Malbatên polîs û leşkerên ku ji aliyê PKK’ê ve di dîrokên cuda de hatine desteserkirin, her çi qas encam ji hevdîtinê xwe yên bi dewletê re wernegirtibin jî, lê bêsebr li benda wê rojê ne ku bigihên zarokên xwe. Serokê Desteya Rêveber a Borsaya Bazirganiyê ya Meletiyê Gursel Ozbey, bavê binefeser Semih Ozbey ku di 15’ê Îlona 2015’an de li Geliyê Pulumuriyeyê ya Dersimê ji aliyê PKK’ê ve hat desteserkirin, anî ziman ku peywira dewletê ye ku bi sax û silamet zarokên wan radestî wan bike. 

 

‘ÊDÎ TAQET DI ME DE NEMAYE KU EM SEBR BIKIN’ 

 

Ozbey, diyar kir ku ji bo ew kurê xwe bîne, wî serî li gelek cihan daye, lê belê ji roja ku hatiye desteserkirin heta niha wî carekê kurê xwe dîtiye, ew jî di dîmenên ku rêxistinê parvekirine de. Ozbey, diyar kir ku 25 meh in ew agahî ji kurê xwe wernagirin û ev tişt gotin: “Em êdî bi hesreta deng û bêhna kurê xwe ne. Di vê pêvajoyê de tu derî nema min lê nexist. Em gelek caran çûn cem Serokomar, Serokwezîr, Wezîrê Karên Navxweyî, beşdarî civînên komên Meclîsê bûn. Lê belê tenê ji me re gotin ‘sebr bikin’. Êdî taqet di me de nemaye ku em sebr bikin. Em perîşan bûne.” 

 

Ozbey, diyar kir ku piştî kurê wî hatiye desteserkirin ji bo êdî dê û bavên tu kesî negirîn ew tev geriyaye û bûye mertalê zindî jî û wiha got: “Roja ku operasyon hebin, xeyalşikestî dibim. Xwe bi xwe difikirim gelo operasyon li herêma ku kurê min lê ye çê dibin?”

 

Ozbey diyar kir ku di dema operasyonan de wî bang li Serokomar kiriye û wiha gotine: “Qethiyen em oprasyonan naxwazin. Naxwazin tu kes bimire. Malbatê her du aliyan jî hene. Mirovek wisa bi hêsanî nayê mezinkirin. Di operasyonan de canê me diçe. Yanî zarokên me, kezeba me di nav de ye.” Ozbey, anî ziman ku heke zarokekî rayedaran bûna, wê dinya xera bikiranan  û wiha got: “Lê belê em wisa bêdeng disekinin. Êdî bes e. Çareyekê bibînin.” 

 

Ozbey, dest nîşan kir ku ji bo anîna van zarokan divê Serokomar, Serokwezîr û Wezîrê Karên Navxweyî tev bigerin. Ozbey, diyar kir ku PKK dixwaze leşker û polîsên di dest xwe de bide, lê belê ji bo anîna van zarokan helbet divê hin şert û merc bi cih bên. Bav Ozbey got ku ji bo anîna van zarokan ew dixwazin dewlet riyekê bibîne, ji bo ew wan bînin soz dane û diyar kir ku ew ê riyan vebike û wiha got: “Înşeleh piştî van bûyerên li Iraqa Bakur em ê biçin wan zarokan bînin.” Ozbey anî ziman ku hêviya wan navenda giştî ya ÎHD’ê ye. 

 

‘ÇI HEWCE BE DIVÊ DEWLET BIKE’

 

Bav Ozbey wiha bang li dewletê kir: “Ev zarok leşker û polîsên we ne. Ev zarok xizmeta we dikirin. Ji bo ewlehiya we bi riyan diketin. Ev zarok bi xwe teslîm nebûn. Bi awayekî, ji ber ku we ewlehî peyda nekir hatin desteserkirin. Berpirsiyarê anîna van zarokan hûn in û hûn mecbûr in wan bînin. Wek bavekî ez wisa dibêjim; ji bo bi sax û silamet ev zarok bên çi hewce be divê dewlet bike. Heke ji bo leşkerekî îsraîlî girtiyên filîstînî tên berdan, heke Lubnan ji bo 8 cenazeyên xwe 250 girtiyan berdide, ji bo vê şert û merc çi dibin bila bibin divê hûn van zarokan bigihînin malbatên wan.” 

 

BANG LI PKK’Ê KIR 

 

Bav Ozbey bang li PKK’ê jî kir û diyar kir ku kurê wî efserekî 3 mehî bû û wiha got: “Tiştê di zanim tevî kurê min 13 kes di dest we de ne û hemû jî zarokên vê herêmê ne. Ev zarok zarokên herêma ku hûn lê têdikoşin in. Ez jî zarokê malbateke kurd im. Qet nebe divê em karibin wan bibînin. Ev zarok mirov in, em jî malbatên wan in.”