AMED - Welatiyê bi navê Hasan Yenî diyar kir ku 2 kesên xwe wek elemanên îstîxbaratê pê dan nasîn pê re hevdîtina teklîfa sîxûrtiyê kirin û piştî wî teklîfê red kiriye gef lê xwarin e û dê ji bo alîkariya hiqûqî serî li ÎHD'ê bide. 

 

Welatiyê bi navê Hasan Yenî (42) yê li Amedê dijî 2 kesên temenê wan derdora 30 salî wek elemanên îstîxbaratê xwe dane nasîn her tim wî aciz dikin û herî dawî ji bo teklîfiya wan a "sîxûrtiyê" qebûl nekiriye gef lê xwarin e. Yenî yê li Amedê karê serwîsa dibistanê dike da zanîn ku demek beriya niha kesekî xwe bi telefonê gihandiyê û ji bo komek turîstên hatine Amedê xwestiye wan bigerîne û bangî wî kiriye ku biçe navenda dan û stendinê ya li ser Rêya Xarpêtê. Yenî anî ziman ku ew çûye AVM'yê û li şûna turîstan 2 kesên temenê wan derdora 30 salî wî pêşwazî kirine û di bin navê sohbetê de teklîfiya sîxûrtiyê lê kirine. 

 

'TEKLÎFIYA SÎXÛRTIYÊ LI MIN KIRIN' 

 

Yenî destnîşan kir ku van kesan kurê wî yê ji 2014'an ve jê agahî nagire jê pirsîne û got: "Bi salan e agahî jê nagirim. Tevî ku bi salan e agahî ji kurê xwe nagirim jî her tim pirsa wî ji min dikin. Teklîfiya em bi hev re li çolterê bigerin kirin. Xwestin ez der barê kesên li çolteran dijîn agahî bidim wan. Ji bo ez teklîfa wan sîxûrtiyê qebûl bikim hemû desteka aborî ji bo min teklîf kirin." 

 

‘GEF LI MIN XWARIN’

 

Yenî da zanîn ku wî teklîfa wan red kiriye û wiha got: "Van her du kesan gef li min xwarin. 5 roj dem dan min. Ev bi salan e bêyî muhtacî tu kesî bibim debara xwe dikim. Beriya du rojan dîsa ev kes li min geriyan. Dîsa gef li min xwarin."

 

'EV KES KÎ NE?'

 

Yenî bertek nîşanî pêkanînana van kesên li hemberî wî pêk tînin da û got: "Heke ez sûcdar bim çima ne bi riyên hiqûqî lê bi riyê dij hiqûqî bangî min dikin. Ev kes kî ne?" Yenî got ew ê ji bo desteka hiqûqî serî li Şaxa Komeleya Mafên Mirova (ÎHD) a Amedê bide.