêkanînê AKP'ê careke din dijminatiya xwe ya li hemberî zimanê kurdî nîşan da.
Îro 21'ê Sibatê Roja Zimanê Dayikê ya Navneteweyî ye. Em vê roja pîroz di serî li gelê kurd û hemû gelên di bin qirkirina çandî de li ber xwe didin pîroz dikin. Di pêvajoyeke wisa ku AKP-MHP bi awayekî hovane êrîşî ser nirxên gelê kurd dike de, rêya tekane berxwedan û parastina çanda gelan e. Em ê bi hişmendiya neteweya demokratîk ziman, çand û hebûna xwe û hemû gelan biparêzin. Ji bo vê jî berxwedaneke ji her demê bêhtir û bihêztir divê.
XWEDÎ LI ZIMANÊ XWE DERKEVIN
Li hemberî girtin û dagirkirina saziyên ziman divê her kes cihê ku lê dijîn veguherînin saziyeke ziman û xwedî li zimanê xwe derkevin. Divê baş were zanîn ku heta niha gelê kurd bi berwedana bêhempa planên qirkirina çandî ya dewletê vala derxist û anî astekê. Ji niha şûnde bi berxwedana we dikare ev pergala dagirker bi temamî ji holê rake. Roj roja berxwedan û xwedîderketina nirxên xwe ye. Serkeftin her demê bêhtir nêzîk e û em ê bi ser bikevin."