AMED – Serokwekîlê Koma HDP’ê Ahmet Yildirim, îdiaya ku der barê Rêberê PKK’ê Abdullah Ocalan de li ser medyaya civakî hat parvekirin û daxuyaniya Serdozgeriya Komarê ya Bûrsayê nirxand û wiha got: “Êdî bawerî bi Serdozgeriya Komarê ya Bûrsayê nayê.”
Zêdeyî salekê ye agahî ji Rêberê PKK’ê Abdullah Ocalan nayên wergirtin. Malbat û parêzeran ji bo hevdîtinê heta niha 700 carî serlêdan pêk anîne û hemû jî hatine redkirin. Her wiha herî dawî der barê jiyana Rêberê PKK’ê Abdullah Ocalan de li ser civaka medyayî îdiayek hat parvekirin û paşê piştî parvekirina vê îdiayê bi çend rojan Serdozgeriya Komarê ya Bûrsayê parvekirina hat kirin derewand. Serokwekîlê Koma HDP’ê Ahmet Yildirim îdiaya ku hat parvekirin û daxuyaniya ku Serdozgeriya Komarê ya Bûrsayê da nirxandin û wiha got: “Êdî bawerî bi Serdozgeriya Komarê ya Bûrsayê nayê.”
Yildirim, dest nîşan kir ku heke bi Rêberê PKK’ê re hevdîtin bê çêkirin dê welat evqas ber bi xerabiyê ve neçe û wiha domand: “Heke Tirkiye bihişta Birêz Ocalan bi derve re pêwendiyê deyne, wê geşedanên li welat û Rojhilata Navîn evqasî ber bi îstîqameteke xerab ve neçûnan. Wê Tirkiye ne li hundur û ne jî li derve ewqas îtibar winda nekirina.” Yildirim, dest nîşan kir ku Ocalan bi perspektîfa xwe ji bo gelên Rojhilata Navîn xwedî wateyeke girîng e.
'6 SAL IN BI HINCETÊN SOSRET HEVDÎTIN TÊ ASTENGKIRIN’
Yildirim, balê kişand ser îdiayên ku der barê jiyana Rêberê PKK’ê Abdullah Ocalan de li ser medyayê civakî hatin parvekirin û ev tişt gotin: “Bêyî ku li hemberî vê îdiaya ku li ser medyaya civakî hat parvekirin bertekên cidî bên nişandan, Serdozgeriya Komarê ya Bûrsayê ew derewand. Lê belê bi qasî ku tu bêjî baweriya vê daxuyaniyê lawaz bû. Em ji cerîbînên xwe yên berê dizanin. Serdozgeriya Komarê ya Bûrsayê zêdeyî 6 sal in wek henekê xwe bi mêjiyê me bike, bi hincetên sosret ên wek ‘koster xerabe ye’ û ‘şert û mercên neyînî yên hewayê’ serdanên parêzeran asteng dike. Li vî welatî hema bila kesek rabe bêje bawer dikim ku ji ber koster xerabe ye serdan pêk nayê, wê çaxê em ê jî bawer bikin. Ji ber vê yekê tu bawerî bi daxuyaniya Serdozgeriya Komarê ya Bûrsayê nayê.”
Yildirim bang li îktîdarê kir da dawî li tecrîdê bîne û wiha got: “Ev daxwaza me ne siyasî ye. Huqûqî ye, wijdanî ye, exlaqî ye û însanî ye. Divêtiya peymana navnetewî ye ku Tirkiye jî ew îmze kiriye.”
‘CPT ROLA XWE NALÎZE’
Yildirim, dest nîşan kir ku di vî warî de CPT jî rola xwe nalîze û wiha got: “Ji bo Birêz Ocalan ewqas çalaki tên li darxistin, lê belê li gel vê yekê jî CPT’yê rola xwe nelîstiye.” Yildirim, bi bîr xist ku CPT rapora der barê lêkolîna xwe ya dawîn de bi raya giştî re parve nekiriye. Yildirim got ku heke CPT der barê lêkolînên xwe de daxuyaniyê bide dê hemû pirsnîşanên raya giştî ji holê rabike û wê bi vî awayî rola xwe bilîze.