Ji Rêberê PKK'ê Abdullah Ocalan ji 11'ê Îlona 2016'an heta niha agahî nayê girtin. Piştî der barê tenduristî û ewlehiya Ocalan de li ser medya civakî nûçe hat belav kirin, fikar û nerazîbûnên gelê kurd zêde bû. Parêzer û Endamê Platforma Hiqûqnasên Azadîxwaz  (OHP) Cemal Demîr ku di navbera salên 2008-2011'an de 7 caran bi Ocalan re hevditin kir, bal kişand ser ewlehî û tenduristiya Ocalan. Demîr, anî ziman ku ziyaret û hevdîtinên bi Ocalan re dê bibe nefes û bêhnek nû. 

 

‘GER BI MUTABAQATA DOLMABAHÇE RE SADIK MABÛNA'

 

Demîr, destnîşan kir ku mifteya jiyana hevpar Îmralî ye û wiha got: “Birêz Ocalan li gel tecrîda giran a li ser wî tê meşandin, hewl dide ku pirsgirêka kurd bi riya demokrasiyê çareser bike. Di çareseriya demokratîk û aştiyane de israr dike. Ocalan ji bo çareseriya demokratîk û aştiya mayinde kir. Ger ku bi mutabakata Dolmabahçe re sadiq mabûya de îro her tişt pir cuda û baştir bûna. 

 

'DIVÊ ÎMRALIYÊ NEKIN AMÛRÊN POLÎTÎKAYÊN ERZAN' 

 

Demîr, anî ziman ku şert û mercên tecrîd û îzolasyonê yên li ser Ocalan tê meşandin xizmeta çareseriya demokratîk nake û wiha got: “Tecrîd bi serê xwe pêkanîna dijmirovî ye. Şikandina rûmetê ye. Ji ber vê yekê hiqûqa gerdûnî tecrid qedexe kiriye. Lê li Girtîgeha Îmraliyê tecrid heye. Hiqûq ketiye bin piyan. Li Îmraliyê rejîma taybet û pergala Îmraliyê di meriyetê de ye. Dewlet bi israra tecrîdê rê li pêş çareseriyê digire. Giranî û hêza Ocalan a çareseriyê bi dehan caran hat dîtin û îspatkirin. Divê hêz û mîsyona Îmraliyê baş bê zanîn. Divê Îmraliyê ji polîtîkayên erzan û rojane re nekin amûr."

 

‘HERÎ ZÊDE NIHA PÊDIVÊ JI OCALAN HEYE' 

 

Demîr, destnişan kir ku di her serdemên zor û dijwar de Ocalan rol û rista xwe lîstiye û rê li pêş çareseriyê vekiriye û wiha got: "Di rewşa niha de xetimînek zêde heye. Rê li pêş siyaseta demokratîk hatiye girtin. Li dijî civaka muxalif tundi û darbeyên giran heye. Hemû deng û rêxistinên muxalif hedef tên girtin. Ev kaos û xitimandin dikarin bi Îmraliyê re çareser bikin. Li ser esasê diyaloga bi Îmraliyê re çareser dibe. 

 

‘CPT RÊZDARIYA XWE WINDA DIKE'

 

Demîr, helwesta Kamîteya Pêşîlêgirtina Îşkence ya Ewropa (CPT) jî rexne kir û wiha got: “Tevî ku parêzerên Birêz Ocalan serlêdan kirin jî heta niha tu daxuyanî nedane. Ev rêzdariya CPT winda dike. Hesasiyeta civakê ya der barê ewlehiya Ocalan tê zanîn. Civak der barê rewşa Ocalan de ne xwedî agahî ye. Armanca CPT rê li pêş îşkenceyê bigire. Pergala Îmraliyê divê agahî bide. Heta niha7 caran serî li Îmraliyê daye divê raporê aşkere bike. Ev helwesta  Îmraliyê nayê qebûl kirin. 

 

Demîr, anî ziman ku di vê serdema ku DAIŞ'ê li Rojava, başur û Rojhilata Navîn êrîş pêk anîn hat dîtin ku çiqas pêdivî bi Ocalan heye û xwest hemû sazî, rêxistin û kesên demokrat ji bo hevdîtina bi Ocalan re hevdîtin bikin.