WAN – Şaxa ÎHD’ê ya Wanê diyar kir ku di 9 mehan de li herêmê di qada civakî, siyasî û aborî de 2 hezar û 397 binpêkirinê mafan qewimîne û 3 jê bi tundiya nav malê, 2 jê tundiya civakî û bi tevahî 5 jinan jiyana xwe ji dest da.
Şaxa Komela Mafên Mirova (ÎHD) a Wanê ropara 9 mehên dawî ya binpêkirina mafên mirova a li herêmê bi civînek çapemeniyê aşkera kir. Daxuyanî li avahiya Şaxa ÎHD’ê pêk hat. Beriya raporê aşkere bikin Serokê Şaxa ÎHD’ê ya Wanê Murat Melet axivî û destnîşan kir ku di serdema OHAL’ê de di qada aborî, civakî û siyasî de bi sedan binpêkirina mafan qewimî ne û wiha got: “Binpêkirinên mafan û pêkanînên der mirovahî ji pêkanînên salên 90’î bihûrî ne. Çareserî mayîndekirina aştiyê re pêkan e.”
‘2 HEZAR Û 397 BINPÊKIRINÊN MAFAN QEWIMÎN’
Rapora binpêkirinê mafan Endamê MYK’a ÎHD’ê Servet Ertak xwend. Ertak da zanîn ku li herêmê di vê pêvajoya şer û tundiyê de 6 polîs û leşkeran û 29 endamên rêxistinê jiyana xwe ji dest dane. Ertak anî ziman ku li herêmê di 9 mehan de di kategoriyên cuda de binpêkirinên mafan pêk hatine û li gorî wan tespît kiriye 2 hezar û 397 binpêkirinên mafan qewimîne. Ertak wiha dewam kir: “893 xebatkarên cemawerî û akademisyen bi sûcdariyên li dijî hiqûqî derketine hatine îxrackirin. Li bajarê me civînên servekirî, xwepêşandanên demokratîk, şahî û gelek çalakî bi hinceta ‘ewlehiyê’ bi dema 30 rojan hatine qedexekirin.”
‘LI GIRTÎGEHAN BINPÊKIRINA MAFAN ZÊDE BÛ’
Ertak destnîşan kir ku li girtîgehan binpêkirina mafan derketiye asta herî jor û wiha axivî: “Di serdema OHAL’ê de binpêkirina mafan a herî giran li her qada jiyanê û li girtîgehan qewimî ne. Di mijarên mîna dema sepandina sewqê de 14, di mijara lêgerîna tazî de 4, gilîkirina îşkenceya fizîkî 19, dermankirina bi kelepçekirî, nexwşxane û derxistina revîran û gefên karmendên parastina înfazê de serî li saziya me dane.”
JI 475 KESÊ BINÇAVKIRÎ 91 KES HATINE GIRTIN
Ertak diyar kir ku li tevahiya bajêr 475 kes hatine binçavkirin û ji van 91 kes hatine girtin û her wiha 304 pênaber ji welatên cuda ku hatine Wan hatine binçavkirin. Ertak bî bîr xist ku Parlamentera Wanê Fîgen Yuksekdag wekîlî û endamtiya wê ya partiyê hatiye xistin û Wekîla Wanê Tugba Hezer Ozturk jî ji hemwelatîbûnê hatiye derxistin. Ertak got ku hevşaredarê bajarê mezin û hevşaredarên navçeyan jî girtina wan didome.
‘LI WANÊ 5 JIN HATIN KUŞTIN’
Ertak bal kişand ser tundiya li dijî jinê û wiha pê de çû: “Di 9 mehan de 3 jê bi tundiya nav malê, 2 jê tundiya civakî û bi tevahî 5 jinan jî jiyana xwe ji dest da. Li dibistanên navçeyên Elbak, Erdîş, Artemêtan û Payîzavayê 17 zarok bi îstîsmara zayendî re rû bi rû man.”