WAN – Piştî erdheja Wanê, di navbera Şaredariya Erdîşê ya AKP’î ya wê demê û TOKÎ’yê de peymanek hat îmzekirin. Bi vê peymanê di bin navê “Veguherîna bajêr” de navçe veguherandin qada rantê. Li navçeyê pêdivî bi nêzî hezar jîngehî hebû, lê belê TOKÎ’yê 5 hezar jîngeh çê kirin û bi du qatan firotin.
Di ser erdheja Wanê ku di 23’yê Cotmeha 2011’an de pêk hat û 604 kes jiyana xwe ji dest dan û bi sedan kes jî birîndar bûn re 6 sal derbas bûn. Herî zêde erdhej bandor li navçeya Erdîşê kir. Li navçeyê bi sedana avahî hilweşiyan û bi hezaran jî mal xisar dîtin. Piştî erdhejê gelek soz hatin dayîn, lê belê hîn jî li navçeyê şopên erdhejê tên dîtin.
Piştî erdhejê bi hezaran kesên malên wan rûxiyan, di zivistanê de li derve, di bin konê havînê yên dewletê de man. Her wiha gelek zarokên ku ji erdhejê filitîn, ji ber hewaya sar û nexweşînan jiyana xwe ji dest dan. Navçe di dema erdhejê de hema bêje serobino bû, lê belê di 24 saetên ewil ên erdhejê de ekîpmanên lêgerînê jî neşandin navçeyê. Gelek welatî bi saya Şaredariya Bajarê Mezin a Amedê û şaredariyên bajarên derdorê yên BDP’î xelas bûn.
LI GEL HEMÛ ISRARAN JÎ WEK HERÊMA AFETÊ NEHAT ÎLANKIRIN
Ji ber nezaniya rêveberiya rizgarkirinê ya Serokatiya Rêveberiya Afet û Rewşa Lezgîn (AFAD) gelek kes jiyana xwe ji dest dan. Li gundên girêdayî navçeyê, gelek welatiyê di malên kelpîçî de jiyana xwe ji dest dan. Li gel hemû bangewaziyên rêxistinên civaka sivîl û partiyên siyasî jî,Wan û Erdîş wek “Herêma Afetê” nehatin îlankirin. Serokwezîrê wê demê Recep Tayyip Erdogan wiha gotibû: “Heke em Erdîşê wek herêma afete îlan bikin, ma hûn texmîn dikin ku wê pereyên bên vir têkevin bêrîka kê?” Di ser van gotinên Erdogan 6 sal derbas bûn, lê belê di navbera Şaredariya Erdîşê ya AKP’î ya wê demê û TOKÎ’yê de peymanek hat îmzekirin û bi vê peymanê di bin navê “veguherîna bajêr” de navçe veguherandin qada rantê. 6 sal in li navçeyê xebat didomin, lê belê ranta “veguherîna bajêr” ket bêrîka TOKÎ’yê. Hatibû diyarkirin ku ji bo birîna li navçeyê bê cebirandin TOKÎ tên çêkirin, lê belê îhaleya wan dan kesên nêzî AKP’ê û hema bêje bizmarek jî ji esnafên navçeyê nehat kirîn. Her wiha jîngeh bi buhayekî du qatî firotin şêniyên navçeyê.
NE VEGUHERÎNA BAJÊR, VEGUHERÎNA RANTÊ YE
Guven Çalik ku wê demê Endamê Meclîsa Şaredariyê bû anî ziman ku “veguherîna bajêr” veguherandin “veguherandina rantê”. Çalik ev tişt gotin: “Dîtin ku li vir deng ji kesî dernayê domandin. Bajarê me perçe kirin. Pêdiviya Erdîşê bi hezar jîngehî hebû, lê TOKÎ’yê 5 hezar heb çê kirin. Çima ev qas jîngeh çê kirin? Çimkî, armanca wan bi destxistina rantê bû û bi serketin jî. Ji ber vê TOKÎ ev qas jîngeh çê kirin.”
'BI 20 HEZAR LÎREYÎ ERSE KIRÎN, BI 50 HEZAR LÎREYÎ FIROTIN GEL’
Çalik, anî ziman ku TOKÎ li Erdîşê bi 20 hezar lîreyî erse ji gel kirî, lê belê mulkiyeta qat bi 50 lîreyî firot gel. Çalik, dest nîşan kir ku bi vî awayî gel hatiye mexdûrkirin û hin kes jî hatine dewlemndkirin. Çalik, diyar kir ku hîn jî li Erdîşê rîska erdhejê heye û heke tevdîr neyên girtin, wê gelê Erdîşê zirereke mezin bibîne.