Komeleya Mafên Mirovan (ÎHD) a Îzmîrê wekî her hefteyê vê hefteyê jî bi dirûşma "Bila winda bên dîtin faîl bên darizandin" û "Ji gitiyên nexweş re azadî" li qadan bûn. Çalakiya ku 403 hefte ne dewam dike, li Qada Konakê li ber Sumerbanka Kevin pêk hat. Di çalakiyê de Serokê ÎHD'a Îzmîrê Alî Aydin daxuyanî xwend û aşkera kir ku di sala 1995'an de li herêma Faraşînê Beşîr Sayin, Haydar Yilmaz, Mehmet Emîn Yilmaz û Yusuf Aktaş Ertaş hatine binçavkirin û ji wê demê heta niha tu agahî ji wan nehatiye girtin û xwest aqûbeta windayan bê zelalkirin.

 

‘CAREKE DIN VENEGERIYA’

 

Aydin çîroka kesên winda vegot û aşkera kir ku welatiyan ji Fermandariya Tabûra Cendirmeyan a Elbakê û Qereqola Cendirmeyan a Aydemîrê destûr xwestiye, di wê dîrokê de Tabûra Topan a Tûgaya Komandoyên Çiyê ya Colemêrgê li herêmê operasyon daye destpêkirin, piştî malbat agahiyê ji xizmên xwe nagirin, malbata Sayin serî li qereqolê dide û wiha got: "Dibêjin ku 'Mirovên we ji hêla Qereqola Geçîtliyê ve hatine girtin biçin wan bigirin.' Malbat serî li Qereqola Peyanîsê ya Colemêrgê didin û bersiva 'Li vir nînin' didin wan. Lê dema malbatên wan diçin zozanan û li xizmên xwe digerin, dibînin ku hespên wan li hewşa qereqolê ne. Welatiyên şahid jî aşkera dikin ku bi helîkopterê wan dibin qereqolê. Lê ruxmê hemû lêgerînan jî agahî ji welatiyan nayê girtin."

 

22 SAL DERBAS BÛN HÎNA AGAHÎ TUNEYE

 

Aydin di dawiya axaftina xwe de wiha got: "Malbata Sayin li Dadgeha Cezayê Giran a Elkê da û biryara neşopandinê îtîraz kir. Sayin got ku di biryarê de tiştên cûda hene û di biryarê de weke ku bûyer di Gulan 1995’an de rû da, hatiye nîşandan. Lê bûyer di Cotmeha 1995’an de pêk hat. Min xwest hin tiştên di îtîrazê de hatin kirin, bên lêkolîn kirin. Lê dozger îfadeya tu kesî negirt. Gotin ku belgeyên destûrê bidin tuneye. Şahidê belgeyan ezim, serokê cerdevanan Musa Yilmaz û hemû cerdevanên gundin.  Lê hîna jî di lêpirsînê de tu encam nehatiye bidest xistin û ji kesên winda jî tu agahî nehat girtin. 22 sal derbas bûn hîna jî bersûc li holê tune ne.”