Kobaniya ku agirê Şoreşa Rojavayê gur kir, di 15’ê Îlona 2014’an de li dijî êrîşên DAIŞ’ê berxwedaneke bêhempa nîşan da û navê xwe li dîroka berxwedanê ya cîhanê nivîsand. Berxwedana YPG/YPJ’ê lêgerîn û serketina azadiyê diyarî gelên cîhanê kir. Di dema şer de gelek kes li ser sînorê Pirsûs-Kobaniyê ji bo piştevaniya berxwedanê kom bûn û bûn şahidê berxwedanê. Parlementerê HDP’ê yê Rihayê Îbrahîm Ayhan ku wê demê li ser sînor şahidiya geşedanan dikir, behsa wan rojan kir. 

 

'GELÊN CÎHANÊ ANÎ GEL HEV’ 

 

Ayhan, diyar kir ku di şexsê kurdan de wehşet û barbartî li gelên Rojhilata Navîn hatiye ferzkirin. Ayhan got ku ji bo barbartî li gelan bê ferzkirin DAIŞ wek projeyeke ku ji aliyê hêzên navnetewî ve hatiye çêkirin derket holê. Ayhan anî ziman ku lê belê rastî û ruhê ku li Kobaniyê derket holê ew feraset şikandiye. 

 

Ayhan dest nîşan kir ku li Kobaniyê berxwedaneke bêhempa hatiye dayîn û wiha got: “Li her çar perçeyên Kurdistanê yekîtî, hêza berxwedanê ya kurdan derxist holê û ji vê wirdetir Tirkiye jî di nav de hemû gelên cîhanê aniye gel hev.” 

 

'BERXWEDAN BARBARTIYÊ TÊK BIR’ 

 

Ayhan Kobaniyê şiband Stalingradê û ev tişt gotin: “Di dema Şerê Cîhanê yê Duyemîn de çawa ku li Stalîngradê faşizm têk çû, li Kobaniyê jî bi berxwedanê faşizm têk çûye û pêşketina wê hatiye astengkirin.”

 

Ayhan, anî ziman ku li vî aliyê sînor li Pirsûsê jî gel hatin gel hev û bûne perçeyeke ji berxwedanê. Ayhan, got ku li ser sînorê Pirsûs-Kobaniyê eniyeke mezin a berxwedanê çê bûbû û ji Tirkiye û Kurdistanê bigire ji gelek welatan mirov hatin gel hev. 

 

Ayhan, dest nîşan kir ku ruhê piştevanî û yekîtiyê pratîkeke cidî derxistiye holê û ji ber vê mirov tim dihatin Pirsûsê. Ayhan wiha domand: “A rast hemû nirxên di parzûna mirovahiyê de derbas bûne di pêvajoya Kobaniyê de derketin holê. Li dor nirxên wek alîkarî, piştevanî û azadiyê ji her bawerî gel li dor berxwedana Kobaniyê bûn xelek. Bi vê yekê re wî ruhê xwe yê berxwedanê li geşedanên din jî peyda kir. Paşê jî 1’ê Mijdarê ‘Roja Kobanî ya Cîhanê’ hat îlankirin. Sedema herî girîng a ku rê li ber vê îlankirinê vekir, ew nirxên ku ew berxwedan wan temsîl dike bi xwe ne.” 

 

‘JINAN PÊŞENGIYA BERXWEDANÊ KIR’ 

 

Ayhan, anî ziman ku ji bo DAIŞ li Rojhilata Navîn û li nav hemû cîhanê aloziyê derîne wek projeyekê hîn jî didome û wiha got: “Ev proje projeya ku cîhanê veguherîne dojehê ye. Heke ne ji berxwedana Kobaniyê bûna, heke li hemberî wan êrîşan sekneke tune bûna, wê îro li cîhanê û Rojhilata Navîn tiştên zaf cuda biqewimiyanan. Ji ber vê divê di dîrokê de rola berxwedana Kobaniyê baş bê tespîtkirin. Em hemû baş dizanin dema gotin ‘Ha Kobanî dikeve ha dikeve’, di eniyên herî pêş de jin şer dikirin. Divê meriv bibêje ku berxwedana Kobaniyê berxwedana jinê bû.” 

 

Ayhan, diyar kir ku berxwedana Kobaniyê ji bo yekîtiya kurdan gavek bû û wiha got: “Ruhê Kobaniyê têkoşîneke têkûz bir ê ve dibe. Ev hêz bi awayekî zêde moral û hêzê dide gelan.”