Prof. Dr. Gençay Gursoy, balê kişand tecrîda li ser Rêberê PKK'ê Abdullah Ocalan û got ku, tecrîd ne li gor mafên mirovan, huqûqa netewî û navnetewî ye. 

 

Gursoy, diyar kir ku derdoreke zêde ya gelê kurd Ocalan wek vîna xwe qebûl dike û wiha got: "Tenê ne Abdullah Ocalan, girtî an jî mehkûmekî din jî dema demek dirêj bê tecrîdkirin rewşeke zor û zehmet e. Rayedar dibêjin tenduristiya wî baş e, lê belê ev daxuyanî têr nakin." Gursoy, diyar kir ku divê endîşeyên der barê tenduristiya Ocalan de bi riya rêxistinên mafên mirovan an jî Yekîtiya Bişîjkên Tirk ve ji raya giştî re bên ragihandin û ev yek ne tiştekî zehmet e. 

 

'WÊ ŞERT Û MERCÊN TIRKIYEYÊ NERM BIKE' 

 

Gursoy, diyar kir ku atmosfera li Tirkiyeyê atmosfereke dijwar e û kes ji pêşeroja xwe ne bawer e. Gursoy, dest nîşan kir ku teqez divê di van şert û mercan de hevdîtin bi Ocalan re bên çêkirin. Gursoy wiha got: "Hêvîdar im pir bi derengî nekeve û demildest daxwazên malbat, partiyên siyasî bi cih bên. Heke bi Ocalan re hevdîtin bê çêkirin, dê ev yek şert û mercên Tirkiyeyê nerm bike. Herî kêm ji bo hesasiyetên derdor û girseyên dilnerihet be jî divê tecrîd bê rakirin."Wê ev yek bi riya diyalogê bibe munasebeta çareserkirina pirsgirêka kurd." Gursoy diyar kir ku di serdemên herî krîtîk de jî bangawaziyên Ocalan ên ji bo agirbestê bi erênî encam bûne. 

 

Gursoy, diyar kir ku polîtîkaya ewlekariyê ya ku niha tê şopandin wê bi xwe re tu çareseriyê neyîne û ji berê heta niha gelek delîlên vê yekê hene. Gursoy wiha domand: "Bifikirin wê nêvenga kaotîk a Rojhilata Navîn pengiziye Tirkiyeyê. Ji dêvla ku ev welat van tiştan bigire ber çavan, divê ji bo peydakirina nêvenga diyalogê gav bên avêtin." 

 

'LI ROJHILATA NAVÎN OCALAN MODELA LIHEVKIRINÊ YE' 

 

Gursoy, diyar kir ku divê hîn bêtir hesasiyetên gelê kurd neyên pincirandin. Gursoy got ku di nêvengên wisa rageşiyî de çirûskek tenê jî rê li ber tevgerên şidetê vedike. Gursoy, diyar kir ku di vî warî de şik û gumanên wan hene. Gursoy, dest nîşan kir ku wê terhê nêrîna Ocalan a ji bo meseleya kurd û rêbaza wî ya aştiyane, hemû kesên li çareseriyê digerin têr bike û wiha domand: "Ya ku em ji nivîs û gotinên Ocalan fêm dikin ew e ku li Rojhilata Navîn modeleke lihevkirinê ye. Nêrîna wî ya ji bo pirsgirêka kurd nêrîneke aştiyane û diyalogê ye." 

 

Herî dawî Gursoy diyar kir ku divê hikûmet hin gavan bavêje, da şik û guman ji holê rabin. Gursoy got ku dê ev yek kêm zêde bibe cihê ku hindik be jî ji bo nêvenga aştiyê hêvî heye.