NAVENDA NÛÇEYAN - Di konferansa li Kamara Lordan a Kraliyeta Yekbûyî, beşdarên konferansê biryar dan ku Weqfa Demokrasiyê ya Abdullah Ocalan ava bikin.
Di 20'emîn salvegera 15'ê Sibatê roja radestkirina Rêberê PKK'ê Abdullah Ocalan de, li Baskê Jorîn ê Parlamenta Kraliyeta Yekbûyî, li Kamaraya Lordan, siyasetmedaran konferansa "Çareseriya Krîza Rojhilata Navîn: Ramanên Abdullah Ocalan" pêk anîn. Gelek siyasetmedar, akademîsyen, aktîvîst û rojnameger amade bûn. Di konferansê de endamê Kamaraya Lordan Maurîce Glassman, parlamenterê Sînn Feîn Chrîs Hazzard, parlamenterê HDP'ê Hişyar Ozsoy, Profesor Davîd Greaber, Profesorê Elman Udo Steîncbach, siyasetmedarê ji Efrîkaya Başûr Ebrahîm Îsmaîl Ebrahîm, Seroka Desteya Rêveber a Meclîsa Sûriyeya Demokratîk (MSD) Îlham Ehmed û parêzerên Ocalan Îbrahîm Bîlmez amade bûn. Beşdaran di konferansê de biryar dan ku Weqfa Demokrasiyê ya Abdulllah Ocalan ava bikin. Di nav xebatên weqfê de sendîkayên ku kampanyaya Ji Ocalan re Azadî bi rê ve dibin jî wê hebin. Eendamên Kamaraya Lordan, parlamenter û akademîsyen wê di nav vê xebatê de cih bigirin. Weqfa Abdullah Ocalan, ku tê payin mehên pêşiya me bê avakirin, wê ji bo berbelavkirina fikrên Ocalan bixebite. Di konferansa "Çareseriya Krîza Rojhilata Navîn: Ramanên Abdullah Ocalan" de mijarên Konfederalîzma Demokratîk, krîza netewe-dewletiyê ya li Tirkiye, Îran, Iraq û Sûriyeyê, dijberiya dewleta Tirk a li Kurdên Tirkiyeyê û Sûriyeyê û Pergala Êşkenceyê ya Îmraliyê hatibûn gotûbêjkirin.