Dayikên Aştiyê ji bo tecrîda li ser Rêberê PKK'ê Abdullah Ocalan şermezar bikin, bi awayekê hem wext li gelek bajaran dest bi greva birçîbûnê kirin. Meclisa Dayikên Aştiyê ya Stenbolê li Unkapaniyê di hin avahiyan de dest bi greva birçîbûnê kirin. Dayikan li salonê pankarta "Em ê ji bo tenduristî û ewlehiya Birêz Ocalan ranewestin" vekirin. Dê çalakiya greva birçîbûnê ya dayikan 3 rojan dewam bike.

 

'MIFTEYA ÇARESERIYÊ LI ÎMRALIYÊ YE'

 

Yek jî Dayika Aştiyê Ezîne Dal der barê çalakiya xwe de axivî, diyar kir ku tecrîda li ser Ocalan îro nehatiye destpêkirin, 18 sal e tecrîd dewam dike. Dal aşkera kir ku Ocalan vîna gelê kurd e û wiha axivî: "Ev tecrîd ne tenê li ser Rêberê me, li ser hemû gelê kurd tê meşandin." Dal bal kişand ser çalakiya greva birçîbûnê ya di 11'ê Îlona 2016'an de li Amedê hat destpêkirin jî û anî ziman ku ji wê rojê ve ew agahiyê ji Rêbertiya xwe nagirin û ev tişt got: "Em dixwazin bi Rêberê me re hevdîtin pêk bê. Heta Rêbertî azad nebe dê gel jî negihêje azadiya xwe."

 

AMED: BI TECRÎDÊ HÛN NAÇIN CIHEKÊ

 

Endamên Meclisa Dayikên Aştiyê yên Amedê jî ji bo tecrîda li ser Ocalan û zextên li girtîgehan şermezar bikin, 3 rojan çalakiya greva birçîbûnê dan destpêkirin. Çalakî li avahiya Meclisa Dayikên Aştiyê dewam dike û Hevserokê DBP'ê Mehmet Aslan, Hevserokê DBP'a Amedê Rûken akça çûn serdana wan. Li ser navê dayikan Nafiye Yîgît daxuyanî da û ev tişt anî ziman: "Em dayik in û dilê me dişewite. Em naxwazin ji girtîgehan cenazeyê zarokên me derkeve. Ji bo tecrîda li ser Ocalan bê rakirin, divê Wezareta Edaletê û hikumet gavan bavêjin. Bi tecrîdê hûnê xwe negihênin cihekê."

 

ARSLAN: GELÊ KURD Û DOSTÊN WAN BI FIKARIN 

 

Hevserokê Giştî yê DBP’ê Mehmet Arslan, diyar kir ku nûçeyên têkildarî  Ocalan ên di medyayê de derketin, gelê kurd û dostên wan kirin nava fikaran. Arslan, da zanîn ku hikûmet di pêkanîna tecrîtê ya qirêj a li ser Ocalan didem meşandin de bi israre û wiha axivî: “Greva Dayîkên Aştiyê û li qadên din ji bo hişyariya hikûmetêye. Hikûmeta AKP’ê bi tecrîtê dixwaze gelên li Tirkiyeyê bi hev bide şerkirin.”  

 

ÊLIH: DAXWAZNAME ŞANDIN JI WEZÎRÊ DADÊ RE

 

Meclisa Dayîkên Aştiyê yên Êlihê jî bi daxuyaniyekê dest bi greva birçîbûnê kir. Dayîkan, bang li hikûmetê kir ku destûr bide hevdîtinên malbat û parêzeran ên bi Ocalan re. Dayîkan, diyar kir ku divê demildest CPT biçe hevdîna Ocalan. Piştî axaftinê, dayîkan bi lêxistina çepikan daxuyaniya xwe bi dawî kirin. 

Di heman demê de rêveberên HDP’a Êlihê jî, têkildarî pêkanîna tecrîtê ya li ser Rêberê PKK’ê Abdullah Ocalan daxwazname şandin ji Serdozgeriya Komarê ya Bursa û Wezîrê Dadê re. 

 

WAN: EM Ê TECRÎTÊ BIŞKÎN IN 

 

Endamên Meclîsa Dayîkên Aştiyê yên Wan jî, ji bo bi dawî anîna tecrîta li ser Ocalan dest bi çalakiya greva birçîbûnê ya 3 rojan kirin. Greva birçîbûnê li avahiya DBP’a Wan pêk hat û pankata “Dê tecrît winda bike, azadî qezenc bike” daliqandin. Alîkarê Hevserokê Giştî yê HDP’ê parlamenter Nadîr Yildirim, endamên MYK, Heverokên HDP û BDP’ê yên Wanê û gelek dayîk piştgirî daN.    

 

Endama Meclîsa Dayîkên Aştiyê ya Wanê Kewê Işik, diyar kir ku bi salane Ocalan di girtîgeha Îmraliyê de tê girtin û wiha axivî: “Ev yek bê edaletiye. Tu hiqûqa vê yekê nîne. Me li her derê dest bi greva birçîbûnê kir. Dewlet bêdengiya xwe diparê. Dê greva me ya birçîbûnê tecrîtê bişikîne. Divê demildest hevdîtin bi Ocalan re bê kirin û deriye Girtîgeha Îmraliyê bê girtin.”  

 

Piştî axaftinan, dayîkan bi berzkirin tilîlî û lêxistina çepikan dest i greva birçîbûnê kir.