STENBOL - Hevberdevkên Kongreya Demokratîk a Gelan (HDK) Gulistan Kiliç Koçyîgît û Onur Hamzaoglu, diyar kirin ku bi pêkanînên li Îmraliyê gelê Tirkiye di bin tecrîdê de ye. Hevberdevkan xwestin bi lezgîn deriyê Îmraliyê ji malbat û parêzer re vekin û destûr bidin ziyaretan.
Rêberê PKK'ê Abdullah Ocalan ku 18 salin bi tena serê xwe li Girtîgeha Tîpa F a Ewlehiya Wê bilind a Îmraliyê di yek hucreyê de tê girtin, ji 11'ê Îlona 2016’an heta niha tu agahî jê nayê girtin. Di demên dawî de piştî agahiyên li ser medyaya civaki der barê tenduristiya Ocalan de belav bûn fikar û nerazibûnên rêxistinên demokratîk û gelê kurd zêde dibe. Hevberdevkên Kongreya Demokratîk a Gelan (HDK) Onur Hamzaoglu û Gulistan Kiliç Koçyîgît, fikarên xwe yên der barê tenduristiya Ocalan û tecrida Îmraliyê anîn ziman.
HAMZAOGLU: GEL LI RÊBERÊ XWE XWEDÎ DERDIKEVE
Hevberdevkê HDK'ê Onur Hamzaoglu, anî ziman ku tecrîd sûcê mirovahiyê ye û wiha got: “Divê ev yek bi cemaweriyê re bê parvekirin. Ev pêkanînên li Îmraliyê di heman demê de îşkenceya li ser malbatê ye jî. Yek ji lîstikên qirêj yên dewletê ye. Lê tevî her tiştî gel li Rêberê xwe xwedî derdikeve. Em dixwazin demek berî demekê tecrîda li ser Ocalan bi dawî bibe. Havê hemû girtî û hikumxwaran heye ku ji mafên mirovan sûdê bigirin. Mafê hemû girtiyan heye ku bi malbat û parêzerên xwe re hevdîtin bikin. Divê dewlet dest ji vî sûcî berde. Divê birêz Ocalan di na va şert û mercên bi tenduristi de bê muayinekirin. Divê berî her tiştî tecrîda dibe sedema van agahiyên aloz û fikar bê rakirin."
KOÇYÎGÎT: GELÊ TIRKIYE DI BIN TECRÎDÊ DE YE
Hevberdevka HDK'ê Gulistan Kiliç Koçyîgît jî anî ziman ku Tirkiye bi tecrîda li Îmraliyê hiqûqa xwe û hiqûqa navneteweyî binpê dike û wiha got: "Pêkanînên li Îmraliyê li dijî mafên mirovan ên bingehîn e. Me bi sedan caran ev yek anî ziman. Me got dibe ku hûn wî bigirin û bavêjin girtîgehê. Lê hûn nikarin fikrê wî bigirin. Em dibêjin tecrîd wekî ewrê reş li ser Tirkiye ye. Bi tecrida li ser Ocalan gelê Tirkiye di bin tecridê de ye. Di şexsê Ocalan de hemû gelê kurd û gelê Tirkiye di bin tecridê de ye."
'DEMEK BERÎ DEMEKÊ BILA HEVDÎTIN BÊ KIRIN'
Koçyigit, destnîşan kir ku daxuyaniya dozgerê Bûrsa û wazaretê ya der barê îdîayên li ser medya civakî de wan tatmîn nake û ji bo ev fikar bi dawî bibe û ji bo rê li pêş diyalog û çareseriyê vebe divê berî her tiştî rêya Îmraliyê ji malbat û parêzeran re vebe. Divê tewez êdî ziyaret bi rêk û pêk bên kirin. Divê teqez hemû mafên ku girtiyên din sûdê jê digirin Birêz Ocalan jî ji hemû mafên girtiyên din sûdê bigire. Tecrîda li ser Ocalan raste rast bi politîkayên AKP'ê ve girêdayî ne. Yên çûn Idbile û dixwazin têkevin Efrinê polîtikayên tecrîda li ser Ocalan kûr dikin. "