AMED – Oldarên Komeleya Îslama Demokratîk bal kişandin ser girîngî û wateya yekîtiya neteweya kurd û diyar kirin ku ger yekîtî hebûya Kerkûk nedihat radestkirin. Oldaran, anîn ziman ku dikarin bi ruhê yekitiyê ax û bajarên xwe biparêzin û yekîtî nebe azadî jî nabe.
Bertekên êrîşên Artêşa Iraqê û Heşdî Şebî yên li ser bajarên Herêmên Federal a Kurdistanê û pêşmergeyên Kerkuk teslîm kirin, didomin. Oldarên Kongreya Îslama Demokratîk (KÎD), diyar kirin ku berî referandumê, diviya bû yekîtiya neteweyî bihata avakirin. Oldaran, da zanîn ku di serî de Kerkuk hemû bajarên hatin teslîmkirin, dê bi rihê yekîtiya neteweyî cardin bên rizgarkirin.
'AZADÎ BI YEKÎTIYA NETEWEYÎ PÊKAN E'
Endamê DÎK’ê Mele Abdullah Arkan, diyar kir ku berî referandumê dest bi xebatên yekîtiya neteweyî kirin û wiha axivî: “Yekîtî pêngaveke ku destê bê avêtin e. Azadî jî bi yekîtiya neteweyî pêkan e. Hêzên Heşdî Şebî êrîşî Kerkukê kirin. Tecrûbeyên pêşmergeyan ên 70’î salî hebûn, lê nekarîn li ber hêzeke mîna Heşdî Şebî ya duh hatî avakirin, li ber xwe bidin. Ev yek mijara rexnê ye.”
‘KURDISTANA FEDERE NE BÛ YEK'
Akan, anî ziman ku yekîtiya neteweyî xwedî nirxek pîroz e û wiha got: “Gelê Rojava li ber çavanên cîhanê jiyanek nû avakirin. Ne tenê kurd, Erep, Ermenî, Êzidî, Keldanî û hemû gel hatin gel hev. Bi yekîtiyê hêz ava dibe. Gava mijar dibe şeref û rûmeta gel, ji şer revîn gunehek mezintir tuneye. Li gorî Ola Îslamê, ev gunek ji rojî negirtin û ji nimêj nekirinê girantir e.”
Arkan, destnîşan kir ku ger yekîtî dinava Herêma Federal a Kurdistanê de hebûya, dê hemû êrîş beralî bibûna û wiha bilêv kir: “Lê heyf û mixabin hikûmeta Federal a Kurdistanê nekarî partî û komên li wir bîne gel hev. Di referandumê de hemû welatan gelê kurd hedef nîşan dan. Ji ber ku yekîtî tunebû ev rewş bi êş bi dawî bû. Axa ku bi xwînê hat rizgarkirin, bi rehetî teslîmê Heşdî Şebî kirin. Ez mîna kurdekê ji vê yekê bir bêhn teng û aciz bûm. Ez di wê baweriyê deme hemû kurd jî ji vê yekê acizin.”
'AXA AZAD TESLÎM KIRIN'
Endamê DÎK’ê Mele Muhemmed Zobrîm jî, diyar kir ku Ola Îslamê tifaqan emîr dike û wiha axivî: “Ger gelê kurd jî mîna hemû gelên cîhanê yekîtiya xwe ava bikira, dê hêzek mîna Heşdî Şebî nekariya bajarên kurdan dagir bike. Ew axên ku bi xwînê ji destên DAIŞ’ê hatin girtin, dinava çend saetan de teslîmî Heşdî Şebî kirin. Ev encama nebûna yeke. Kongreya Neteweyî ya Kurdistanê (KNK) ku pêşengtiya xebatên yekîtiya neteweyî dike, divê em hemû li dora wê kom bibin. Li çar parçeyên Kurdistanê kurd li hev civiyan. Tenê malbata Barzanî û hin komên girêdayî wî beşdarî tu kongreyan nebûn. Ji xwe nexwestin Kongre bigihije armanca xwe.”
Zobrîm, bal kişnad ser girîngiya kongreya neteweyî û wiha dawî li axaftina xwe anî: “Bajarên ku ji dest çûn, dê bi rihê yekîtiya neteweyî cardin bên rizgarkirin.”