Murat Yildiz ê 19 salî li Îzmîrê bi dayika xwe re tenê dijîn û hezkiriyeke wî heye. Yildiz dixwaze nîşanî bibe lê malbata hezkiriya wî li dijî vê yekê derdikevin. Dem dem di navbera malbata Yildiz û malbata hezkiriya wî de nîqaş derdikevin. Gelek nîqaşên wan li qereqolê bi dawî dibin. Polîsê nêzê malbatê gelek caran li Yildiz dixe û gefa "Heke tu dest ji vê yekê bernedî ez ê te bikujim" li Yildiz dixwe. Di 29'ê Çileya 1995'an de li kafeyeke navçeya Bornovaya Îzmîrê nîqaşeke din jî derdikeve. Yildiz bi çekê gule berdide hewa û ji herêmê dûr dikeve. Di nav wan kesên ku bi wan re nîqaş kiriye de polîsê ku gef li wî xwarî jî heye.

 

DAYIK KURÊ XWE DIBE QEREQOLÊ

 

Yildiz ê bi vî şeklî ji gengeşiyê xilas dibe, piştî mehekê polîs diçin mala wî. Dayika Yildiz derî vedike, dibêje ku "kurê min ne li mal e." Li ser vê polîs dayikê dibin qereqolê. Polîs ji dayikê re dibêjin ku "kurê te gule berdaye hewa, ev tişt bi veşartinê û bi revê nabe. Bila bê û îfadeya xwe bide û biqede." Polîs soz didin dayikê dê piştî îfadeyê wî serbest berdin. Dayik ji qereqolê vedigere malê û li kurê xwe digere. Dayik Yildiz di 23'yê Sibatê de kurê xwe îqna dike, bi parêzer û biraziyê xwe re tekane kurê xwe Murat Yildiz dibe Şaxa Asayîşa Ozkanlar a Bornovayê. 

 

'WEKÎ KU ÇAVÊ WÎ JI SERÊ WÎ DERKETIBÛ'

 

Yildiz li qereqolê kurê xwe teslîmê komîserê bi navê Ramazan Kaya û polîsê bi navê Tahîr Şerbetçî dike, ji bo wî bibin Stenbolê dixin rê. Polîs ji dayikê re dibêjin ku "Dê kurê te bibin Stenbolê, divê tu perê rê bidî." Dayik Yildiz perê rê dide, berî ku kurê wê bibin Stenbolê, dayik diçe gel kurê xwe. Dayik dema di maşîneyê de kurê xwe dibîne ku hatiye derbkirin û aşkera kir ku wekî ku çavê wî ji serê wî hatibû derxistin.

 

'GOTIN DI FERÎBOTÊ DE XWE AVÎTIYE'

 

Dayika ku dixwaze bi kurê xwe re biçe Stenbolê, polîs bi gotinên wekî "Me asteng neke, çek li Stanbolê li gel hevalekî wî ye. Em ê biçin û bigirin bînin. Tuyê roja Înê jî bê û kurê xwe bibînî." Yildiz roja Înê diçe qereqolê û pirsa kurê xwe dike û bersiva "Kurê te ji destê me revî" digire. Roja din dayik Yildiz dîsa diçe qereqolê û bersiva "Hêj nehatine" didin wê. Dayik piştî telefona xwe digire diçe kar, êvarê dema vedigere malê dibihîse ku biraziyê wê hatiye binçavkirin. Biraziyê wê yê ku dibin qereqolê, ji Yildiz re dibêje ku "Polîsan dibêjin Murat Yildiz dema bi Ferîbota Topçularê dibin Eskîhîsarê, xwe ji ferîbotê davêje û bi sovekariyan xwe rizgar dike."

 

Dayik Yildiz wê şevê bi rê dikeve û diçe Stenbolê, bûyerê ji ewlekariya Pêravên Eskîhîsarê dipirse. Ewlekariya pêravê dibêje ku anonsek wiha hatiye kirin; lê dê tu tiştekî nekin, berê dayikê didin Dozgerê Gebzeyê û diyar dikin ku "Tu dikarî rewşê ji Dozgerê Gebzeyê hîn bî." Yildiz vê carê diçe Dozgerê Gebzeyê jî dibêje ku "Xanim! Îfadeya polîsan li vir e, kurê te revî ye û xwe rizgar kiriye. Dê rojekê ji cihekî derê û bê." Yildiz a ku piştre bi dehan caran diçe qereqolê, her dem bersiva "Dê rojekî ji cihekê derê û bê" digire.

 

DOSYA HAT WINDAKIRIN

 

Yildiz ê bi xwesteka xwe teslîm dibe û bi sûcê "li cihê meskûn gule berdaye hewayê" tê darizandin, her çendî bi gotinên revî an jî întixar kir bawerî neyê kirin jî, doz 5 salan li 2'yemîn Dadgeha Cezayê Asliyeyê dewam kir, di dawiyê de beyanên polîsan ên wekî "xwe di ferîbotê de avêt" esal hat girtin. Dadgehê bi hinceta "peywira xwe îhmal kirine" lîrayek 18 quriş cezayê pere li wan birî. Heman dadgehê di sala 2002'yan de cezayê pere 5 salan taloq kir. Di sala 2007'an de hemû encamên dozê ji holê hat rakirin.

 

Dosyaya Murat Yildiz di Edliyeya Gebzeyê de hat windakirin, Seroka Şaxa Komeleya Mafên Mirovan (ÎHD) a Stenbolê Gulseren Yolerî piştî qeydên edliyeyê lêkolîn kirin, ne dosya dît û ne jî der barê îmhakirina dosyayê de tu tişt nedît. Yolerî di sala 2015'an de serî li Serdozgerê Komarê yê Gebzeyê da û xwest aqûbeta Murat Yildiz bê zelalkirin û serlêdana sûc kir. Ji bo lêpirsînek bi bandor pêk bê, Yolerî gelek caran serî li Dozgerê Gebzeyê da û daxwazname da dozger, rojên borî bersiva "nediyar" hat dayîn. Yolerî û Yildiz bertek nîşanê vê biryarê dan.

 

RÛNIŞTINA YEKEMÎN DI 9'Ê MIJDARÊ DE YE

 

Yolerî aşkera kir ku wan di sala 2015'an de serî li Dozgerê Komarê yê Gebzeyê daye û wiha axivî: "Dozger diyar kir ku ji ber demboriyê ew ê dozê bigirin. Min daxwazname dan û aşkera kir ku windakirina di bin çavan de sûc e û xwest lêpirsîneke bi bandor bê kirin. Di hevdîtna herî dawî ya bi dozger re, ji ber vekirî mayîna dosyayê aciz e. Got ku 'Biryara nediyarî bigirin, em jî dosyayê bigirin.' Dema me got em ê vê yekê nekin, da zanîn ku bi awayekî re'sen ew ê serlêdanê bikin û piştî biryarê de dosyayê bigirin." Yolerî aşkera kir ku dê rûniştina yekemîn di 9'ê Mijdarê saet di 15.20'an de li Edliyeya Gebzeyê bê dîtin û got ku "Di vê pêvajoyê de ji bo biryara 'nediyarî' dernekeve em ê di tevgerê de bin."

 

'EZ DOZDARÊ DEWLETÊ ME'

 

Dayik Hanîfe Yildiz destnîşan kir ku piştî vê biryarê, niha 1'emîn Dadgeha Hiqûqa Sulhê ya Gebzeyê der barê wan de biryara nediyariyê girtiye û ev tişt got: "Ez bi Miduryeta Nifûsê ya Gebzeyê re dozdarim. Lê tu doza min a bi Miduryeta Nifûsê ya Gebzeyê re tune. Tu şerên me jî çênebûye. Ez ji dewletê dozdarim û ji Ramazan Kaya û Tahîr Şerbetçî, Şah Îsmaîl Ozturk dozdarim. Ewlekarên vê dewletê çi kirin, çawa windakirin ez dozdarê wanim. Nediyarî çawa dibe. Tu dibê qey cinan biriye, wekî tu eleqeya dewletê pê tune ye. Dibêjin ku eleqeya wan tune ye, wê deçê çawa dibe ji ber îhmala peywirê doz li wan tê vekirin. Wê demê ev tiştekî di destê polîsan de ye. Ez ji dewletê jî û ji wan polîsan jî heta dawiyê dozdarim. Li pey şopa kurê xwe me."

 

MA / Sadiye Eser