Hevserokên Partiya Yekîtiya Demokratîk (PYD) Şahoz Hesen ê ku bi Hêvî Mistefa re di 27’ê îlonê de di 7'emîn Kongreya Asayî ya PYD’ê de hat hilbijartin geşedanên heremê ji Ajansa Mezopotamyayê re nirxand. 

 

'EM GOTINÊN XWE DIXIN MERIYETÊ’ 

 

Hesen destnîşan kir ku partiya wan pêşengiya siyaseta li Sûriyê dide meşandin û ew li ser projeya federal dixebitin. Hesen da zanîn ku tiştên pêwîst ên ji bo avakirina Sûriya Demokratîk tespît kirine û got: “Di vê çarçoveyê de li ser daxwaza hevserokên me yên berê û bi erêkirina biryara navenda me hevserok, tuzik û bername hat guhertin. Ev jî demokartîkbûyînê dide nîşandan. Mînakbûn hat hedefkirin. Bi van guhertinan em gotinên xwe bikin meriyetê û me vê da îspatkirin. Em ê di vê çarçoveyê de li ser baweriya ku hevalên me vala dernekevin têkoşîna xwe bilind bikin.” 

 

'DIVÊ JI VÎNA GEL RE HURMET BÊ NÎŞANDAN’ 

 

Hesen anî ziman ku li Bakurê Sûriyê geşedanên dîrokê diqewimin û wiha dewam kir: “Paytexta Reqayê ji DAIŞ’ê hat rizgarkirin. Li herêma Dêra Zor jî axa girîng jî hat azadkirin. Cîhan bi baldarî li van serkeftinan dinêre. Di heman demê de Rûsya, Îran, tifaqa rejîmê û Artêşa Tirk ketin axa me. Ev nakokiyek girîng e. Her tim axa me tacîz dikin. Divê viya baş bê zanîn destkeftiyên me bi berxwedanê ketine dest em ê dest jê bernedin. Em ê li dijî gefan gav paş de neavêjin. Ya rast jî ew e kul i Sûriyê çareseriya siyasî pêk bê. Ev çareserî federal û demokratîk nîn be, armanca Dewleta Tirkiyê jî ew e ku axa Bakurê Sûriyê dagir bike. Di vî warî de destkeftiyên leşkerî û siyasî yên li qadê girîng in. Dilê wan heye êrîş bikin lê dê li dijî wan îradeya berxwedanê jî hebe. Ya girîng jî ew e ku kesên dixwazin axa Bakurê Sûriyê dagir bikin, bila li bedelên azadkirina vê axê bibînin. Bakurê Sûriyê azad e û azad birêve diçe. Her roja diçe demokrasi bêtir sazîbûna xwe xurt dike. Gava ewil a hilbijartinan hat avêtin û amadekariyên gava duyemîn jî didome. Lazim e herkes hurmetê nîşanî vê rewşa demokaratîkbûnê bide. Berovajî vê yekê yên ku vîna gel tune bihesibîne divê bibînin ku gel çawa li ber xwe jî dide.” 

 

'ÊDÎ DEMA ÇARESERIYA SIYASÎ YE’ 

 

Hesen diyar kir ku siyasetmedarên Tirkiyê bi nêrînek neyartî li Bakurê Sûriyê dinêrin û wiha axivî: “Ji bo vê neyartî û êrîşkariya xwe li qadê pêk bînin, bi Rûsya û DYA’yê re têkiliyên wan hene. Em hin ji van tiştan agahdar in. Lê em ji hemûyî re ne serwer in. Li wî aliyê din ê Minbicê Rûsî hene. Li Dêra Zorê jî bi hevkariya koalîsyona navnetewî operasyon jî didome. Dê di demek kin de temam bibe. DYA û Rûsya aktorên bi bandor ên qadê ne. Ya girîng ne ew e ku Rûsya bi DYA’yê re hevdîtinan bike û lêgerîna çareseriya Sûriyê ye. Ya rast ew e ku bi hêzên li herêma Sûriyê re li ser çareseriya siyasî ya Bakurê Sûriyê bê axaftin. Cenevre dibe Astana dibe ku dibe bila bibe divê ku çareseriya siyasîbê bê nîqaşkirin. Piştî paqijkirina DAIŞ’ê ya ji Reqayê heke ku ev çareseriya siyasî pêk neye, xetereya ku dê hêzên leşkerî yên li qadê bên hember hev jî heye. Em dizanin ku herkes vê yekê dizane. Lê em dibêjin her çiqas kêm daxuyanî bên dayîn jî êdî dema gav avêtinê hatiye.” 

 

'TIRKIYÊ XWE NEGUHERÎNE DÊ WINDA BIKE’ 

 

Hesen destnîşan kir ku siyaseta Tirkiye birêve dibe kêrî gelên herêmê nayê û wiha lê zêde kir: “Divê ku êdî ev siyaset bê guhertin. Vîna li Tirkiyê derket holê ya gelan e. Gel jî Tirkiyê dagirker dibîne û dê li dijî wan li ber xwe bide. Tirkiye bi vê siyaseta xwe ya mezhebî ne li herêmê û ne jî li qada navnetewî nagîhîje tu armancê û encamekê jê dernaxe. Ji ber vî awayî divê bi aqil û fikrek nû siyaseta xwe buguherîne. Heke xwe ne guherîne jî dê ji sedî sed winda bikin.” 

 

'YA FERZ YEKÎTIYA NETEWEYÎ YE’ 

 

Hesen bal kişand ser geşedanên piştî referandûma serxwebûnê ya Herêma Federa ya Kurdistanê û wiha dawî dawî li axaftina xwe anî: “Du hêzên bingehîn PDK û YNK cuda cuda siyasete hildiberînin. Ya rast ew e ku divê hemû hêz bên cem hev û bi hevkarî formul û stratejiyekê bidin pêşiya xwe. Ji bo yekîtiya neteweyî jî em amade ne. Ya herî ferz jî yekîtiya neteweyî ye.” 

 

MA / Erdogan Altan